ଏବେ ଜାରି ରହିଛି ଚୀନ ବିରୋଧରେ ଭାରତୀୟ ସେନାର ‘ଅପରେସନ ସ୍ନୋ ଲିଓପାର୍ଡ’
ଶ୍ରୀନଗର : ଚୀନ ସହ ବିଭିନ୍ନ ପର୍ଯ୍ୟାୟର ଆଲୋଚନା ସତ୍ତ୍ବେ ଏବେ ବି କେତେକ ଅଞ୍ଚଳରେ ଚୀନ ସେନା ପଛକୁ ଫେରିବାର ନାଁ ଧରୁନାହାନ୍ତି । ଏହାକୁ ଦୃଷ୍ଟିରେ ରଖି ଭାରତୀୟ ସେନା ବି ସର୍ବାଧିକ ସତର୍କ ରହିଛି ।
Sambad is now on WhatsApp
Join and get latest news updates delivered to you via WhatsApp
ଭାରତୀୟ ସେନାର ଉତ୍ତରାଞ୍ଚଳ କମାଣ୍ଡର ମୁଖ୍ୟ ବା କମାଣ୍ଡର ଲେପ୍ଟନାଣ୍ଟ ଜେନେରାଲ ଓ୍ବାଇ.କେ.ଜୋଷୀ କହିଛନ୍ତି ଯେ ଅପରେସନ ସ୍ନୋ ଲିଓପାର୍ଟ ଏବେ ବି ଜାରି ରହିଛି । ୨୦୨୦ ଜୁନରେ ଚୀନ ସେନା ସହ ଗଲଓ୍ବାନ ସଂଘର୍ଷ ହେବା ପରେ ଭାରତୀୟ ସେନା ଚୀନ ସୈନ୍ୟଙ୍କ ଅନୁପ୍ରବେଶର ମୁକାବିଲା କରିବାକୁ ଅପରେସନ ସ୍ନୋ ଲିଓପାର୍ଡ ଆରମ୍ଭ କରିଥିଲା । ଗତ ଦୁଇ ବର୍ଷ ମଧ୍ୟରେ ଚୀନ ସହ ଆଲୋଚନା ପରେ କେତେକ ଅଞ୍ଚଳରୁ ଶାନ୍ତିପୂର୍ଣ୍ଣ ଭାବେ ସୈନ୍ୟ ଅପସାରଣ ହୋଇଥିଲା । କିନ୍ତୁ ଏବେ ବି କେତେକ ଅଞ୍ଚଳରେ ଚୀନ ସେନା ରହିଛନ୍ତି । ଏହାକୁ ଦୃଷ୍ଟିରେ ରଖି ଭାରତୀୟ ସେନା ବି ଏଲଏସିର ବିଭିନ୍ନ ବରଫାବୃତ୍ତ ଅଞ୍ଚଳରେ ସତର୍କ ରହିଛି ଓ ଚୀନ ଗତିବିଧି ଉପରେ ନଜର ରଖିଛି । ଶ୍ରୀନଗରଠାରେ ଥିବା ଉତ୍ତରାଞ୍ଚଳ କମାଣ୍ଡର ଇନଭେଷ୍ଟିଚର ସମାରୋହରେ ଯୋଗ ଦେଇ ସେ ଏକଥା କହିଛନ୍ତି ।
ସେ କହିଛନ୍ତି ଯେ ଶତ୍ରୁପକ୍ଷର ଷଡ଼ଯନ୍ତ୍ରକୁ ଭାରତୀୟ ସେନା ସଫଳତାର ସହ ମୁକାବିଲା କରିଚାଲିଛି । ସେ ଆହୁରି ମଧ୍ୟ କହିଛନ୍ତି ଯେ ଜମ୍ମୁ ଓ କଶ୍ମୀର ଲୋକ ଆତଙ୍କବାଦକୁ ପସନ୍ଦ କରୁନାହାନ୍ତି । ଏଥିପାଇଁ ଗତ ବର୍ଷ ଆତଙ୍କବାଦୀ କାର୍ଯ୍ୟକଳାପ ସଂଖ୍ୟା ହ୍ରାସ ପାଇଛି ।