ପାକିସ୍ତାନର କର୍ତ୍ତାରପୁର ଯାଇଥିବା ଶିଖ ଯୁବତୀଙ୍କୁ ଅପହରଣ, ୪ ଗିରଫ
ଚଣ୍ଡିଗଡ଼ : ଏକ ଶିଖ ତୀର୍ଥଯାତ୍ରୀ ଦଳ ସହ ପାକିସ୍ତାନର କର୍ତ୍ତାରପୁର ଯାଇଥିବା ଏକ ଯୁବତୀଙ୍କୁ ଅପହରଣ କରାଯାଇଥିବା ଖବର ହସ୍ତଗତ ହୋଇଛି । ଏ ନେଇ ପୁଲିସରେ ଅଭିଯୋଗ ହେବା ପରେ ପାକିସ୍ତାନ ପୁଲିସ ୪ ଜଣଙ୍କୁ ଗିରଫ କରିଛି ।
Sambad is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ଅନୁସାରେ ନଭେମ୍ବର ୩୦ ତାରିଖରେ ଏହି ଯୁବତୀ ଏକ ଶିଖ ତୀର୍ଥଯାତ୍ରୀ ଦଳ ସହ କର୍ତ୍ତାରପୁରରେ ଥିବା ଗୁରୁଦ୍ୱାରା ଦରବାର ସାହେବକୁ ଦର୍ଶନ କରିବାକୁ ଯାଇଥିବାବେଳେ ତାଙ୍କୁ ଅପହରଣ କରାଯାଇଥିଲା । ପୁଲିସ ଏହି ଘଟଣାରେ ୪ ଜଣଙ୍କୁ ଗିରଫ କରିଛି । ଗିରଫ ବ୍ୟକ୍ତିମାନେ ଲାହୋର ଓ ଫୈସଲାବାଦ ଅଞ୍ଚଳର ବୋଲି ଜଣାପଡିଛି । ତେବେ ଏ ପର୍ଯ୍ୟନ୍ତ ଉକ୍ତ ଯୁବତୀକୁ ଉଦ୍ଧାର କରାଯାଇପାରିନାହିଁ ।
ପାକିସ୍ତାନରେ ଅନ୍ୟ ଧର୍ମର ଯୁବତୀମାନଙ୍କୁ ଅପହରଣ କରି ଦୁଷ୍କର୍ମ କରିବା ସହ ଜବରଦସ୍ତି ଧର୍ମପରିବର୍ତ୍ତନ କରିବା ଏକ ସାଧାରଣ ଘଟଣା ହୋଇଗଲାଣି । ପାକିସ୍ତାନରେ ରହୁଥିବା ହିନ୍ଦୁ, ଶିଖ, ଖ୍ରୀଷ୍ଟିଆନ ଧର୍ମାବଲମ୍ବୀ ଯୁବତୀମାନଙ୍କୁ ଅପହରଣ କରି ଜବରଦସ୍ତି ଧର୍ମପରିବର୍ତ୍ତନ କରାଯାଉଛି । ଆମେରିକା ଭିତ୍ତିକ ବିଶ୍ୱ ସିନ୍ଧି କାଉନସିଲର ତଥ୍ୟ ଅନୁସାରେ ପାକିସ୍ତାନରେ ଗତ କିଛି ବର୍ଷ ମଧ୍ୟରେ ପ୍ରାୟ ୧ ହଜାର ସିନ୍ଧି ହିନ୍ଦୁ ଯୁବତୀଙ୍କୁ ଅପହରଣ କରି ଦୁଷ୍କର୍ମ, ହତ୍ୟା କିମ୍ବା ଜବରଦସ୍ତି ଧର୍ମପରିବର୍ତ୍ତନ କରାଯାଇଛି ।