ନିର୍ବାଚିତ ୧୭୦୦ରୁ ଅଧିକ ସାଂସଦ ଓ ବିଧାୟକଙ୍କ ବିରୋଧରେ ରହିଛି ୩,୦୪୫ ଅପରାଧିକ ମାମଲା: କେନ୍ଦ୍ର ସରକାର
ନୂଆଦିଲ୍ଲୀ: ସଂପ୍ରତି ନିର୍ବାଚିତ ହୋଇ କ୍ଷମତାରେ ଥିବା ୧୭୦୦ରୁ ଅଧିକ ସାଂସଦ ଓ ବିଧାୟକଙ୍କ ବିରୋଧରେ ୩,୦୪୫ଟି ଅପରାଧିକ ମାମଲା ଦେଶର ବିଭିନ୍ନ ନ୍ୟାୟାଳୟମାନଙ୍କରେ ବିଚାରାଧୀନ ରହିଛି ବୋଲି କେନ୍ଦ୍ର ସରକାର ସୁପ୍ରିମ୍ କୋର୍ଟଙ୍କୁ କହିଛନ୍ତି।
Sambad is now on WhatsApp
Join and get latest news updates delivered to you via WhatsApp
ଅପରାଧିକ ମାମଲା ରହିଥିବା ସାଂସଦ ଓ ବିଧାୟକଙ୍କ ତାଲିକାରେ ଉତ୍ତର ପ୍ରଦେଶ ଶୀର୍ଷ ସ୍ଥାନରେ ରହିଥିବା ବେଳେ ଏହା ପଛକୁ ରହିଛନ୍ତି ତାମିଲନାଡ଼ୁ, ବିହାର ଓ ପଶ୍ଚିମବଙ୍ଗ। ଉତ୍ତର ପ୍ରଦେଶର ୨୪୮ ଜଣ ସାଂସଦ ଓ ବିଧାୟକ ବିରୋଧରେ ଏବେ ଅପରାଧିକ ମାମଲାର ବିଚାର ଚାଲିଥିବା ବେଳେ, ତାମିଲନାଡ଼ୁର ୧୭୮, ବିହାରରର ୧୪୪ ଓ ପଶ୍ଚିମବଙ୍ଗର ୧୩୯ ଜଣ ସାଂସଦ ଓ ବିଧାୟକ ବିରୋଧରେ ଏବେ ଅପରାଧିକ ମାମଲାର ବିଚାର ଚାଲିଛି। ଆନ୍ଧ୍ରପ୍ରଦେଶ, କେରଳ ଓ ତେଲେଙ୍ଗାନା ଏହି ତିନିଟି ରାଜ୍ୟରୁ ୧୦୦ରୁ ଅଧିକ ସାଂସଦ ଓ ବିଧାୟକ ବିରୋଧରେ ଏବେ ଅପରାଧିକ ମାମଲାର ବିଚାର ଚାଲିଛି।
ସୁପ୍ରିମ୍ କୋର୍ଟଙ୍କ ନିର୍ଦ୍ଦେଶକ୍ରମେ କେନ୍ଦ୍ର ସରକାର ଅପରାଧିକ ମାମଲା ଥିବା ସାଂସଦ ଓ ବିଧାୟକମାନଙ୍କର ଏହି ତାଲିକା ସୁପ୍ରମ୍ କୋର୍ଟରେ ଦାଖଲ କରିଛନ୍ତି। ୨୦୧୪ରୁ ୨୦୧୭ ମଧ୍ୟରେ ୧୭୬୫ ଜଣ ନିର୍ବାଚିତ ସାଂସଦ ଓ ବିଧାୟକ ସେମାନଙ୍କ ବିରୋଧରେ ଚାଲିଥିବା ଅପରାଧିକ ମାମଲାକୁ ନ୍ୟାୟାଳୟରେ ସାମନା କରିଥିଲେ। ଏହି ୧୭୬୫ ଜଣ ନିର୍ବାଚିତ ଦାଗୀ ସାଂସଦ ଓ ବିଧାୟକଙ୍କ ବିରୋଧରେ ୩୮୧୬ଟି ଅପରାଧିକ ମାମଲା ନ୍ୟାୟାଳୟମାନଙ୍କରେ ବିଚାରାଧୀନ ରହିଥିବା କେନ୍ଦ୍ର ସରକାରଙ୍କ ପକ୍ଷରୁ ସୁପ୍ରିମ୍ କୋର୍ଟରେ ଆଗତ ହୋଇଥିବା ସତ୍ୟପାଠରେ ଦର୍ଶାଯାଇଛି।