ଶ୍ରୀନଗର: ସୀମାରେ ସୁଧୁରୁନି ପାକିସ୍ତାନ । କଣ୍ଟା ବାଡରେ ଲୁଗା ପକାଇ କଳି କଲା ପରି ଲଗାତାର ୫ ଦିନରେ ବି ନିଜ ପଟୁ ଗୁଳିମାଡ କରିଛି ପାକିସ୍ତାନ ଆଉ ଏଲଓସିରେ ଅସ୍ତ୍ରବିରତି ଉଲ୍ଲଂଘନ କରିଛି । ପୁଣି ଅଶାନ୍ତ ହୋଇଛି ଭାରତ-ପାକିସ୍ତାନ ସୀମା । ପାକିସ୍ତାନ ସେନା ଏଲଓସିର ବିଭିନ୍ନ ସ୍ଥାନରେ ଗୁଳିମାଡ କରିଛନ୍ତି । କୁପୱାଡ଼ା, ବାରମୂଳା ଏବଂ ଅଖନୁର ସେକ୍ଟରରେ ଗୁଳିମାଡ ହୋଇଥିବା ସୂଚନା ।

Advertisment

ତେବେ ପାକିସ୍ତାନ ସେନାର ଗୁଳିମାଡର କଡା ଯବାବ ଦେଉଛନ୍ତି ଭାରତୀୟ ଯବାନ । ଲଗାତାର ୫ମ ଦିନରେ ପାକିସ୍ତାନ ଅସ୍ତ୍ରବିରତି ଉଲ୍ଲଂଘନ କରିଥିବା ବେଳେ ସୀମାରେ ହାଇଆଲର୍ଟ ଜାରି କରାଯାଇଛି । ଗତକାଲି ମଧ୍ୟ କୁପୱାଡା ଏବଂ ପୁଞ୍ଚ ସେକ୍ଟର ପୋଷ୍ଟ ଉପରେ ଗୁଳିମାଡ କରିଥିଲା ପାକିସ୍ତାନ ।

ପହଲଗାମ୍ ପ୍ରତିଶୋଧ ନେବାକୁ ଭାରତ ପାକିସ୍ତାନ ଉପରେ ବିଭିନ୍ନ ସ୍ତରରେ କାର୍ଯ୍ଯାନୁଷ୍ଠାନ ନେଉଥିବା ବେଳେ ଘରେ ପଶି ଆତଙ୍କୀଙ୍କୁ ମାରିବାକୁ ମୋଦୀ ଧମକ ଦେଇଛନ୍ତି । ଯାହା ପରେ ଛାନିଆ ହୋଇ ଯୁଦ୍ଧ ଆଶଙ୍କାରେ ଗୁଳିମାଡ କରୁଛି ପାକିସ୍ତାନ ।

ସେପଟେ ପାକିସ୍ତାନକୁ ଭାରତର ଭୟ ଘାରିଥିବା ବେଳେ ପରମାଣୁ ଯୁଦ୍ଧର ଧମକ ଦେବାକୁ ପଛାଇନାହାନ୍ତି ପାକିସ୍ତାନ ମନ୍ତ୍ରୀ । ଯୁଦ୍ଧରେ ଭାରତକୁ ହରାଇବା ସମ୍ଭବ ନୁହେଁ, ଏକଥା ପାକିସ୍ତାନ ଭଲ ଭାବେ ଜାଣିଛି । ହେଲେ ମୁହଁ ଟାଣ କରି ଓଲଟା ପରମାଣୁ ଆକ୍ରମଣର କଥା କହି ଡରାଇବାକୁ ଚେଷ୍ଟା କରୁଛି । ପାକିସ୍ତାନର ପ୍ରତିରକ୍ଷା ମନ୍ତ୍ରୀ ଖ୍ବାଜା ଆସିଫ୍ କହିଛନ୍ତି ଯେକୌଣସି ସମୟରେ ଆକ୍ରମଣ  କରିପାରେ ଭାରତ । ଏଥିପାଇଁ ଆମ ସୈନ୍ୟଙ୍କୁ ମୁତୟନ କରିସାରିଛୁ । ପାକିସ୍ତାନକୁ ବିପଦ ଆସିଲେ ପରମାଣୁ ଆକ୍ରମଣ ହେବ ।