ନୂଆଦିଲ୍ଲୀ: ଭାରତରେ ଚାଲିଥିବା କୃଷକ ଆନ୍ଦୋଳନରେ ଆମେରିକା ରାଷ୍ଟ୍ରପତି ଜୋ ବାଇଡେନ ମୁଣ୍ଡ ପୁରାଇବାକୁ ପାକିସ୍ତାନ ଆଗ୍ରହ ପ୍ରକାଶ କରିଛି | ପାକିସ୍ତାନର ବିଦେଶ ମନ୍ତ୍ରାଳୟର ସଂସଦୀୟ କମିଟି ଜାନୁୟାରୀ ୨୬ରେ ଦିଲ୍ଲୀରେ ହୋଇଥିବା ବିରୋଧ ପ୍ରଦର୍ଶନକୁ ନେଇ ମୁହଁ ଖୋଲିଛି | ସଂସଦୀୟ କମିଟି ଦାବି କରିଛି ଯେ ଭାରତରେ ଚାଷୀଙ୍କ ପ୍ରତି ହେଉଥିବା ମାନବାଧିକାର ଉଲ୍ଲଙ୍ଘନ ପ୍ରସଙ୍ଗରେ ପାକିସ୍ତାନ ସରକାର ଆମେରିକା ରାଷ୍ଟ୍ରପତି ଜୋ ବାଇଡେନଙ୍କ ସରକାର ସହ ଅନ୍ତଃରାଷ୍ଟ୍ରୀୟ ସଂଗଠନ ସାମ୍ନାରେ ଉଠାନ୍ତୁ |
Sambad is now on WhatsApp
Join and get latest news updates delivered to you via WhatsApp
ଇସଲାମାବାଦର ସଂସଦ ଭବନରେ ଗୁରୁବାର ଦିନ ପ୍ରାୟ ତିନି ଘଣ୍ଟା ଧରି ଚାଲିଥିବା ବୈଠକର ଅଧ୍ୟକ୍ଷତା କରିଥିଲେ ସାଂସଦ ମୁସେଦ ହୁସେନ | ଏହି ବୈଠକରେ ପାକିସ୍ତାନର ବୈଦେଶିକ ମନ୍ତ୍ରୀ ସାହ ମହମ୍ମଦ କ୍ୟୁରେସି ଉପସ୍ଥିତ ଥିଲେ | ସଂସଦୀୟ କମିଟି ପକ୍ଷରୁ କୁହାଯାଇଥିଲା ଯେ ‘ଭାରତର ଆରଏସଏସ(ରାଷ୍ଟ୍ରୀୟ ସ୍ୱୟଂସେବକ ସଂଗଠନ)ର ମୁଖା ପାକିସ୍ତାନ ସରକାର ଅନ୍ତଃରାଷ୍ଟ୍ରୀୟ ଫୋରମରେ ଖୋଲନ୍ତୁ | ଜାନୁୟାରୀ ୨୬ରେ ମୋଦି ସରକାରଙ୍କ ଅତ୍ୟାଚାରକୁ ବିରୋଧ କରୁଥିବା ଲୋକଙ୍କ ପାଇଁ ଦିନଟି କଳାଦିନ ଥିଲା | ନୂଆଦିଲ୍ଲୀର ଲାଲକିଲ୍ଲାରେ ଶିଖ ଚାଷୀମାନେ ନିଜ ପବିତ୍ର ପତାକା ଉଡାଇଛନ୍ତି ଓ ପାକିସ୍ତାନ ସବୁବେଳେ ତାଙ୍କ ସହ ଅଛି |
ଭାରତରେ ୨୦୧୯ ମସିହାରେ ୧୦ ହଜାରରୁ ଅଧିକ କୃଷକ ଆତ୍ମହତ୍ୟା କରିଛନ୍ତି | ଆଉ ଅନେକ ମୁସଲମାନଙ୍କୁ ସେମାନଙ୍କ ଧର୍ମ ପାଇଁ ଉଦ୍ଦେଶ୍ୟମୂଳକ ଭାବେ ଟାର୍ଗେଟ କରାଯାଇଛି | ଆମେ ଚାଁହୁଛୁ ଯେ ଭାରତ ସରକାରଙ୍କ ପକ୍ଷରୁ କରାଯାଉଥିବା ଏହି ମାନବାଧିକାର ଉଲ୍ଲଙ୍ଘନ ପ୍ରସଙ୍ଗକୁ ସମସ୍ତଙ୍କ ସାମ୍ନାରେ କୁହାଯାଉ’ | ସୂଚନା ଥାଉ କି କାଶ୍ମୀର ପ୍ରସଙ୍ଗରେ ପାକିସ୍ତାନ ଏହା ପୂର୍ବରୁ ଅନ୍ତଃରାଷ୍ଟ୍ରୀୟ ସଂଗଠନମାନଙ୍କର ଦୃଷ୍ଟି ଆକର୍ଷଣ କରିବାକୁ ପ୍ରୟାସ କରିଥିଲା | କିନ୍ତୁ ଏହା ବିଫଳ ହୋଇଥିଲା |