ପାକିସ୍ତାନ:ପାକିସ୍ତାନର ରାଜଧାନୀ ଇସଲାମାବାଦରେ ନିର୍ମାଣ ହେବାକୁ ଯାଉଛି ପ୍ରଥମ ହିନ୍ଦୁ ମନ୍ଦିର । କିଛଦିନ ହେବ ସେଠାରେ ମନ୍ଦିର ନିର୍ମାଣ ନେଇ ବିବାଦ ଦେଖା ଦେଇଥିଲା । ସେଠିକାର ସରକାର ପ୍ରଥମେ ହିନ୍ଦୁ ମନ୍ଦିର ପାଇଁ ଆବଣ୍ଟିତ ଜମିକୁ ରଦ୍ଦ କରିଦେଇଥିଲେ। ପ୍ରଥମେ ଏହି ଜମିରେ ହିନ୍ଦୁ ମନ୍ଦିର, ଶ୍ମସାନ ଘାଟ ଓ ସାମୁଦାୟିକ କେନ୍ଦ୍ର ନିର୍ମାଣ ହେବା ନେଇ ସ୍ଥାନୀୟ ପ୍ରଶାସନ ନିଷ୍ପତ୍ତି ନେଇଥିଲା । ଏ ନେଇ ବାରମ୍ବାର ଆଲୋଚନା ପରେ ଶେଷରେ ଏହି ଜମି ଉପରେ ଏବେ ହିନ୍ଦୁ ମନ୍ଦିର ନିର୍ମାଣ କରାଯିବା ନେଇ ନିଷ୍ପତ୍ତି ହୋଇଛି ।
Sambad is now on WhatsApp
Join and get latest news updates delivered to you via WhatsApp
ପାକ୍ ଖବର କାଗଜ ‘ଡନ’ର ରିପୋର୍ଟ ମୁତାବକ ରାଜଧାନୀ ବିକାଶ ପ୍ରାଧିକରଣ (ସିଡିଏ) ଇସଲାମାବାଦ ହାଇକୋର୍ଟରେ ଶୁଣାଣି ବେଳେ କହିଥିଲା କି ହିନ୍ଦୁ ମନ୍ଦିର ନିର୍ମାଣ ପାଇଁ ଆବଣ୍ଟିତ ଜମିକୁ ରଦ୍ଦ କରାଯାଇଛି । ସିଡିଏ ଓକିଲ ଜାଭେଦ୍ ଇକବାଲ ଅଦାଲତଙ୍କୁ କହିଥିଲେ କି ଚଳିତବର୍ଷ ଫେବୃଆରି ମାସରେ ହିନ୍ଦୁ ସମୁଦାୟଙ୍କ ଲାଗି ଉଦ୍ଦିଷ୍ଟ ଏହି ଜମିକୁ ରଦ୍ଦ କରାଯାଇଥିଲା । ଏହାର କାରଣ ହେତୁ ଏଠାରେ ନିର୍ମାଣ ଆରମ୍ଭ ହୋଇପାରି ନଥିବା କଥା ଓକିଲ କୋର୍ଟଙ୍କୁ ଅବଗତ କରାଇଥିଲେ ।
ରିପୋର୍ଟ ମୁତାବକ ଇସଲାମାବାଦରେ ୦.୫ ଏକର ଜମିକୁ ୨୦୧୬ ମସିହାରେ ହିନ୍ଦୁ ସମୁଦାୟ ପାଇଁ ଆବଣ୍ଟିତ କରାଯାଇଥିଲା । ଏହି ଜମିରେ ହିନ୍ଦୁ ମନ୍ଦିର, ଶ୍ମସାନ ଘାଟ ଓ ସାମୁଦାୟିକ କେନ୍ଦ୍ର ନିର୍ମାଣ କରାଯିବାକୁ ନିଷ୍ପତ୍ତି ହୋଇଥିଲା । ଆବଣ୍ଟନ ରଦ୍ଦ ହେବା ଖବର ଆସିବା ପରେ ସୋସିଆଲ ମିଡିଆରେ ହିନ୍ଦୁ ସମୁଦାୟ ପ୍ରତିକ୍ରିୟା ପ୍ରକାଶ କରିଥିଲା । ସିଡିଏ ତାର ନିଷ୍ପତ୍ତି ପ୍ରତ୍ୟାହାର କରିବାକୁ ହିନ୍ଦୁ ସମୁଦାୟ ଦାବି କରିଥିଲା । ଏହାପରେ ସିଡିଏ ପକ୍ଷରୁ ଉକ୍ତ ଜମିରେ ହିନ୍ଦୁ ମନ୍ଦିର ନିର୍ମାଣ କରିବାକୁ ଅନୁମତି ଦେଇଛି ।
କହିରଖୁ କି ଗତବର୍ଷ ଜୁଲାଇ ମାସରେ ପାକିସ୍ତାନର କଠୋରପନ୍ଥୀମାନେ ଇସଲାମାବାଦରେ ସରକାରୀ ଅର୍ଥରେ ହିନ୍ଦୁ ମନ୍ଦିର ନିର୍ମାଣକୁ ସମାଲୋଚନା କରିଥିଲେ । ଏହାକୁ ନେଇ ସିଡିଏ ନିର୍ମାଣ କାର୍ଯ୍ୟ ବନ୍ଦ କରିଦେଇଥିଲା । ହେଲେ ଗତବର୍ଷ ଡିସେମ୍ବର ମାସରେ ଏହି ସମସ୍ୟାର ସମାଧାନ ହେବା ସହିତ ଏଠାରେ ଏବେ ହିନ୍ଦୁ ମନ୍ଦିର ନିର୍ମାଣ ହେବାକୁ ଯାଉଛି ।