ସୀମାରୁ ଗୋଟିଏ ସମସ୍ୟା କମ ହେଲା : ଲଦାଖରେ ସୈନ୍ୟ ପ୍ରତ୍ୟାହାର ସଂପର୍କରେ ଜୟଶଙ୍କରଙ୍କ ପ୍ରତିକ୍ରିୟା
ନୂଆଦିଲ୍ଲୀ : ଲଦାଖର ଗୋଗ୍ରା-ହଟସ୍ପ୍ରିଙ୍ଗସ୍ଥିତ ପାଟ୍ରୋଲ ପଏଣ୍ଟ-୧୫ରୁ ଭାରତ ଓ ଚୀନ ସୈନ୍ୟ ପ୍ରତ୍ୟାହାର କରିବା ସଂପର୍କରେ ନିଜର ପ୍ରତିକ୍ରିୟା ରଖିଛନ୍ତି କେନ୍ଦ୍ର ବୈଦେଶିକ ବ୍ୟାପାର ମନ୍ତ୍ରୀ ଏସ.ଜୟଶଙ୍କର । ସେ କହିଛନ୍ତି ଯେ, ସୀମାରୁ ଗୋଟିଏ ସମସ୍ୟା କମିଗଲା ।
Sambad is now on WhatsApp
Join and get latest news updates delivered to you via WhatsApp
ଫ୍ରାନ୍ସର ବିଦେଶ ମନ୍ତ୍ରୀ କ୍ୟାଥେରିନ କଲୋନାଙ୍କ ସହ ବୈଠକ ପରେ ଏକ ମିଳିତ ସାମ୍ବାଦିକ ସମ୍ମିଳନୀକୁ ସମ୍ବୋଧିତ କରିବା ବେଳେ ସେ ଏକଥା କହିଥିଲେ । ଏହି ସାମ୍ବାଦିକ ସମ୍ମିଳନୀରେ ଅନ୍ୟ କେତେକ ପ୍ରସଙ୍ଗ ଯେପରିକି ଇଣ୍ଡୋ-ପାସିଫିକ୍, ୟୁକ୍ରେନ ଯୁଦ୍ଧ, ଆଫଗାନିସ୍ତାନ ଆଦି ପ୍ରସଙ୍ଗରେ ବି ମତ ରଖିଥିଲେ । ସେ ଆହୁରି ମଧ୍ୟ କହିଥିଲେ ଯେ ଅନ୍ତର୍ଜାତୀୟ ମଞ୍ଚରେ ଫ୍ରାନ୍ସ ସବୁବେଳେ ଭାରତର ଚିନ୍ତା ଓ ସ୍ବାର୍ଥକୁ ଗୁରୁତ୍ବ ଦେଇଆସିଛି ।
ସୂଚନାଯୋଗ୍ୟ ଯେ ଭାରତ ଓ ଚୀନ ସେନା ମଧ୍ୟରେ ହୋଇଥିବା ସହମତି ଅନୁସାରେ ଗତ ୮ ତାରିଖରୁ ଏହି ସୈନ୍ୟ ପ୍ରତ୍ୟାହାର ଆରମ୍ଭ ହୋଇଥିଲା ଓ ୧୨ ତାରିଖରେ ଶେଷ ହୋଇଥିଲା । ମଙ୍ଗଳବାରଦିନ ଉଭୟ ଦେଶର ସେନା ପକ୍ଷରୁ ପରସ୍ପରର ସୈନ୍ୟ ପ୍ରତ୍ୟାହାରର ପର୍ଯ୍ୟବେକ୍ଷଣ କରାଯାଇଥିଲା । ଏହା ସହିତ ସୈନ୍ୟପ୍ରତ୍ୟାହାର ପ୍ରକ୍ରିୟା ସଂପୂର୍ଣ୍ଣ ହୋଇଥିଲା । ଗତ ୨୦୨୦ ଜୁନ ମାସରେ ଲଦାଖର ଗଲଓ୍ବାନ ଉପତ୍ୟାକାରେ ଭାରତ ଓ ଚୀନ ମଧ୍ୟରେ ସଂଘର୍ଷ ହେବା ପରେ ଉଭୟ ଦେଶର ସେନା ଲଦାଖର ବିଭିନ୍ନ ଅଂଚଳରେ ଆମନା ସାମନା ରହିଥିଲେ ।