ନୂଆଦିଲ୍ଲୀ : ଗୋଟିଏ ପଟେ ଭାରତ ଖାଦ୍ୟ ସଂକଟର ସମ୍ମୁଖୀନ ହେଉଥିବା ଆଫଗାନିସ୍ତାନକୁ ମାନବୀୟ ସହାୟତା ପଠାଉଥିବାବେଳେ ତାଲିବାନ ସେଠାରେ ଭାରତର ଶତ୍ରୁମାନଙ୍କୁ ପାଳୁଛି । ଜାତିସଂଘ ପକ୍ଷରୁ ପ୍ରକାଶିତ ଏକ ରିପୋର୍ଟ ଅନୁସାରେ ଆଫଗାନିସ୍ତାନରେ ଆତଙ୍କବାଦୀ ସଂଗଠନ ଲସ୍କର-ଇ-ତୋଇବା, ଜୈସ-ଇ-ମହମ୍ମଦର ତାଲିମ ଶିବିର ଚାଲିଛି ଓ ସେଗୁ଼ଡ଼ିକ ତାଲିବାନ ନିୟନ୍ତ୍ରଣରେ ରହିଛି ।
Sambad is now on WhatsApp
Join and get latest news updates delivered to you via WhatsApp
ଜାତିସଂଘର ଆନାଲିଟିକାଲ ସପର୍ଟ ଏଣ୍ଡ ସାଙ୍କସନ୍ସ ମନିଟରିଂ ଟିମର ୧୩ତମ ରିପୋର୍ଟରେ କୁହାଯାଇଛି ଯେ, ଆଫଗାନିସ୍ତାନର ନଙ୍ଗରନାର ଜିଲ୍ଲାରେ ଜୈସର ୮ଟି ତାଲିମ ଶିବିର ରହିଛି ଓ ସେଗୁଡ଼ିକ ତାଲିବାନ ନିୟନ୍ତ୍ରଣରେ ରହିଛି । ଏହି ରିପୋର୍ଟରେ କୁହାଯାଇଛି ଯେ ମାସୁଦ ଆଝାର ଦ୍ବାରା ପରିଚାଳିତ ଜୈସ-ଇ-ମହମ୍ମଦ ଓ ତାଲିବାନ ଦେଓବନ୍ଦୀ ଗ୍ରୁପ ହୋଇଥିବାରୁ ପରସ୍ପର ସହ ଆଦର୍ଶଗତ ଭାବେ ନିକଟତର ଅଟନ୍ତି ।
ଅନ୍ୟପକ୍ଷରେ ଲସ୍କର-ଇ-ତୋଇବା ପୂର୍ବରୁ ତାଲିବାନକୁ ଆର୍ଥିକ ଓ ତାଲିମ ସହାୟତା ପ୍ରଦାନ କରିଥିବାରୁ ଉଭୟ ପରସ୍ପରର ନିକଟତର । ଏଣୁ ଆଫଗାନିସ୍ତାନରେ ତାଲିବାନପକ୍ଷରୁ ଲସ୍କର କ୍ୟାମ୍ପଗୁଡ଼ିକୁ ଅନୁମତି ଦିଆଯାଇଛି । ଗତ ଜାନୁଆରିମାସରେ ତାଲିବାନର ଏକ ପ୍ରତିନିଧିମଣ୍ଡଳ ନଙ୍ଗରନାର ଜିଲ୍ଲାର ହସକା ମୀନା ଠାରେ ଥିବା ଲସ୍କର ତାଲିମ ଶିବିର ପରିଦର୍ଶନ କରିଥିଲା ।
ସୂଚନାଯୋଗ୍ୟ ଯେ, ଆଫଗାନିସ୍ତାନମାଟିକୁ ଭାରତ ବିରୋଧୀ କାର୍ୟ୍ୟ ପାଇଁ ପ୍ରଶ୍ରୟ ଦିଆଯିବ ନାହିଁ ବୋଲି ତାଲିବାନ ପୂର୍ବରୁ ଅନେକ ଥର ପ୍ରତିଶ୍ରୁତି ଦେଇଥିଲା । କିନ୍ତୁ ଏହା ଏବେ ମିଥ୍ୟା ପ୍ରମାଣିତ ହୋଇଛି ।