‘ମୋଦୀ ଆମ ଉପରେ ଆକ୍ରମଣ କରିପାରନ୍ତି’, ପୁଣି ଜାତିସଂଘରେ ଭାରତ ବିରୋଧରେ ଫେରାଦ ହେଲା ପାକିସ୍ତାନ
ଇସ୍ଲାମାବାଦ : ନାଗରିକତା ସଂଶୋଧନ ଆଇନ ବିରୋଧରେ ଭାରତରେ ଚାଲିଥିବା ଆନ୍ଦୋଳନରୁ ଲୋକମାନଙ୍କ ଧ୍ୟାନ ହଟାଇବାକୁ ମୋଦୀ ସରକାର ପାକିସ୍ତାନ ଉପରେ ଆକ୍ରମଣ କରିପାରନ୍ତି ବୋଲି ଇସ୍ଲାମାବାଦ ଅଭିଯୋଗ କରିଛି । ଆକ୍ରମଣ ଭୟ ପାକିସ୍ତାନକୁ ଏତେ ବିବ୍ରତ କରିଛି ଯେ, ପୁଣି ଥରେ ଜାତିସଂଘରେ ଭାରତ ବିରୁଦ୍ଧରେ ଅଭିଯୋଗ କରିଛି।
Sambad is now on WhatsApp
Join and get latest news updates delivered to you via WhatsApp
ପାକିସ୍ତାନର ବୈଦେଶିକ ବ୍ୟାପାର ମନ୍ତ୍ରୀ ଶାହ ମେହମୁଦ କୁରେସୀ ଜାତିସଂଘ ନିରାପତ୍ତା ପରିଷଦ ଓ ଜାତିସଂଘର ମହାସଚିବ ଆଣ୍ଟୋନିଓ ଗୁଏଟେରେସଙ୍କୁ ଏକ ପତ୍ର ଲେଖି ଅଭିଯୋଗ କରିଛନ୍ତି ଯେ ଭାରତ ପାକିସ୍ତାନ ଉପରେ ଆକ୍ରମଣ କରିବାକୁ ପ୍ରସ୍ତୁତି ଚଳାଇଛି । ଏପରିକି ସୀମାରେ ଭାରତ ଟ୍ୟାଙ୍କ,ବ୍ରହ୍ମସ ମିସାଇଲ, ଆଣ୍ଟି-ଟ୍ୟାଙ୍କ ସ୍ପାଇକ ମିସାଇଲ ଓ ଅନ୍ୟାନ୍ୟ ଯୁଦ୍ଧାସ୍ତ୍ର ମୁତୟନ କରିଛି । ଏହା ସହିତ ଭାରତ ବିଭିନ୍ନ ରେଞ୍ଜ୍ର କ୍ଷେପଣାସ୍ତ୍ରର ପରୀକ୍ଷଣ ଚଳାଇଛି ବୋଲି ସେ ନିଜ ପତ୍ରରେ ଉଲ୍ଲେଖ କରିଛନ୍ତି ।
ଏକ ପାକିସ୍ତାନୀ ଟେଲିଭିଜନ ଚ୍ୟାନେଲରେ ପ୍ରସାରିତ ଏକ ରିପୋର୍ଟରେ କୁହାଯାଇଛି ଯେ ଭାରତ ନିୟନ୍ତ୍ରଣ ରେଖା ନିକଟରେ ଥିବା ତାରବାଡ଼ଗୁଡ଼ିକୁ ହଟାଇବା ଆରମ୍ଭ କରିଛି । ସେଠାରେ ଟ୍ୟାଙ୍କ, ଆର୍ମରଡ ଭେହିକ୍ଲ ଆଦି ମୁତୟନ ହୋଇଛି । ଏହା ସହିତ ଦୁଇପକ୍ଷରୁ ପ୍ରବଳ ଗୁଳିବର୍ଷଣ ଚାଲିଛି ।
ଗତକାଲି ଭାରତର ସେନାଧ୍ୟକ୍ଷ ଜେନେରାଲ ବିପିନ ରାଓ୍ଵତ କହିଥିଲେ ଯେ ସୀମାରେ ଉତ୍ତେଜନା ଅନେକ ବଢିଯାଇଛି । ଯେ କୌଣସି ସମୟରେ କିଛି ବି ହୋଇପାରେ । ଏଣୁ ସେନାକୁ ସଜାଗ ରଖାଯାଇଛି ।