୨୦୫୦ ମସିହା ସୁଦ୍ଧା ପ୍ରତି ୪ ଜଣରୁ ଜଣଙ୍କର ଶ୍ରବଣ ସମସ୍ୟା ଦେଖାଦେବ: ହୁ
ନୂଆଦିଲ୍ଳୀ: ୨୦୫୦ ମସିହା ସୁଦ୍ଧା ପ୍ରତି ୪ ଜଣରୁ ଜଣଙ୍କର ଶ୍ରବଣ ସମସ୍ୟା ଉପୁଜିବ ବୋଲି ନିକଟରେ ଏକ ଗବେଷଣାରୁ ମଙ୍ଗଳବାର ଏପରି ଭାବେ ଚେତାଇ ଦେଇଛି ବିଶ୍ବ ସ୍ବାସ୍ଥ୍ୟ ସଂଗଠନ(ହୁ)। ଏହାର ସମାଧାନ ପାଇଁ ନିରାକରଣ ଏବଂ ଚିକିତ୍ସାରେ ଅତିରିକ୍ତ ପୁଞ୍ଜି ବିନିଯୋଗ କରିବାକୁ ହୁ ପକ୍ଷରୁ କୁହାଯାଇଛି।
Sambad is now on WhatsApp
Join and get latest news updates delivered to you via WhatsApp
ହୁ ପକ୍ଷରୁ ପ୍ରକାଶ ପାଇଥିବା ରିପୋର୍ଟରେ ଆହୁରି ବି କୁହାଯାଇଛି ଯେ ସଂକ୍ରମଣ, ରୋଗ, ଜନ୍ମ ଦୋଷ, ଶବ୍ଦ ପ୍ରଦୂଷଣ, ଜୀବନଶୈଳୀ ଏହି ଶ୍ରବଣ ସମସ୍ୟା ଉପୁଜାଇବାର ଗୋଟାଏ ଗୋଟାଏ କାରଣ ବନିବେ।
ଏହି ସମସ୍ୟା ପାଇଁ ପ୍ରତିବର୍ଷ ଜଣେ ଲୋକ ପିଛା ଅତି କମ୍ରେ ୧.୩୩ ଡଲାର ଖର୍ଚ୍ଚ ହେବ ବୋଲି ସୂଚନା ରହିଛି। ଏଥିପାଇଁ ଅତିରିକ୍ତ ପୁଞ୍ଜିର ଆବଶ୍ୟକତା ରହିଛି। ଶ୍ରବଣ ସମସ୍ୟା ଉପୁଜିଲେ ଯୋଗାଯୋଗ, ଶିକ୍ଷା, ଚାକିରି ଆଦି ପ୍ରଭାବିତ ହେବ। ଫଳରେ ଆର୍ଥିକ ସମସ୍ୟା ଉପୁଜିବା ସ୍ପଷ୍ଟ ହୋଇଯାଉଛି ବୋଲି ସ୍ବାସ୍ଥ୍ୟ ସଂଗଠନ ପକ୍ଷରୁ କୁହାଯାଇଛି।
ଆପଣଙ୍କ ସୂଚନା ସକାଶେ ଜଣାଇ ଦେଉଛୁ ଯେ ଏବେ ବିଶ୍ବରେ ପ୍ରତି ୫ ଜଣଙ୍କ ମଧ୍ୟରୁ ଜଣଙ୍କର ଶ୍ରବଣ ସମସ୍ୟା ରହିଛି। ଆସନ୍ତା ତିନି ଦଶନ୍ଧି ମଧ୍ୟରେ ଶ୍ରବଣ ଶକ୍ତି ହ୍ରାସ ପାଇଥିବା ଲୋକଙ୍କ ସଂଖ୍ୟା ୧.୫ ଗୁଣରୁ ଅଧିକ ହୋଇପାରେ ବୋଲି ଆଶଙ୍କା କରାଯାଉଛି।
ଶ୍ରବଣ ସମସ୍ୟାରେ ଏକ ପ୍ରମୁଖ କାରଣ ହେଉଛି ଯତ୍ନର ଅଭାବ, ଯାହା ସ୍ୱଳ୍ପ ଆୟକାରୀ ଦେଶରେ ବିଶେଷ ଭାବରେ ଦେଖିବାକୁ ମିଳେ। ଏପରିକି ଉନ୍ନତ ସୁବିଧା ଥିବା ଧନୀ ଦେଶମାନଙ୍କରେ ମଧ୍ୟ ଯତ୍ନ ନେବାରେ ଅବହେଳା ଦେଖିବାକୁ ମିଳିଛି ବୋଲି ହୁ ପକ୍ଷରୁ କୁହାଯାଇଛି।