କୁହୁଡ଼ି ହେତୁ ଦିଲ୍ଲୀରେ ୬୦ ବିମାନ ଏବଂ ୨୪ଟି ଟ୍ରେନ୍‌ ବିଳମ୍ବିତ

ନୂଆଦିଲ୍ଲୀ: ଶୁକ୍ରବାର ସକାଳେ ଦିଲ୍ଲୀ ଏବଂ ଏହାର ପଡୋଶୀ ଅଞ୍ଚଳ ସମେତ ଉତ୍ତର ଭାରତର ଅନେକ ଅଞ୍ଚଳରେ ଅତ୍ୟଧିକ ଥଣ୍ଡା ସହ କୁହୁଡ଼ି ହେତୁ ଦୃଶ୍ୟମାନ୍ୟତା ହ୍ରାସ ପାଇଛି। ଯାହାଫଳରେ ଅନେକ ଟ୍ରେନ୍ ଏବଂ ବିମାନ ସେବା ପ୍ରଭାବିତ ହୋଇଛି। 

ଫ୍ଲାଇଟ୍ ମନିଟରିଂ ୱେବସାଇଟ୍ ଫ୍ଲାଇଟ୍‌ ଟ୍ରେଡର୍‌ ଅନୁଯାୟୀ, ଅତିକମରେ ୬୦ଟି ବିମାନ ଉଡ଼ାଣରେ ବିଳମ୍ବ ହୋଇଛି ଏବଂ ଦିଲ୍ଲୀର ଇନ୍ଦିରା ଗାନ୍ଧୀ ଅନ୍ତର୍ଜାତୀୟ ବିମାନବନ୍ଦରରେ ୬ଟି ବିମାନକୁ ବାତିଲ କରାଯାଇଛି। ୧୯୩ ଟି ବିମାନର ଆଗମନ ବିଳମ୍ବ ହୋଇଥିବା ବେଳେ ଚାରିଟି ବାତିଲ କରାଯାଇଛି।

ସେହିପରି କୋଲକାତା ବିମାନବନ୍ଦରରେ ୧୭ ଟି ବିମାନ ଉଡ଼ାଣ ବିଳମ୍ବ ହୋଇଥିଲା, ଗୋଟିଏ ବାତିଲ ହୋଇଥିଲା ଏବଂ ବିମାନ ବନ୍ଦରରେ ପହଞ୍ଚିବାକୁ ଥିବା ୩୬ଟି ବିମାନ ମଧ୍ୟ ବିଳମ୍ବ ହୋଇଥିବା ସୂଚନା ରହିଛି।

ଶୁକ୍ରବାର ସକାଳେ ଦିଲ୍ଲୀ ବିମାନବନ୍ଦରରେ ରନୱେ ଦୃଶ୍ୟମାନତା ଶୂନ ଥିଲା ଏବଂ ବିମାନ ଚଳାଚଳ କାର୍ଯ୍ୟରେ ବାଧା ସୃଷ୍ଟି ହେବ ବୋଲି ବିମାନବନ୍ଦର କର୍ତ୍ତୃପକ୍ଷ ପୂର୍ବରୁ ଚେତାବନୀ ଦେଇଛନ୍ତି। କୁପୱାରା, ଅମୃତସର, ଚଣ୍ଡିଗଡ଼, ବାରଣାସୀ, ଆଗ୍ରା, ଏବଂ ଗ୍ୱାଲିଅର୍ ସମେତ ଅନ୍ୟାନ୍ୟ  ବିମାନବନ୍ଦର ମଧ୍ୟ ଶୂନ୍ୟ ଦୃଶ୍ୟମାନତା ଦେଖିବାକୁ ମିଳିଛି।

କୁହୁଡ଼ି ପରିସ୍ଥିତି ଯୋଗୁଁ ଅନେକ  ଦୂରଗାମୀ ସେବା ସମେତ ଅତି କମରେ ୨୪ଟି ଟ୍ରେନ୍ ବିଳମ୍ବରେ ଚାଲୁଛି ବୋଲି ରେଳବାଇ କହିଛି। ଏହି ଟ୍ରେନଗୁଡିକ ମଧ୍ୟରୁ କେତେକ ୪.୫ ଘଣ୍ଟା ପର୍ଯ୍ୟନ୍ତ ବିଳମ୍ବରେ ଚାଲୁଛି।