ନୂଆଦିଲ୍ଲୀ : ଦେଶରେ ଏପର୍ଯ୍ୟନ୍ତ ମୋଟ ୯୬୦ଟି ଓମିକ୍ରନ ସଂକ୍ରମଣ ମାମଲା ଦେଖାଦେଇଛି । ସେମାନଙ୍କ ମଧ୍ୟରୁ ୩୨୦ ଜଣ ସୁସ୍ଥ ହୋଇଗଲେଣି ବୋଲି କେନ୍ଦ୍ର ସ୍ବାସ୍ଥ୍ୟ ମନ୍ତ୍ରାଳୟ ପକ୍ଷରୁ ସୂଚନା ଦିଆଯାଇଛି ।
Sambad is now on WhatsApp
Join and get latest news updates delivered to you via WhatsApp
କେନ୍ଦ୍ର ସ୍ବାସ୍ଥ୍ୟ ମନ୍ତ୍ରାଳୟର ଯୁଗ୍ମ ସଚିବ ଲବ ଅଗ୍ରଓ୍ବାଲ କହିଛନ୍ତି ଯେ, ଦେଶରେ ଏବେ ପ୍ରାୟ ୮୨ ହଜାର ୪୦୨ ଜଣ ସକ୍ରିୟ ଆକ୍ରାନ୍ତ ଅଛନ୍ତି । ଗତ ଏକ ସପ୍ତାହ ହେଲା ହାରାହାରି ଦୈନିକ ପ୍ରାୟ ୮ ହଜାର ସଂକ୍ରମଣ ଚିହ୍ନଟ ହେଉଥିଲେ । ତେବେ ଗତ ୨୬ ତାରିଖଠାରୁ ଦୈନିକ ସଂକ୍ରମଣ ସଂଖ୍ୟା ୧୦ ହଜାର ଟପିଯାଇଛି ।
ସେ କହିଛନ୍ତି ଯେ, ଦେଶର ପ୍ରାୟ ୯୦ ପ୍ରତିଶତ ପ୍ରାପ୍ତବୟସ୍କ (୧୮ ବର୍ଷରୁ ଅଧିକ ବୟସର) ଅତି କମରେ ଗୋଟିଏ ଲେଖାଏଁ କରୋନା ଟିକା ନେଇସାରିଲେଣି ।
ଏହି ଅବସରରେ ଆଇସିଏମଆର ଏମଡି ବଳରାମ ଭାର୍ଗବ କହିଛନ୍ତି ଯେ, ଏବେ ଉପଲବ୍ଧ କୋଭିଡ ଟିକାଗୁଡ଼ିକ ସଂକ୍ରମିତ ହେବାରୁ ରକ୍ଷା କରିବ ନାହିଁ କିନ୍ତୁ ଏହା ଗୁରୁତର ଅସୁସ୍ଥତା, ମୃତ୍ୟୁ ବା ଡାକ୍ତରଖାନାରେ ଭର୍ତ୍ତିହେବାରୁ ରକ୍ଷା କରିବ । ଅନ୍ୟପକ୍ଷରେ ଲୋକମାନେ ଅତି ଜରୁରୀ ନ ହେଲେ ଜନଗହଳିକୁ ନ ଯିବା ସହ ମାସ୍କ ପରିଧାନ କରିବା ଓ ହାତ ଧୋଇବାକୁ ସେ ପରାମର୍ଶ ଦେଇଛନ୍ତି ।
ଅନ୍ୟପକ୍ଷରେ ଆସନ୍ତା ୧୦ ତାରିଖରୁ ବରିଷ୍ଠ ନାଗରିକଙ୍କ ପାଇଁ ଆରମ୍ଭ ହେଉଥିବା ସତର୍କତାମୂଳକ ଟିକା ପାଇଁ ଏସଏମଏସ ମାଧ୍ୟମରେ ଯୋଗ୍ୟ ହିତାଧିକାରୀଙ୍କୁ ସୂଚୀତ କରାଯିବ ବୋଲି ସେ କହିଛନ୍ତି ।