ନୂଆଦିଲ୍ଲୀ: ଆଜିଠାରୁ ଠିକ୍ ଗୋଟିଏ ବର୍ଷ ପୂର୍ବରୁ ନିର୍ଭୟା ଦୁଷ୍କର୍ମ ମାମଲାରେ ୪ ଅଭିଯୁକ୍ତଙ୍କୁ ଫାଶୀଖୁଣ୍ଟରେ ଝୁଲାଇ ଦିଆ ଯାଇଥିଲା । ୨୦୨୦ ମାର୍ଚ୍ଚ ୨୦ ଦିନ ନିର୍ଭୟା ଦୁଷ୍କର୍ମ ଓ ହତ୍ୟାକାରୀ ଅକ୍ଷୟ ଠାକୁର (୩୧), ପୱନ ଗୁପ୍ତା (୨୫), ବିନୟ ଶର୍ମା(୨୬) ଓ ମୁକେଶ ସିଂ (୩୨) ଫାଶୀରେ ଝୁଲିଥିଲେ । ଏହି ୪ ଜଣଙ୍କୁ ଦିଲ୍ଲୀର ତିହାର ଜେଲରେ ଭୋର ସମୟରେ ଫାଶୀଖୁଣ୍ଟରେ ଝୁଲାଇ ଦିଆ ଯାଇଥିଲା। ଫାଶୀର ଠିକ୍ ଘଣ୍ଟାଏ ପୂର୍ବରୁ ଅଭିଯୁକ୍ତମାନଙ୍କର କ୍ଷମା ଆବେଦନକୁ ଖାରଜ କରିଥିଲେ ସୁପ୍ରିମକୋର୍ଟ । ଏହି ଫାଶୀଦଣ୍ଡକୁ ନେଇ ସାରା ଦେଶରୁ ସମର୍ଥନ ମିଳିଥିଲା।
Sambad is now on WhatsApp
Join and get latest news updates delivered to you via WhatsApp
କ’ଣ ସେମାନଙ୍କୁ ଫାଶୀଦଣ୍ଡରେ ଦଣ୍ଡିତ କରିବା ପରେ ଭାରତୀୟ ପୁରୁଷମାନଙ୍କ ମନରେ ମହିଳା ମାନଙ୍କ ପ୍ରତି ଥିବା ଦୁଷ୍କର୍ମ ମନୋଭାବକୁ ରୋକାଯାଇ ପାରିଲା କି ? ଦେଶରେ ଘଟୁଥିବା ବଳାତ୍କାର, ମହିଳାମାନଙ୍କ ପ୍ରତି ଅମାନୁଷିକ ଅତ୍ୟାଚାର ରେକର୍ଡ ଦେଖିଲେ ଏଭଳି ଫାଶୀଦଣ୍ଡ ଯେ ମହିଳା ହିଂସାକୁ ରୋକିବାରେ ସମର୍ଥ ହୋଇଛି ବୋଲି କହିହେବନାହିଁ । ହେଲେ କ’ଣ ଆମ ଆଇନ ଦୁଷ୍କର୍ମ ଭଳି ପାଶବିକ କାର୍ଯ୍ୟ କରୁଥିବା ଅପରାଧୀଙ୍କୁ ଦଣ୍ଡିତ ନକରି ଛାଡି ଦେଇ ପାରିବ କି ? ଏହାର ଉତ୍ତର ହେବ ନା। କାରଣ ଦୋଷୀକୁ ଦଣ୍ଡ ମିଳିବା ବିଧେୟ।
ହେଲେ ମୃତ୍ୟୁଦଣ୍ଡକୁ ନେଇ ନେଇ ସାରା ବିଶ୍ୱରେ ବି ବିତର୍କ ଚାଲୁ ରହିଛି । କିଛି ବୁଦ୍ଧିଜୀବୀ ମୃତ୍ୟୁଦଣ୍ଡ ବିରୋଧରେ ମତ ରଖୁ ଥିବା ବେଳେ କିଛି ଏହାକୁ ସମର୍ଥନ କରୁଛନ୍ତି । ଏ ନେଇ କିଛି ଦେଶ ବି ସେମାନଙ୍କ ସମ୍ବିଧାନରୁ ମୃତ୍ୟୁଦଣ୍ଡକୁ ବାଦ ଦେଇ ସାରିଛନ୍ତି । କିନ୍ତୁ ନିର୍ଭୟା ମାମଲାରେ ଅଭିଯୁକ୍ତମାନଙ୍କୁ ଏଭଳି ଦଣ୍ଡ ମିଳିବା ପରେ ‘ଜଷ୍ଟିସ ଫର ନିର୍ଭୟା’ ନାମରେ ଚାଲିଥିବା ଆନ୍ଦୋଳନକୁ ରୋକାଯାଇ ପାରିବା ସହ ଦୁଷ୍କର୍ମ ଭଳି ଅସଭ୍ୟ, ଅସାମାଜିକ ଓ କ୍ରୁରତା ମନୋଭାବ ରଖୁଥିବା ପୁରୁଷମାନଙ୍କ ମନରେ ଆଇନ ପ୍ରତିଥିବା ଭ୍ରାନ୍ତ ଧାରଣା ଦୂର ହୋଇ ପାରିଛି। ତୁମେ ଅନ୍ୟପ୍ରତି କ୍ରୁର ହେଲେ ଆଇନ ଯେ ତୁମ ପ୍ରତି କ୍ରୁର ହେବ ତାହା ନିର୍ଭୟା ମାମଲାରେ କୋର୍ଟ ପ୍ରମାଣ କରିଦେଇଛି।