ନୂଆଦିଲ୍ଲୀ: ଜମ୍ମୁ-କାଶ୍ମୀରର ପହଲଗାମରେ ଆତଙ୍କବାଦୀ ଆକ୍ରମଣରେ ୨୬ ଜଣଙ୍କ ମୃତ୍ୟୁ ହେବାର ସପ୍ତାହକ ପରେ ବୁଧବାର ଶୀର୍ଷ ସରକାରୀ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ଆତଙ୍କବାଦୀଙ୍କୁ ପ୍ରୋତ୍ସାହନ ଦେବା ଓ ଆଶ୍ରୟ ଦେବାର ରେକର୍ଡ ପାକିସ୍ତାନର ରହିଛି ଏବଂ ଏହା ବିଶ୍ୱର ସବୁଠାରୁ ବିପଜ୍ଜନକ ଆତଙ୍କବାଦୀ ଶକ୍ତି ମଧ୍ୟରୁ ଅନ୍ୟତମ। ବିଶେଷ କରି ୨୦୧୧ ମସିହାରେ ଆମେରିକାର ଏକ ସାମରିକ ଅଭିଯାନରେ ଅଲକାଏଦା ନେତା ଓସାମା ବିନ୍ ଲାଡେନକୁ ପାକିସ୍ତାନର ଆବୋଟାବାଦରେ ଠାବ କରାଯାଇଥିଲା। ପୂର୍ବତନ ପ୍ରଧାନମନ୍ତ୍ରୀ ନୱାଜ ସରିଫ ଓ ଜେନେରାଲ ପରଭେଜ ମୁସାରଫଙ୍କ ସମେତ ପାକିସ୍ତାନର ବରିଷ୍ଠ ରାଜନେତାଙ୍କ ବୟାନରେ ସେମାନେ ସ୍ୱୀକାର କରିଛନ୍ତି ଯେ ୨୬/୧୧ ମୁମ୍ବାଇ ଆକ୍ରମଣ ଭଳି ସୀମାପାର ଆତଙ୍କୀ ଘଟଣାରେ ସେମାନଙ୍କ ସରକାରଙ୍କ ଭୂମିକା ରହିଛି। 

Advertisment

ଆତଙ୍କବାଦୀଙ୍କୁ ପାଣ୍ଠି ଯୋଗାଣ ସମ୍ପର୍କରେ ପଚରାଯିବାରୁ ପାକିସ୍ତାନର ଜଣେ ମନ୍ତ୍ରୀ କହିଛନ୍ତି ଯେ ତାଙ୍କ ଦେଶ ଆମେରିକା ପାଇଁ ଏହି କୁତ୍ସିତ କାମ କରିଛି। ୨୦୦୮ ଓ ୨୦୧୧ରେ କାବୁଲରେ ଥିବା ଭାରତୀୟ ଓ ଆମେରିକୀୟ ଦୂତାବାସ ଉପରେ ଆକ୍ରମଣ, ୨୦୨୪ରେ ମସ୍କୋର ଏକ କନ୍‌ସର୍ଟ ହଲରେ ହୋଇଥିବା ଆକ୍ରମଣ ଏବଂ ୨୦୦୫ରେ ଲଣ୍ଡନରେ ହୋଇଥିବା ବୋମା ବିସ୍ଫୋରଣ ଭଳି ଆତଙ୍କବାଦୀ ଆକ୍ରମଣ ପାକିସ୍ତାନ ସରକାରଙ୍କ ଦ୍ୱାରା ପ୍ରାୟୋଜିତ ଥିଲା ବୋଲି ସୂତ୍ରରୁ ଜଣାପଡିଛି। ଏସବୁ ଓ ଅନ୍ୟାନ୍ୟ ମାମଲାରେ ଆତଙ୍କବାଦୀମାନଙ୍କୁ ପାକ୍ ନେଟୱର୍କର ଲଜିଷ୍ଟିକ୍ କିମ୍ବା ଆଦର୍ଶଗତ ସମର୍ଥନ ମିଳିଥାଇପାରେ ବୋଲି ତଦନ୍ତରୁ ଜଣାପଡ଼ିଛି। ଇସଲାମାବାଦ ଓ ପାକ୍ ସେନା ସୈନିକମାନଙ୍କୁ ଦକ୍ଷିଣ ଏସିଆରେ ଦଶନ୍ଧି ଧରି ଆତଙ୍କବାଦକୁ ପ୍ରୋତ୍ସାହିତ କରୁଥିବା ‘ଜିହାଦୀ ନେତା’ରେ ପରିଣତ କରିଛନ୍ତି। ୨୦୧୯ ଫେବ୍ରୁଆରିରେ ଜମ୍ମୁ-କାଶ୍ମୀରର ପୁଲଵାମାରେ ହୋଇଥିବା ଆକ୍ରମଣ ପାଇଁ ଦାୟୀ ଲସ୍କର ଓ ଜୈସ-ଏ-ମହମ୍ମଦ ସମେତ ଏକାଧିକ ଆତଙ୍କବାଦୀ ସଂଗଠନ ପାଇଁ ପାକିସ୍ତାନ ତା’ର ଅଞ୍ଚଳରେ ଏକାଧିକ ପ୍ରଶିକ୍ଷଣ ଶିବିର ସ୍ଥାପନ କରିବା ସହ ପାଣ୍ଠି ଯୋଗାଉଛି।