ମୋ ବିଜୟକୁ କେବଳ ଭଗବାନ ଅଟକାଇ ପାରିବେ: ଜୋ ବାଇଡେନ

ୱାଶିଂଟନ: ଚଳିତ ବର୍ଷ ନଭେମ୍ବର ୫ରେ ଆମେରିକାରେ ରାଷ୍ଟ୍ରପତି ନିର୍ବାଚନ ଅନୁଷ୍ଠିତ ହେବାକୁ ଯାଉଛି। ଏହି ସମୟରେ ଆମେରିକାର ରାଷ୍ଟ୍ରପତି ଜୋ ବାଇଡେନଙ୍କ ଏକ ବିବୃତ୍ତି ବାହାରିଛି ଯେଉଁଥିରେ ସେ ସ୍ୱୀକାର କରିଛନ୍ତି ଯେ ଟିଭି ବିତର୍କ ପୂର୍ବରୁ ତାଙ୍କର ଦେହ ଖରାପ ଥିଲା। ସେ ଥକି ଯାଇଥିଲେ ଏବଂ ଅସୁସ୍ଥ ଥିଲେ। ତେଣୁ ମୁଁ ରାଷ୍ଟ୍ରପତି ଦୌଡ଼ରେ ପ୍ରତିଦ୍ୱନ୍ଦ୍ୱୀ ଡୋନାଲ୍ଡ ଟ୍ରମ୍ପଙ୍କଠାରୁ ବିତର୍କରେ ପଛରେ ପଡ଼ିଯାଇଥିଲି। ବିତର୍କରେ ଟ୍ରମ୍ପ ତାଙ୍କର ଅନେକ ପଏଣ୍ଟକୁ ପରିହାସ କରୁଥିବା ଦେଖିବାକୁ ମିଳିଥିଲା। ଏପରିକି ଟ୍ରମ୍ପ କହିଥିଲେ ଯେ ବାଇଡେନ କ’ଣ କହୁଛନ୍ତି ତାହା ନିଜେ ଜାଣନ୍ତି ନାହିଁ।

ଟିଭି ବିତର୍କ ପରେ ବାଇଡେନଙ୍କୁ ପ୍ରାର୍ଥୀ ଭାବେ ବଦଳାଇବାକୁ ଦାବି ଦଳ ଭିତରେ ବୃଦ୍ଧି ପାଇବାରେ ଲାଗିଥିଲା। ବର୍ତ୍ତମାନ ସେ ତାଙ୍କ ପକ୍ଷ ଉପସ୍ଥାପନ କରିଛନ୍ତି। ଆମେରିକାର ରାଷ୍ଟ୍ରପତି ଜୋ ବାଇଡେନ କହିଛନ୍ତି ଯେ ନଭେମ୍ବର ୫ରେ ହେବାକୁ ଥିବା ନିର୍ବାଚନରେ ​​କେବଳ ଭଗବାନ ତାଙ୍କ ବିଜୟକୁ ଅଟକାଇ ପାରିବେ। ଏକ ଟିଭି ସାକ୍ଷାତକାରରେ ବାଇଡେନ ଏହା କହିଛନ୍ତି।

ଗତ ସପ୍ତାହରେ ଜୁନ୍ ୨୭ ରେ ଟ୍ରମ୍ପଙ୍କ ସହ ବିତର୍କରେ ବାଇଡେନଙ୍କ ପ୍ରଦର୍ଶନ ଭଲ ନ ଥିଲା। ଫଳାଫଳ ହେଲା ଯେ ତାଙ୍କ ଦଳର ନେତାମାନେ ତାଙ୍କୁ ଇସ୍ତଫା ଦେବାକୁ ଅପିଲ୍ କରିଥିଲେ। ଦଳର ନେତାଙ୍କ ଆବେଦନ ଥିଲା ବାଇଡେନ ରାଷ୍ଟ୍ରପତି ନିର୍ବାଚନ ଦୌଡ଼ରୁ ତାଙ୍କ ନାମ ପ୍ରତ୍ୟାହାର କରିବା ଉଚିତ୍ ଏବଂ ତାଙ୍କ ସ୍ଥାନରେ ଦଳର ଅନ୍ୟ କେହି ପ୍ରାର୍ଥୀପତ୍ର ଭାବେ ଦାଖଲ କରିବା ଉଚିତ।

ତେବେ ବାଇଡେନ କହିଛନ୍ତି, ଏହା ଏକ ଖରାପ ଘଟଣା ଥିଲା। ଗୁରୁତର କିଛି ନୁହେଁ। ମୁଁ ଥକି ଯାଇଥିଲି। ସେ ସାକ୍ଷାତକାରରେ କହିଛନ୍ତି ତାଙ୍କ ଦଳର ଶୀର୍ଷ ନେତୃତ୍ୱ ତାଙ୍କୁ ରାଷ୍ଟ୍ରପତି ‌ଦୌଡ଼ରେ ରହିବାକୁ କହିଛନ୍ତି। ଜୋ ବାଇଡେନ କହିଛନ୍ତି, ମୁଁ ବହୁତ ଅସୁସ୍ଥ ଥିଲି। କିଛି ଭଲ ଲାଗୁ ନ ଲା। ଡାକ୍ତରମାନେ ମଧ୍ୟ ମୋ ସହ ଅଛନ୍ତି। ବାଇଡେନ କହିଛନ୍ତି ଡାକ୍ତରଙ୍କ ସହ କଥା ହେବା ପରେ ସେ କୋଭିଡ ପରୀକ୍ଷା ମଧ୍ୟ କରିଛନ୍ତି କିନ୍ତୁ ତାଙ୍କଠାରେ କୋଭିଡ ଚିହ୍ନଟ ହୋଇ ନାହିଁ। ସେ ଥଣ୍ଡା ଅନୁଭବ କରିଥିଲେ ଏବଂ ଏହା ଦ୍ୱାରା ସେ ଅସୁବିଧାରେ ପଡ଼ିଥିଲେ ।

ଜୋ ବାଇଡେନ କହିଛନ୍ତି ଡେମୋକ୍ରାଟିକ୍ ଦଳର କୌଣସି ପ୍ରମୁଖ ନେତା ତାଙ୍କୁ ଦୌଡ଼ରୁ ଓହରିଯିବାକୁ କହି ନାହାନ୍ତି। ଯଦି କେବଳ ସର୍ବଶକ୍ତିମାନ୍ ଭଗବାନ ତାଙ୍କୁ ଏହା କରିବାକୁ କୁହନ୍ତି ତେବେ ସେ ଦୌଡ଼ ଓହରି ଯିବେ ବୋଲି କହିଥିଲେ। ବାଇଡେନ କହିଛନ୍ତି, ଯଦି ସର୍ବଶକ୍ତିମାନ୍ ପରମେଶ୍ୱର ଓହ୍ଲାଇ କହିବେ ଯେ ତୁମେ ଦୌଡ଼ରୁ ବାହାରି ଯାଅ, ମୁଁ ଦୌଡ଼ରୁ ବାହାରି ଯିବି। କିନ୍ତୁ ଭଗବାନ ତଳକୁ ଆସୁ ନାହାନ୍ତି ବୋଲି ବାଇଡେନ କହିଛନ୍ତି। ତେବେ ରାଷ୍ଟ୍ରପତି ବାଇଡେନ ତାଙ୍କ ମାନସିକ ସୁସ୍ଥତା ଉପରେ ପଚରାଯାଇଥିବା ପ୍ରଶ୍ନକୁ ଏଡ଼ାଇବାକୁ ଚେଷ୍ଟା କରୁଥିବା ଜଣାପଡିଛି।