ପହଲଗାମ ଆକ୍ରମଣ: ୩ ଆତଙ୍କୀଙ୍କ ମୃତଦେହ ଯାଞ୍ଚ କରିବ ଏନ୍‌ଆଇଏ

ନୂଆଦିଲ୍ଲୀ: ଜାତୀୟ ତଦନ୍ତକାରୀ ଏଜେନ୍ସି (ଏନ୍ଆଇଏ)ର ଏକ ଟିମ୍ ସୋମବାର ଦାଚିଗାମରେ ଅପରେସନ୍ ମହାଦେବରେ ନିହତ ହୋଇଥିବା ୩ ଜଣ ପାକିସ୍ତାନୀ ଆତଙ୍କବାଦୀଙ୍କ ମୃତଦେହ ଓ ସେମାନଙ୍କଠାରୁ ମିଳିଥିବା ଇଲେକ୍ଟ୍ରୋନିକ୍ ଉପକରଣ ଓ ଅସ୍ତ୍ରଶସ୍ତ୍ର ଯାଞ୍ଚ କରିବ। ଏଜେନ୍ସି ଏପ୍ରିଲ ୨୨ ପହଲଗାମ ଆତଙ୍କବାଦୀ ଆକ୍ରମଣର ତଦନ୍ତ କରୁଛି ଏବଂ ସୋମବାର ନିହତ ହୋଇଥିବା ପାକିସ୍ତାନ ସେନାର ପୂର୍ବତନ କମାଣ୍ଡୋ ସୁଲେମାନ ଶାହ ପହଲଗାମ ଘଟଣାରେ ଅନ୍ୟତମ ଆକ୍ରମଣକାରୀ ବୋଲି ସନ୍ଦେହ କରାଯାଉଛି।

ନାମ ଗୋପନ ରଖିବା ସର୍ତ୍ତରେ ଜଣେ ଅଧିକାରୀ କହିଛନ୍ତି ଯେ, ତିନି ଜଣ ବିଦେଶୀ ଆତଙ୍କବାଦୀଙ୍କ ମୃତଦେହକୁ ସୋମବାର ରାତିରେ ଶ୍ରୀନଗରର ଏକ ଶବ ଗୃହକୁ ପଠାଯାଇଛି, ଯେଉଁଠାରେ ଫରେନସିକ୍ ବିଶେଷଜ୍ଞଙ୍କ ସହ ଏନ୍‌ଆଇଏର ଏକ ଟିମ୍ ସେଗୁଡ଼ିକୁ ଯାଞ୍ଚ କରିବ। ସେମାନଙ୍କ ଇଲେକ୍ଟ୍ରୋନିକ୍ ଉପକରଣଗୁଡ଼ିକୁ ବିଶ୍ଳେଷଣ ପାଇଁ ପଠାଯିବ ଏବଂ ପହଲଗାମ ଆକ୍ରମଣ ସ୍ଥଳରେ ଉଦ୍ଧାର ହୋଇଥିବା କାଟ୍ରିଜ୍ ଖୋଳ ସହିତ ଅସ୍ତ୍ରଶସ୍ତ୍ରଗୁଡ଼ିକୁ ମିଳାଯିବ। ଏହାପରେ ମୃତଦେହଗୁଡ଼ିକୁ ପୂର୍ବରୁ ସ୍ଥିର ହୋଇଥିବା ସ୍ଥାନରେ ସତ୍କାର ପାଇଁ ପଠାଯିବ ବୋଲି ସେ କହିଛନ୍ତି। ତିନି ଜଣ ଆତଙ୍କବାଦୀଙ୍କ ଠାରୁ ଜବତ ହୋଇଥିବା ଇଲେକ୍ଟ୍ରୋନିକ୍ ଡିଭାଇସ୍ ପହଲଗାମ୍ ମାମଲାର ସମାଧାନ କରିବାରେ ସହାୟକ ହୋଇପାରିବ ବୋଲି ଅନୁସନ୍ଧାନକାରୀମାନେ ବିଶ୍ୱାସ କରୁଛନ୍ତି। ଫେବ୍ରୁଆରି ୨୦୧୯ ପୁଲଵାମା ଆତଙ୍କବାଦୀ ଆକ୍ରମଣରେ ମଧ୍ୟ ୨୦୧୯ ମାର୍ଚ୍ଚ ୨୯ରେ ଏନ୍‌କାଉଣ୍ଟରରେ ନିହତ ହୋଇଥିବା ମୌଲାନା ମାସୁଦ ଆଝାର୍‌ର ପୁତୁରା ମହମ୍ମଦ ଉମର ଫାରୁକ୍‌ର  ମୋବାଇଲ୍ ଫୋନ୍‌ରୁ ଏନ୍‌ଆଇଏକୁ ଏହାର ପ୍ରଥମ ସୁରାକ ମିଳିଥିଲା।