ନୂଆଦିଲ୍ଲୀ: ପହଲଗାମ ଆତଙ୍କବାଦୀ ଆକ୍ରମଣର ପ୍ରତିଶୋଧ ନେବା ପାଇଁ ଚଳିତମାସ ୭ ତାରିଖରେ ଭାରତୀୟ ସେନା ପକ୍ଷରୁ ଆରମ୍ଭ ହୋଇଥିଲା ଅପରେସନ୍‌ ‘ସିନ୍ଦୂର’। ଏଥିରେ ଭାରତୀୟ ସେନାର ପରାକ୍ରମ ସଂପର୍କରେ ରବିବାର ବିସ୍ତୃତ ସୂଚନା ଦିଆଯାଇଛି। ପାକିସ୍ତାନ ଅଧିକୃତ କାଶ୍ମୀର ଏବଂ ପାକିସ୍ତାନର ପଞ୍ଜାବ ପ୍ରଦେଶରେ ଆତଙ୍କବାଦୀଙ୍କ ଭିତ୍ତିଭୂମି ଉପରେ ଭାରତୀୟ ସେନା ଭୟଙ୍କର ଆକ୍ରମଣ କରିବା ପରେ ଏହା ଯୁଦ୍ଧର ରୂପ ନେଇଥିଲା। ପାକିସ୍ତାନ ସେନା ପକ୍ଷରୁ ସୀମାରେ ଗୁଳିଗୋଳା ମାଡ଼ କରାଯାଇଥିଲା। ଭାରତ ମଧ୍ୟ ଏହାର ପାଲଟା ଜବାବ ଦେଇଥିଲା। ଏଥିଯୋଗୁ ଗତ ୭ ତାରିଖରୁ ୧୦ ତାରିଖ ମଧ୍ୟରେ ପାକିସ୍ତାନ ସେନାର ୩୫ରୁ ୪୦ ଜଣ ଅଧିକାରୀ ଓ ସୈନିକଙ୍କ ମୃତ୍ୟୁ ହୋଇଛି ବୋଲି ଭାରତୀୟ ସେନାର ୩ ବାହିନୀ ପକ୍ଷରୁ ଆୟୋଜିତ ମିଳିତ ସାମ୍ବାଦିକ ସମ୍ମିଳନୀରେ କୁହାଯାଇଛି। 

Advertisment

ସେନାର ବରିଷ୍ଠ ଅଧିକାରୀମାନଙ୍କ ସୂଚନା ଅନୁଯାୟୀ ଭାରତ ପକ୍ଷରୁ ପାକିସ୍ତାନର ୱେଷ୍ଟର୍ଣ୍ଣ ଫ୍ରଣ୍ଟ୍‌ରେ ଆକ୍ରମଣ କରାଯାଇଥିଲା। ଏଥିରେ ପାକିସ୍ତାନର ଏଫ୍‌-୧୬ ବିମାନଘାଟି, ତାଲିମ କେନ୍ଦ୍ର, ପ୍ରତିରକ୍ଷା ୟୁନିଟ୍ ଏବଂ କମାଣ୍ଡ୍‌ ହବ୍‌ ଆଦିକୁ ସଫଳତାର ସହ ନଷ୍ଟ କରାଯାଇଛି। ସାମ୍ବାଦିକ ସମ୍ମିଳନୀରେ ଲେଫ୍ଟନାଣ୍ଟ ଜେନେରାଲ ରାଜୀବ ଘାଇ କହିଛନ୍ତି, ଭାରତୀୟ ଗୁଇନ୍ଦା ପକ୍ଷରୁ ପାକିସ୍ତାନର ପଞ୍ଜାବ ଏବଂ ପାକିସ୍ତାନ ଅଧିକୃତ ଜମ୍ମୁ କାଶ୍ମୀରରେ ୯ଟି ଆତଙ୍କବାଦୀ ଶିବିରକୁ ଚିହ୍ନଟ କରାଯାଇଥିଲା। ସେଗୁଡ଼ିକ ମଧ୍ୟରେ ମୁରିଦକେଠାରେ ଲସ୍କର-ଏ-ତୋଇବାର ଆତଙ୍କବାଦୀ ଶିବିର ରହିଥିଲା। ଏହି ଶିବିରରେ କୁଖ୍ୟାତ ଆତଙ୍କବାଦୀ ଆଜମଲ୍‌ କସାବ ଏବଂ ଡେଭିଡ୍‌ ହେଡ୍‌ଲି ଆଦିଙ୍କୁ ତାଲିମ ଦିଆଯାଇଥିଲା। ଅପରେସନ୍‌ ‘ସିନ୍ଦୂର’ରେ ୧୦୦ରୁ ଅଧିକ ଆତଙ୍କବାଦୀଙ୍କୁ ନିହତ କରାଯାଇଛି। ସେମାନଙ୍କ ମଧ୍ୟରେ ୟୁସୁଫ୍‌ ଆଜହର, ଅବଦୁଲ୍‌ ମଲିକ ରୌଫ ଏବଂ ମୁଦାସିର ଅହମଦ ଭଳି କୁଖ୍ୟା‌ତ ଆତଙ୍କବାଦୀ ରହିଛନ୍ତି। ଆଇସି-୮୧୪ କାନ୍ଦାହାର ବିମାନ ଅପହରଣ ଏବଂ ପୁଲୱାମା ଆକ୍ରମଣରେ ଏହି ଆତଙ୍କବାଦୀମାନେ ସାମିଲ ‌ଥିଲେ। 

୧୦୦ ଆତଙ୍କୀ ନିପାତ, ୯ ଶିବିର ଧ୍ବଂସ
ପାକ୍‌ର ୪୦ ସେନା ଅଧିକାରୀ, ସୈନିକ ମୃତ
୩ ବାୟୁ ପ୍ରତିରକ୍ଷା ବ୍ୟବସ୍ଥା, ରାଡାର୍‌ ଧ୍ବସ୍ତ
ଭାରତର ୫ ଯବାନ ସହିଦ

ଏୟାର ମାର୍ସଲ ଏକେ ଭାରତୀ କହିଛନ୍ତି, ଦୁଇ ଦେଶ ମଧ୍ୟରେ ସଂଘର୍ଷ ସମୟରେ ବିଶେଷ କରି ୯ରୁ ୧୦ ତାରିଖ ରାତିରେ ପାକିସ୍ତାନ ତା’ର ସୀମାରେ ବହୁ ଡ୍ରୋନ୍ ଓ ବିମାନ ମୁତୟନ କରିଥିଲା। ଏହାକୁ ଆୟୁଧ କରି ଭାରତର ଏକାଧିକ ସାମରିକ ପ୍ରତିଷ୍ଠାନକୁ ପାକିସ୍ତାନ ଟାର୍ଗେଟ୍‌ କରିଥିଲେ ମଧ୍ୟ ବିଫଳ ହୋଇଥିଲା। ଏଲ୍‌ଓସିରେ ପାକିସ୍ତାନ ଅସ୍ତ୍ରବିରତି ଉଲ୍ଲଂଘନ କରିବାରୁ ଉଭୟ ପକ୍ଷ ମଧ୍ୟରେ ପ୍ରବଳ ଗୁଳିଗୋଳା ମାଡ଼ ହୋଇଥିଲା। ବାହାବଳପୁର ଆତଙ୍କବାଦୀ ଶିବିର ଉପରେ ହୋଇଥିବା ମିସାଇଲ୍‌ ମାଡ଼ର କ୍ଷତି ସଂପର୍କିତ ଭିଡିଓ ଏୟାର ମାର୍ସଲ ଭାରତୀ ସାମ୍ବାଦିକ ସମ୍ମିଳନୀରେ ଦେଖାଇଥିଲେ। ଏୟାର ମାର୍ସଲ ଭାରତୀ କହିଥିଲେ, ମେ ୮ ଓ ୯ ତାରିଖ ରାତିରେ ପାକିସ୍ତାନ ପଟୁ ଭାରତ ବହୁସଂଖ୍ୟାରେ ଡ୍ରୋନ୍‌ ଆକ୍ରମଣର ସାମନା କରିଥିଲା। ଶ୍ରୀନଗରରୁ ଗୁଜରାଟର ନଲିୟା ପର୍ଯ୍ୟନ୍ତ ପାକିସ୍ତାନ ଡ୍ରୋନ୍‌ ଛାଡ଼ିଥିଲା। ଆମେ ପ୍ରସ୍ତୁତ ଥିଲୁ। ଆମର ସର୍ତକତା କାରଣରୁ ପାକିସ୍ତାନ ଲକ୍ଷ୍ୟ ହାସଲରେ ବିଫଳ ହେବା ସହିତ କୌଣସି କ୍ଷତି କରି ପାରିନାହିଁ। ଅନ୍ୟପକ୍ଷରେ ଭାରତର ସେନାବାହିନୀ ଅତ୍ୟନ୍ତ ସର୍ତକତାର ସହିତ ଆକ୍ରମଣ କରିଥିଲା। ସେହି ଆକ୍ରମଣସ୍ଥଳଗୁଡ଼ିକ ମଧ୍ୟରେ ଲାହୋର ଏବଂ ଗୁଜରନୱାଲାର ସର୍ଭେଲାନ୍ସ ରାଡାର୍‌ ଲୋକେସନ୍‌ ରହିଥିଲା। ଡ୍ରୋନ୍‌ ଆକ୍ରମଣ ଜାରି ରହିଥିବାବେଳେ ପାକିସ୍ତାନ ପକ୍ଷରୁ ଲାହୋରରେ ବେସାମରିକ ଏବଂ ଅନ୍ତର୍ଜାତୀୟ ବିମାନର ଉଡ଼ାଣ କରାଯାଇଥିବାରୁ ଏଭଳି ଅସମ୍ବେଦନଶୀଳ କାର୍ଯ୍ୟ ପାଇଁ ଭାରତୀୟ ସେନା ପାକିସ୍ତାନର କଡ଼ା ସମାଲୋଚନା କରିଛି। ଭାରତୀୟ ସେନା ୱେଷ୍ଟର୍ଣ୍ଣ ଫ୍ରଣ୍ଟରେ ପାକିସ୍ତାନ ସେନାର ବିମାନଘାଟି, କମାଣ୍ଡ ସେଣ୍ଟର, ସାମରିକ ଭିତ୍ତିଭୂମି ଏବଂ ବାୟୁ ପ୍ରତିରକ୍ଷା ବ୍ୟବସ୍ଥାକୁ  ଟାର୍ଗେଟ କରିଥିଲା। ଚକଲା, ରାଫିକ୍‌ ଏବଂ ରହିମ ୟାର ଖାନ୍ ସମେତ ସରଗୋଧା, ଭୁଲାରି, ଜାକବାବାଦ ଭଳି ପ୍ରମୁଖ ବିମାନଘାଟି ଉପରେ ଆକ୍ରମଣ କରାଯାଇ ସେଗୁଡ଼ିକୁ ଛାରଖାର କରି ଦିଆଯାଇଛି। ସେ କହିଛନ୍ତି ଯେ ପାକିସ୍ତାନ ଭାରତର ବାୟୁସୀମାକୁ ପ୍ରବେଶ ଉଦ୍ୟମ ସମେତ ଭାରତର ଭିତ୍ତିଭୂମିଗୁଡ଼ିକୁ ଟାର୍ଗେଟ୍‌ କରିଥିଲା। ଭାରୀ ଅସ୍ତ୍ର ସହାୟତାରେ ଭାରତ ଏହାର ଜବାବ ଦେଇଥିଲା। ଏଥିରେ ଅନେକ ମୃତାହତ ହୋଇଥିବା ଅନୁମାନ କରାଯାଉଛି। କିନ୍ତୁ ବର୍ତ୍ତମାନ ସୁଦ୍ଧା ଏହାର ମୂଲ୍ୟାୟନ କରାଯାଇନାହିଁ। 

