ଡ୍ୟୁଟିକୁ ନ ଆସି ଧାରଣା ଦେଉଥିବା ୧ହଜାର ସ୍ୱାସ୍ଥ୍ୟ କର୍ମୀଙ୍କୁ ଚାକିରିରୁ ହଟାଇବାକୁ ନିର୍ଦ୍ଦେଶ
ଚଣ୍ଡୀଗଡ଼: କୋଭିଡ ମହାମାରୀ ସମୟରେ ଡାକ୍ତର ଓ ସ୍ୱାସ୍ଥ୍ୟ କର୍ମୀଙ୍କର ସବୁଠାରୁ ଅଧିକ ଦାୟିତ୍ୱ ରହୁଛି | ତେବେ ମେଡିକାଲମାନଙ୍କରେ ରୋଗୀଙ୍କର ସେବା କରିବା ପାଇଁ ନିୟୋଜିତ ସ୍ୱାସ୍ଥ୍ୟ କର୍ମୀମାନେ ଡ୍ୟୁଟିରେ ଯୋଗ ଦେଇନଥିବାରୁ ଏବେ ସେମାନଙ୍କ ଉପରେ ବଡ କାର୍ଯ୍ୟାନୁଷ୍ଠାନ ନେବାକୁ ଯାଉଛନ୍ତି ପଞ୍ଜାବ ସରକାର | ଆଉ କାର୍ଯ୍ୟାନୁଷ୍ଠାନ ସ୍ୱରୂପ ପ୍ରାୟ ୧ ହଜାର ସ୍ୱାସ୍ଥ୍ୟକର୍ମୀଙ୍କୁ ଚାକିରିରୁ ହଟାଇ ସେମାନଙ୍କ ବଦଳରେ ନୂଆ ନିଯୁକ୍ତି କରିବାକୁ ନିର୍ଦ୍ଦେଶନାମା ଜାରି କରାଯାଇଛି |
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ମୁତାବକ ସ୍ଥାୟୀ ନିଯୁକ୍ତି ଦାବିରେ ପଞ୍ଜାବରେ ଜାତୀୟ ସ୍ୱାସ୍ଥ୍ୟ ମିଶନ ଅଧୀନରେ ନିୟୋଜିତ ସ୍ୱାସ୍ଥ୍ୟକର୍ମୀମାନେ ଧାରଣାରେ ବସିଥିଲେ | ତେବେ ପଞ୍ଜାବ ସରକାରଙ୍କ ପକ୍ଷରୁ ସେମାନଙ୍କ ଦାବିକୁ ବିଚାର କରାଯିବ ବୋଲି ପ୍ରତିଶୃତି ଦିଆଯାଇଥିଲା | ଆଉ ସ୍ୱାସ୍ଥ୍ୟ କର୍ମୀମାନେ ଧାରଣାରୁ ଓହରିଥିଲେ ବି ଡ୍ୟୁଟିରେ ଯୋଗ ଦେଇନଥିଲେ | ଆଉ ଏହି ଘଟଣାକୁ ନେଇ ରାଜ୍ୟ ସ୍ୱାସ୍ଥ୍ୟ ମନ୍ତ୍ରୀ ବଲବୀର ସିଧୁ ଚେତାଇଦେଇଥିଲେ ଯେ ଡ୍ୟୁଟିରେ ଯୋଗ ନ ଦେଲେ କାର୍ଯ୍ୟାନୁଷ୍ଠାନ ନିଆଯିବ | ଆଉ ଏହି ଘଟଣାକୁ ନେଇ ଜାତୀୟ ସ୍ୱାସ୍ଥ୍ୟ ମିଶନ (ଏନ୍ଏଚ୍ଏମ୍) ର ପରିଚାଳନା ନିର୍ଦ୍ଦେଶକ କୁମାର ରାହୁଲ ସମସ୍ତ ଡେପୁଟି କମିଶନରଙ୍କୁ ଏକ ଚିଠି ଲେଖି କହିଛନ୍ତି ଯେ ଡ୍ୟୁଟିରେ ନଥିବା କର୍ମଚାରୀଙ୍କୁ ଛଟେଇ କରାଯାଉ।
ଏହିପରି କର୍ମଚାରୀଙ୍କ ସଂଖ୍ୟା ପ୍ରାୟ ୧ ହଜାର ବୋଲି ଆକଳନ କରାଯାଇଥିବାବେଳେ ଡେପୁଟି କମିଶନରଙ୍କୁ ଏହି କର୍ମଚାରୀଙ୍କ ବଦଳରେ ନୂତନ କର୍ମଚାରୀ ନିଯୁକ୍ତି କରିବାକୁ କୁହାଯାଇଛି | ଏଥିସହ କରୋନା ମାମଲା ବୃଦ୍ଧି ପାଉଥିବାରୁ ଆବଶ୍ୟକତା ଅନୁଯାୟୀ ଅତିରିକ୍ତ କର୍ମଚାରୀ ମଧ୍ୟ ନିଯୁକ୍ତି କରାଯାଇପାରିବ ବୋଲି ଚିଠିରେ ଦର୍ଶାଯାଇଛି। ସେମାନଙ୍କୁ ପ୍ରତିଦିନ ୧୦୦୦ ଟଙ୍କା ଦିଆଯିବ | ସୂଚନା ଥାଉ କି ଯେ କରୋନା ମହାମାରୀ ସମୟରେ ଜାତୀୟ ସ୍ୱାସ୍ଥ୍ୟ ମିଶନର ସ୍ୱାସ୍ଥ୍ୟ କର୍ମୀଙ୍କ ସହ ୭୭୬ଜଣ କମ୍ୟୁନିଟି ହେଲଥ୍ ଅଫିସର (ସିଓଏ) ଧାରଣାରେ ବସିଥିଲେ | ଆଉ ଏଥିଯୋଗୁଁ ପଞ୍ଜାବର ଡାକ୍ତରଖାନାମାନଙ୍କରେ ଅସମ୍ଭାଳ ପରିସ୍ଥିତି ସୃଷ୍ଟି ହୋଇଥିଲା |