ପେଟରେ ଯନ୍ତ୍ରଣା ଅନୁଭବ ହେବାରୁ ଏମ୍ସରେ ଭର୍ତ୍ତି ହେଲେ ପି.ଚିଦମ୍ବରମ୍
ନୂଆଦିଲ୍ଲୀ : ଆଇଏନଏକ୍ସ ମିଡିଆ ବେଆଇନ୍ ଅର୍ଥ କାରବାର ମାମଲାରେ ତିହାର ଜେଲରେ ଥିବା କଂଗ୍ରେସ ସାଂସଦ ପି.ଚିଦମ୍ବରମ୍ଙ୍କ ପେଟରେ ଯନ୍ତ୍ରଣା ଅନୁଭବ ହେବାରୁ ତାଙ୍କୁ ଏମ୍ସକୁ ନିଆଯାଇଛି । ଶନିବାର ସଂଧ୍ୟାରେ ହଠାତ୍ ତାଙ୍କ ପେଟରେ ଯନ୍ତ୍ରଣା ହେବା ନେଇ ଅଭିଯୋଗ ହେବା ପରେ ଜେଲ ପ୍ରଶାସନ ତାଙ୍କୁ ଏମ୍ସ ପଠାଇ ଦେଇଛନ୍ତି । ମିଳିଥିବା ସୂଚନା ଅନୁସାରେ ଚିଦମ୍ବରମଙ୍କର ପୂରା ଶରୀରର ପରୀକ୍ଷା କରାଯିବ।
Sambad is now on WhatsApp
Join and get latest news updates delivered to you via WhatsApp
ସୂଚନା ମୁତାବକ, ଆଇଏନ୍ଏକ୍ସ ମିଡିଆ ମାମଲାରେ ଚିଦମ୍ବରମ୍ଙ୍କୁ ଅଗଷ୍ଟ ୨୧ରେ ସିବିଆଇ ତାଙ୍କୁ ଗିରଫ କରିଥିଲା । ଆଇଏନ୍ଏକ୍ସ ମିଡିଆ ମାମଲାକୁ ନେଇ ସେପ୍ଟେମ୍ବର ୫ରେ ସ୍ୱତନ୍ତ୍ର ସିବିଆଇ ଅଦାଲତ କଂଗ୍ରେସ ସାଂସଦ ତଥା ପୂର୍ବ କେନ୍ଦ୍ରୀୟ ମନ୍ତ୍ରୀ ପି. ଚିଦମ୍ବରମ୍କୁ ୧୪ଦିନ ପର୍ଯ୍ୟନ୍ତ ତିହାର ଜେଲ୍କୁ ପଠାଇଥିଲେ । କିନ୍ତୁ ପରେ ଯାଞ୍ଚ ଏଜେନ୍ସିର କହିବା ଅନୁଯାୟୀ ଏହାର ଅବଧି ଅକ୍ଟୋବର ୩ ପର୍ଯ୍ୟନ୍ତ ବଢ଼ାଇ ଦିଆଯାଇଥିବା ବେଳେ ପରେ ପୁଣି ତାହା ଅକ୍ଟୋବର ୧୭ ପର୍ଯ୍ୟନ୍ତ ବଢ଼ାଇ ଦିଆଯାଇଛି । ଦିଲ୍ଲୀ ହାଇକୋର୍ଟରୁ ଆରମ୍ଭ କରି ସୁପ୍ରିମକୋର୍ଟ ପର୍ଯ୍ୟନ୍ତ ଚିଦମ୍ବରମ୍ ଯାଇ ସାରିଥିଲେ ମଧ୍ୟ ତାଙ୍କୁ ଜାମିନ୍ ମିଳି ପାରି ନାହିଁ ।