ଭଉଣୀର ବାହାଘର ପାଇଁ ମାଲିକଙ୍କ ପାଖରୁ ୧୪ ଲକ୍ଷ ଟଙ୍କା ଲୁଟିନେଲେ ଯୁବକ

ନୂଆଦିଲ୍ଲୀ: ଦିଲ୍ଲୀ ପୁଲିସ ଜଣେ ୨୦ ବର୍ଷ ବୟସ୍କ ଯୁବକ ଏବଂ ତାଙ୍କ ତିନି ସହଯୋଗୀଙ୍କୁ ଗିରଫ କରିଛି ଯେଉଁମାନେ ତାଙ୍କ ମାଲିକଙ୍କ ପାଖରୁ ଲୁଟ କରିଥିଲେ | ପଚରାଉଚରା ବେଳେ ଅଭିଯୁକ୍ତ ଯୁବକ କହିଛନ୍ତି ଯେ ସେ ତାଙ୍କ ଭଉଣୀଙ୍କ ବିବାହ ସହ ପିତାଙ୍କ ଋଣ ପରିଶୋଧ କରିବାକୁ ପାଇଁ ୧୪.୫ ଲକ୍ଷ ଟଙ୍କା ଲୁଟିବାକୁ ଯୋଜନା କରିଥିଲେ । ଡେପୁଟି ପୁଲିସ କମିଶନର (ଉତ୍ତର-ପଶ୍ଚିମ) ଜିତେନ୍ଦ୍ର କୁମାର ମୀନା କହିଛନ୍ତି ଯେ ଶନିବାର ଦିନ ଅଭିଯୋଗକାରୀ ନମନ ଏବଂ ତାଙ୍କ ଡ୍ରାଇଭର ଗୌତମ ହାଇଦରପୁର ଯାଉଥିଲେ ଏବଂ ଏକ ବ୍ୟାଗରେ ୧୪.୫ ଲକ୍ଷ ଟଙ୍କା ନେଇଥିଲେ। ଏହି ସମୟ ସେମାନଙ୍କ ଗାଡି ଏକ ମୋଟରସାଇକେଲ ସହ ଧକ୍କା ହୋଇଥିଲା।

ମୋଟରସାଇକେଲ ଚଲାଉଥିବା ଲୋକମାନେ ନମନଙ୍କ ସହ ଯୁକ୍ତିତର୍କ ଆରମ୍ଭ କରିଥିଲେ। ପାଟିତୁଣ୍ଡ ସମୟରେ ଦୁଇ ଅଭିଯୁକ୍ତ ଟଙ୍କା ବ୍ୟାଗ ଚୋରି କରି ଘଟଣାସ୍ଥଳରୁ ଫେରାର ହୋଇଯାଇଥିଲେ । ନମନଙ୍କ ଅଭିଯୋଗ ଉପରେ ଏକ ମାମଲା ରୁଜୁ ହୋଇଥିଲା ଏବଂ ତଦନ୍ତ ଆରମ୍ଭ ହୋଇଥିଲା। ପୁଲିସ ଉକ୍ତ ଅଞ୍ଚଳର ସିସିଟିଭି ଫୁଟେଜ ଯାଞ୍ଚ କରିଥିଲା ​​କିନ୍ତୁ ଅଭିଯୁକ୍ତଙ୍କ ପରିଚୟ ମିଳିପାରିନଥିଲା। ଏହି ମାମଲାରେ ଗୌତମଙ୍କ ସମ୍ପୃକ୍ତି ନେଇ ସନ୍ଦେହ କରିଥିଲା। ଏହା ପରେ ଯେତେବେଳେ ପୁଲିସ ଗୌତମଙ୍କୁ ପଚରାଉଚରା କରିଥିଲା, ସେତେବେଳେ ସେ ତାଙ୍କ ସହଯୋଗୀମାନଙ୍କ ସହ ଏହି ଅପରାଧ କରିଥିବା ସ୍ୱୀକାର କରିଥିଲେ। ପୁଲିସ ଅନ୍ୟ ୩ ଅଭିଯୁକ୍ତଙ୍କୁ ମଧ୍ୟ ଗିରଫ କରିଛି। ଅଧିକାରୀ କହିଛନ୍ତି ଯେ ସେମାନଙ୍କ ନିକଟରୁ ୧୧.୫୬ ଲକ୍ଷ ଟଙ୍କା ଏବଂ ଦୁଇଟି ମୋଟରସାଇକେଲ ଜବତ କରାଯାଇଥିଲା। ଗୌତମ କହିଥିଲେ ଯେ ତାଙ୍କ ପରିବାର ଆର୍ଥିକ ସଙ୍କଟର ସମ୍ମୁଖୀନ ହେଉଛନ୍ତି, ତେଣୁ ସେ ଅପରାଧର ରାସ୍ତା ଆପଣେଇଥିଲେ |