କଶ୍ମୀର : ସରକାରୀ କ୍ୱାର୍ଟରରୁ ତଡା ଖାଇବେ ଓମର ଅବଦୁଲ୍ଲା ଓ ମେହେବୁବା
ନୂଆଦିଲ୍ଲୀ : ଜମ୍ମୁ ଓ କଶ୍ମୀରରେ ଧାରା ୩୭୦ ଉଠିବା ପରେ ଏବେ ସେଠାରେ ଭାରତୀୟ ସମ୍ବିଧାନ ପରିସରକୁ ଆସିଯାଇଛି । ଏବେ ସେଠାରେ ସୁପ୍ରିମକୋର୍ଟର ନିର୍ଦ୍ଦେଶାବଳୀ ଲାଗୁ ହେବ ।
Sambad is now on WhatsApp
Join and get latest news updates delivered to you via WhatsApp
କିନ୍ତୁ ଏହା ଦ୍ୱାରା ବର୍ଷ ବର୍ଷ ଧରି ପୁରୁଷାନୁକ୍ରମିକ ଭାବେ କଶ୍ମୀରକୁ ନିଜର ଜମିଦାରୀ ଭାବିଥିବା କେତୋଟି ରାଜନୈତିକ ପରିବାର ପାଇଁ ଖରାପ ସମୟ ଆସିଯାଇଛି । ଏହି ପୂର୍ବତନ ମୁଖ୍ୟମନ୍ତ୍ରୀମାନେ ରହୁଥିବା ସରକାରୀ କ୍ୱାର୍ଟରକୁ ନିଜସ୍ୱ ସମ୍ପତ୍ତି ବୋଲି ଭାବି ଦେଇଥିଲେ । ଅବଦୁଲ୍ଲା ପରିବାର, ମୁଫତି ପରିବାର, କଂଗ୍ରେସ ନେତା ଗୁଲାମ ନବୀ ଆଜାଦ ପ୍ରଭୃତି ଶ୍ରୀନଗରର ଅତି ସୁରକ୍ଷିତ ଗୁପକର ରୋଡରେ ସରକାରୀ ବଙ୍ଗଳାରେ ସ୍ଥାୟୀଭାବେ ମାଗଣାରେ ରହିଆସୁଥିଲେ । ଏପରିକି ନିଜ ନିଜର ମୁଖ୍ୟମନ୍ତ୍ରୀତ୍ୱ କାଳରେ ସମସ୍ତେ ଏସବୁ ସ୍ଥାୟୀ ସରକାରୀ ବଙ୍ଗଳାକୁ କୋଟି କୋଟି ଟଙ୍କା ବ୍ୟୟ କରି ଆଧୁନିକୀକରଣ କରୁଥିଲେ ।
ଓମର ଅବଦୁଲ୍ଲା ଓ ମେହେବୁବା ନିଜର ମୁଖ୍ୟମନ୍ତ୍ରୀତ୍ୱ କାଳରେ ନିଜ ନିଜର ସରକାରୀ ବଙ୍ଗଳାରେ ଯଥାକ୍ରମେ ୨୦ କୋଟି ଓ ୩୦ କୋଟି ଟଙ୍କା ଲେଖାଏଁ ବ୍ୟୟ କରିଥିଲେ । ଏପରିକି ଉଭୟଙ୍କର ଶ୍ରୀନଗରରେ ଏକାଧିକ ବ୍ୟକ୍ତିଗତ ବଙ୍ଗଳା ଥିବା ସତ୍ତ୍ୱେ ସେମାନେ ସରକାରୀ କ୍ୱାର୍ଟର ଛାଡୁ ନ ଥିଲେ । ଏବେ ସେଠାରେ ସୁପ୍ରିମକୋର୍ଟ ନିର୍ଦ୍ଦେଶ ଲାଗୁ ହେବାକୁ ଥିବାରୁ ଉଭୟଙ୍କୁ ଏସବୁ କ୍ୱାର୍ଟର ଛାଡିବାକୁ ପଡିବ । ପୂର୍ବତନ ମୁଖ୍ୟମନ୍ତ୍ରୀମାନେ କ୍ଷମତାରୁ ଯିବା ପରେ ନିଜର ସରକାରୀ ବାସଭବନ ଛାଡିବାକୁ ବାଧ୍ୟ ବୋଲି ଗତ ବର୍ଷ ସୁପ୍ରିମକୋର୍ଟ ରାୟ ଶୁଣାଇଥିଲେ ।