ଅମୃତସର: ଏପ୍ରିଲ ୨୩ରୁ ପାକିସ୍ତାନ ରେଞ୍ଜର୍ସଙ୍କ ହେପାଜତରେ ଥିବା ବିଏସ୍‌ଏଫ୍ କନଷ୍ଟେବଳ ପୂର୍ଣ୍ଣମ କୁମାର ସ’ଙ୍କୁ ବୁଧବାର ସକାଳେ ଭାରତୀୟ କର୍ତ୍ତୃପକ୍ଷଙ୍କୁ ଫେରାଇ ଦିଆଯାଇଛି। ଅମୃତସର ଅଟାରିସ୍ଥିତ ଯୁଗ୍ମ ଚେକ୍‌ପୋଷ୍ଟରେ ପୂର୍ବାହ୍ଣ ପ୍ରାୟ ସାଢ଼େ ୧୦ଟା ବେଳେ ଏହି ହସ୍ତାନ୍ତର କରାଯାଇଥିଲା ବୋଲି ବିଏସ୍‌ଏଫ୍‌ ପକ୍ଷରୁ କୁହାଯାଇଛି। ପଶ୍ଚିମବଙ୍ଗର ବାସିନ୍ଦା ସ’ଙ୍କୁ ଏବେ ସୁରକ୍ଷା ଅଧିକାରୀମାନେ ଘଟଣା ବିଷୟରେ ପଚରାଉଚରା କରୁଛନ୍ତି। ବିଏସ୍‌ଏଫ୍‌ ପକ୍ଷରୁ ଜାରି ବିବୃତିରେ କୁହାଯାଇଛି ଯେ, କନେଷ୍ଟବଳ ପୂର୍ଣ୍ଣମ କୁମାର ସ’ ପହଲଗାମ ଘଟଣାର ଗୋଟିଏ ଦିନ ପରେ ୨୩ ଏପ୍ରିଲ ୨୦୨୫ ପୂର୍ବାହ୍ଣ ପ୍ରାୟ ୧୧ଟା ୫୦ରେ ଫିରୋଜପୁର ସେକ୍ଟର୍‌ ଅଞ୍ଚଳରେ ଡ୍ୟୁଟି କରୁଥିବା ସମୟରେ ଅଜାଣତରେ ପାକିସ୍ତାନ ସୀମା ଅତିକ୍ରମ କରିଥିଲେ ଏବଂ ପାକ୍ ରେଞ୍ଜର୍ସ ତାଙ୍କୁ ଅଟକ ରଖିଥିଲେ। ତାଙ୍କର ପ୍ରତ୍ୟାବର୍ତ୍ତନ 
ପରେ ବିଏସ୍‌ଏଫ୍‌ ଯବାନଙ୍କ ପରିବାର ଏହା ଏକ ବଡ଼ ଆଶ୍ୱସ୍ତି ବୋଲି କହିଛନ୍ତି ଏବଂ ତାଙ୍କୁ ସୁରକ୍ଷିତ ଭାବେ ଫେରାଇ ଆଣିବା ପାଇଁ ସରକାରଙ୍କ ଉଦ୍ୟମକୁ ଧନ୍ୟବାଦ ଜଣାଇଛନ୍ତି।

Advertisment

ବିଏସ୍‌ଏଫ୍‌ ଯବାନ ପାକିସ୍ତାନରେ ଅଟକ ରହିବା ପରେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ବ୍ୟକ୍ତିଗତ ଭାବେ ଏକାଧିକ ଥର ତାଙ୍କ ପତ୍ନୀଙ୍କ ସହ ଯୋଗାଯୋଗ କରି ଆଶ୍ୱାସନା ଦେଇଥିଲେ। ପଶ୍ଚିମବଙ୍ଗ ବିଜେପି ସଭାପତି ସୁକାନ୍ତ ମଜୁମଦାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଧନ୍ୟବାଦ ଜଣାଇଛନ୍ତି। ସ’ଙ୍କୁ ଅଟକ ରଖାଯିବା ପରେ ଉଭୟ ଭାରତୀୟ ସେନା ଓ ପାକିସ୍ତାନ ରେଞ୍ଜର୍ସ ଏକ ଫ୍ଲାଗ୍ ମିଟିଂ କରି ଘଟଣାର ସମାଧାନ କରିବା ସହ ଯବାନଙ୍କୁ ମୁକ୍ତ କରିଥିଲେ।