ପାକିସ୍ତାନ ଦେଲା ଭାରତୀୟ ବନ୍ଦୀମାନଙ୍କର ତାଲିକା, ଜାଣନ୍ତୁ ପାକିସ୍ତାନ ଜେଲରେ କେତେ ଭାରତୀୟ ଅଛନ୍ତି

ଇସଲାମାବାଦ: ପାକିସ୍ତାନ ଜେଲରେ ବନ୍ଦୀ ଥିବା ଭାରତୀୟମାନଙ୍କର ତାଲିକା ପାକିସ୍ତାନ ପ୍ରକାଶ କରିଛି | ଭାରତୀୟ ହାଇକମିଶନଙ୍କୁ ଏହି ରିପୋର୍ଟ ଦିଆଯାଇଥିବାବେଳେ ଦର୍ଶାଯାଇଛି ଯେ ୨୬୧ ଜଣ ବନ୍ଦୀ ଭାବେ ପାକିସ୍ତାନ ଜେଲରେ ଅଛନ୍ତି | ୨୬୧ ଜଣଙ୍କ ମଧ୍ୟରୁ ୫୨ ଜଣ ସାଧାରଣ ନାଗରିକ ହୋଇଥିବାବେଳେ ୨୦୯ ଜଣ ଧୀବର ଅଛନ୍ତି |

ପାକିସ୍ତାନର ବୈଦେଶିକ ମନ୍ତ୍ରାଳୟ ପକ୍ଷରୁ କୁହାଯାଇଛି ଯେ ୨୦୦୮ରେ ହୋଇଥିବା ଚୁକ୍ତିନାମା ଅନୁସାରେ ଭାରତୀୟ ହାଇକମିଶନରଙ୍କୁ ଏହି ତଥ୍ୟ ଦିଆଯାଇଛି | ସେହିପରି ପାକିସ୍ତାନ ପକ୍ଷରୁ ଭାରତୀୟ ଜେଲରେ କେତେଜଣ ପାକିସ୍ତାନ ନାଗରିକ ବନ୍ଦୀ ଭାବେ ଅଛନ୍ତି ତାହାର ରିପୋର୍ଟ ମଧ୍ୟ ଦିଲ୍ଲୀରେ ଥିବା ପାକ ହାଇକମିଶନରଙ୍କୁ ଦେବାକୁ କୁହାଯାଇଛି |

ଏଠାରେ ସୂଚନା ଥାଉ କି ଚୁକ୍ତିନାମା ମୁତାବକ ପାକିସ୍ତାନ ଓ ଭାରତ ପ୍ରତି ୨ ବର୍ଷରେ ଥରେ ବନ୍ଦୀ ଥିବା ଉଭୟ ଦେଶର ନାଗରିକଙ୍କର ତଥ୍ୟ ପରସ୍ପରକୁ ପ୍ରଦାନ କରିବେ | ଉଭୟ ଭାରତୀୟ ଓ ପାକିସ୍ତାନର ଧୀବରମାନେ ମାଛ ଧରିବା ଉଦ୍ଦେଶ୍ୟରେ ଗଭୀର ସମୁଦ୍ର ମଧ୍ୟକୁ ଯାଇଥିବାବେଳେ ଅନ୍ତର୍ଜାତୀୟ ଜଳସୀମା ଅତିକ୍ରମ କରି ଉଭୟ ଦେଶର ନୌସେନା ହାତରେ ଧରାପଡ଼ି ବନ୍ଦୀ ଜୀବନ ବିତାଉଛନ୍ତି ।