ପେଟ୍ରୋଲ ପମ୍ପରେ ତେଲ ନାହିଁ, ଏଟିଏମରେ ଟଙ୍କା ନାହିଁ: ନିଜ ଦେଶ ପାକିସ୍ତାନର ଅବସ୍ଥା ବାବଦରେ ମୁହଁ ଖୋଲିଲେ ପୂର୍ବତନ ଅଧିନାୟକ
ଲାହୋର: ପାକିସ୍ତାନରେ ଯଦିଓ ପ୍ରଧାନମନ୍ତ୍ରୀ ବଦଳିଛନ୍ତି, କିନ୍ତୁ ଦେଶର ଅବସ୍ଥାରେ ଏପର୍ଯ୍ୟନ୍ତ ସୁଧାର ଆସିନାହିଁ। ଏକ ରିପୋର୍ଟ ଅନୁଯାୟୀ, ଯଦି ଏଭଳି ସ୍ଥିତି ଜାରି ରହେ, ତେବେ ପାକିସ୍ତାନରେ ଶ୍ରୀଲଙ୍କା ଭଳି ପରିସ୍ଥିତି ଘଟିବ । ତେବେ ଏହି ସମୟରେ ପାକିସ୍ତାନର ପୂର୍ବତନ କ୍ରିକେଟର ମହମ୍ମଦ ହାଫିଜ ଟ୍ୱିଟ କରି ନିଜ ଦେଶର ପୋଲ ଖୋଲିଛନ୍ତି | ଇମ୍ରାନ ଖାନ ଏବଂ ପାକିସ୍ତାନର ବର୍ତ୍ତମାନର ପ୍ରଧାନମନ୍ତ୍ରୀ ଶାହବାଜ ସରିଫଙ୍କୁ ଟ୍ୟାଗ କରି ସେ ଟ୍ୱିଟ କରି କହିଛନ୍ତି ଯେ ଲାହୋରରେ କୌଣସି ପେଟ୍ରୋଲ ପମ୍ପରେ ତେଲ ନାହିଁ, ଏଟିଏମ ମେସିନରେ ଟଙ୍କା ନାହିଁ। ହାଫିଜ ନିଜ ଟୁଇଟ୍ ଜରିଆରେ ପାକିସ୍ତାନର ସାଧାରଣ ଲୋକଙ୍କ ଅବସ୍ଥା ବିଷୟରେ କହିଛନ୍ତି।
Sambad is now on WhatsApp
Join and get latest news updates delivered to you via WhatsApp
ସେ ଟୁଇଟ୍ କରି କହିଛନ୍ତି, “ଲାହୋରର କୌଣସି ପେଟ୍ରୋଲ ପମ୍ପରେ ପେଟ୍ରୋଲ ଉପଲବ୍ଧ ନାହିଁ? ଏଟିଏମ ମେସିନରେ ନଗଦ ଟଙ୍କା ଉପଲବ୍ଧ ନାହିଁ? ଜଣେ ସାଧାରଣ ଲୋକଙ୍କୁ ରାଜନୈତିକ ନିଷ୍ପତ୍ତିର ସାମ୍ନା କରିବାକୁ ପଡିବ କାହିଁକି?” ହାଫିଜ ତାଙ୍କ ଟ୍ୱିଟରେ ପାକିସ୍ତାନର ବର୍ତ୍ତମାନର ପ୍ରଧାନମନ୍ତ୍ରୀ ଶାହବାଜ ସରିଫଙ୍କୁ ମଧ୍ୟ ଟ୍ୟାଗ କରିଛନ୍ତି।ସୂଚନା ଥାଉ କି ଯେ ପାକିସ୍ତାନରେ ଆର୍ଥିକ ସଙ୍କଟ ଥମିବାର ନାମ ନେଉନାହିଁ। ଷ୍ଟେଟ ବ୍ୟାଙ୍କ ଅଫ୍ ପାକିସ୍ତାନର ବୈଦେଶିକ ମୁଦ୍ରା ଭଣ୍ଡାର ଦଶ ବିଲିୟନ ଆମେରିକୀୟ ଡଲାରକୁ ଖସି ଆସିଛି।
କେବଳ ଏତିକି ନୁହେଁ ପାକିସ୍ତାନର ଅର୍ଥନୈତିକ ବ୍ୟାପାରର ବିଶେଷଜ୍ଞମାନେ କହୁଛନ୍ତି ଯେ ଯଦି ଏହି ଅବସ୍ଥା ଜାରି ରହେ ତେବେ ପାକିସ୍ତାନ ଶୀଘ୍ର ଦେବାଳିଆ ହୋଇପାରେ। ସୂଚନା ଥାଉ କି ଯେ ଆନ୍ତର୍ଜାତୀୟ କ୍ରିକେଟରେ ହାଫିଜ ୧୨,୦୦୦ ରୁ ଅଧିକ ରନ ସ୍କୋର କରିବା ସହ ୨୫୦ରୁ ଅଧିକ ୱିକେଟ୍ ନେଇଥିଲେ। ସେ ପାକିସ୍ତାନ କ୍ରିକେଟ୍ ଦଳର ଅଧିନାୟକ ମଧ୍ୟ ଥିଲେ ।