ନୂଆଦିଲ୍ଲୀ : ଆଜି କେନ୍ଦ୍ର ସରକାର ଅନଲକ୍ ୫.୦ ଲାଗି ଗାଇଡଲାଇନ ଜାରି କରିଛନ୍ତି । ଏହା ଅକ୍ଟୋବର ୧ରୁ ଅକ୍ଟୋବର ୩୧ ପର୍ଯ୍ୟନ୍ତ ବଳବତ୍ତର ରହିବ । ଏହି ନୂଆ ଗାଇଡଲାଇନରେ ସ୍କୁଲ ଓ ଶିକ୍ଷାନୁଷ୍ଠାନ ଖୋଲିବା ସଂପର୍କରେ ନିଷ୍ପତ୍ତି ନେବାକୁ ରାଜ୍ୟ ସରକାରମାନଙ୍କୁ ଅନୁମତି ଦିଆଯାଇଛି ।
Sambad is now on WhatsApp
Join and get latest news updates delivered to you via WhatsApp
କେନ୍ଦ୍ର ଗୃହ ମନ୍ତ୍ରାଳୟ ପକ୍ଷରୁ ଜାରି ଗାଇଡଲାଇନରେ କୁହାଯାଇଛି ଯେ ଅକ୍ଟୋବର ୧୫ ପରେ ରାଜ୍ୟମାନେ ସ୍କୁଲ, କଲେଜ, କୋଚିଂ ସେଣ୍ଟର ଓ ଅନ୍ୟ ଶିକ୍ଷାନୁଷ୍ଠାନଗୁଡ଼ିକୁ ପର୍ଯ୍ୟାୟକ୍ରମେ ଖୋଲିବା ସଂପର୍କରେ ନିଷ୍ପତ୍ତି ନେଇପାରିବେ । ତେବେ ରାଜ୍ୟ ସରକାରମାନେ ସଂପୃକ୍ତ ଶିକ୍ଷାନୁଷ୍ଠାନର ପରିଚାଳନା କମିଟି ସହ ଆଲୋଚନା କରି ଓ ପରିସ୍ଥିତିକୁ ଦେଖି ଏ ସମ୍ପର୍କିତ ନିଷ୍ପତ୍ତି ନେଇପାରିବେ ।
ଅନ୍ୟପକ୍ଷରେ ଅନଲାଇନ ଶିକ୍ଷାଦାନ ଉପରେ ଗୁରୁତ୍ୱ ବଜାୟ ରଖିବାକୁ କେନ୍ଦ୍ର ସରକାର ପରାମର୍ଶ ଦେଇଛନ୍ତି । ଯେଉଁ ପିଲାମାନେ ସ୍କୁଲ ଯିବାକୁ ଚାହିଁବେ, ସେମାନେ ନିଜ ଅଭିଭାବକଙ୍କ ଲିଖିତ ଅନୁମତି ନେଇ ଯାଇପାରିବେ । କିନ୍ତୁ ସ୍କୁଲ ଓ ଶିକ୍ଷାନୁଷ୍ଠାନମାନେ ଛାତ୍ରଛାତ୍ରୀମାନଙ୍କ ଉପସ୍ଥାନକୁ ବାଧ୍ୟତାମୂଳକ କରିପାରିବେ ନାହିଁ । ଯେଉଁ ସ୍କୁଲମାନେ ଖୋଲିବାକୁ ଚାହିଁବେ ସେମାନେ ନିଜ ରାଜ୍ୟର ଶିକ୍ଷା ବିଭାଗ ଦ୍ୱାରା ଜାରି ଏସଓପି ପାଳନ କରିବାକୁ ବାଧ୍ୟ ହେବେ ।
ଅକ୍ଟୋବର ୧୫ ପରେ ପରିସ୍ଥିତିକୁ ଦେଖି କେନ୍ଦ୍ର ଶିକ୍ଷା ମନ୍ତ୍ରାଳୟ ଗୃହ ମନ୍ତ୍ରାଳୟ ସହ ପରାମର୍ଶ କରି, ଉଚ୍ଚ ଶିକ୍ଷାନୁଷ୍ଠାନଗୁଡ଼ିକ ଖୋଲିବା ସମ୍ପର୍କରେ ନିଷ୍ପତ୍ତି ନେଇପାରିବ । ତେବେ ଅନଲାଇନ ଶିକ୍ଷାଦାନ ଉପରେ ଗୁରୁତ୍ୱ ବଜାୟ ରଖିବାକୁ କେନ୍ଦ୍ର ସରକାର ପରାମର୍ଶ ଦେଇଛନ୍ତି । ବିଜ୍ଞାନରେ ପିଏଚଡି କରୁଥିବା ଛାତ୍ରଛାତ୍ରୀ, ଯେଉଁମାନଙ୍କ ପାଇଁ ବିଜ୍ଞାନାଗାର ଗବେଷଣା ଜରୁରୀ ସେମାନଙ୍କୁ ୧୫ ତାରିଖ ପରେ ଅନୁମତି ଦିଆଯିବ ।