ଭାଇସ୍‌ ଆଡମିରାଲ ଏଏନ୍‌ ପ୍ରମୋଦ କହିଥିଲେ, କରାଚୀ ବନ୍ଦର ଧ୍ବଂସ ପାଇଁ ନୌସେନା ପ୍ରସ୍ତୁତ ଥିଲା। ପହଲଗାମ ଆତଙ୍କବାଦୀ ଆକ୍ରମଣର ୯୬ ଘଣ୍ଟା ମଧ୍ୟରେ ଭାରତୀୟ ନୌସେନା ଉତ୍ତର ଆରବ ସାଗରରେ ସଂପୂର୍ଣ୍ଣ ପ୍ରସ୍ତୁତ ରହିଥିଲା। ନୌସେନା ସଂପୂର୍ଣ୍ଣ ଭାବେ ଦାୟିତ୍ବପୂର୍ଣ୍ଣ ପଦ‌କ୍ଷେପ ନେଇଛି। ପାକିସ୍ତାନର ଯେକୌଣସି ପ୍ରକାର ଆକ୍ରମଣକୁ ଜବାବ ଦେବା ପାଇଁ ନୌସେନା ଏବେ ବି ପ୍ରସ୍ତୁତ ରହିଛି ବୋଲି ସେ କହିଛନ୍ତି। ଭାରତୀୟ ସେନା ପକ୍ଷରୁ ପାକିସ୍ତାନର କେତୋଟି ଯୁଦ୍ଧବିମାନକୁ ଖସାଇ ଦିଆଯାଇଛି ବୋଲି ଏୟାର ମାର୍ସଲ ଭାରତୀ କହିଛନ୍ତି। ଅନ୍ୟପକ୍ଷରେ ସବୁପ୍ରକାର ଲକ୍ଷ୍ୟ ହାସଲ କରିବା ପରେ ଆମର ପାଇଲଟ୍‌ମାନେ ନିରାପଦ ଭାବେ ଦେଶକୁ ଫେରି ଆସିଛନ୍ତି। ଡିଜିଏମ୍‌ଓ ଲେଫ୍ଟନାଣ୍ଟ ଜେନେରାଲ ଘାଇ ତାଙ୍କ ପାକିସ୍ତାନୀ ପ୍ରତିପକ୍ଷଙ୍କ ନିକଟକୁ ୧୦ ତାରିଖର ଅସ୍ତ୍ରବିରତି ଉଲ୍ଲଂଘନ ସମ୍ପର୍କରେ ହଟ୍‌ଲାଇନ୍‌ରେ ପୂର୍ବରୁ ବାର୍ତ୍ତା ପଠାଇଥିଲେ। ଆଜି ମଧ୍ୟ ଆଉ ଏକ ବାର୍ତ୍ତା ପଠାଇଥିବା ସଂପର୍କରେ ସୂଚନା ଦେଇଥିଲେ। ଅନ୍ୟମାନଙ୍କ ମଧ୍ୟରେ ମେଜର ଜେନେରାଲ ଏସଏସ୍‌ ସାରଦା ସାମ୍ବାଦିକ ସମ୍ମିଳନୀରେ ଉପସ୍ଥିତ ରହି ଭାରତର ସାମରିକ କାର୍ଯ୍ୟାନୁଷ୍ଠାନ ସଂପର୍କରେ ‌ସୂଚନା ଦେଇଥିଲେ।