ଇସଲାମାବାଦ: ଖାଇବର ପାସ୍ତୁନଖ୍ବାର କୁର୍ରମ ଅଞ୍ଚଳରେ ପାକିସ୍ତାନୀ ସେନା ଏକ ପ୍ରମୁଖ ସାମରିକ କାର୍ଯ୍ୟ ଆରମ୍ଭ କରିଛି। କୁହାଯାଉଛି ଯେ, ପାକିସ୍ତାନୀ ସେନା ମୁଖ୍ୟ ଜେନେରାଲ ଅସିମ ମୁନିରଙ୍କ ନିର୍ଦ୍ଦେଶରେ ବହୁ ସଂଖ୍ୟକ ସୈନିକ ଅସ୍ତ୍ରଶସ୍ତ୍ର ସହିତ କୁର୍ରମ ଅଞ୍ଚଳରେ ପହଞ୍ଚିଛନ୍ତି। ପାକିସ୍ତାନୀ ଗଣମାଧ୍ୟମ ଅନୁଯାୟୀ,ସେନା ଆତଙ୍କବାଦୀଙ୍କ ଶିବିରକୁ ଧ୍ୱଂସ କରିବା ପାଇଁ ବହୁ ପରିମାଣରେ ତୋପ ବ୍ୟବହାର କରୁଛି।
କୁର୍ରମ ଜିଲ୍ଲାର ବାଗାନ, ମାଣ୍ଡୋରି, ଚାପରି ଏବଂ ଚାପରି ପଡାଭ ଆଦି ୪ଟି ଗାଁରେ ଏହି ସାମରିକ ଅପରେସନ ଚାଲିଛି। ଶିଆ ଏବଂ ସୁନ୍ନି ମୁସଲମାନମାନଙ୍କ ମଧ୍ୟରେ ଯୁଦ୍ଧକ୍ଷେତ୍ରରେ ପରିଣତ ହୋଇଥିବା ପୈରାଚିନାରକୁ ସଂଯୋଗ କରୁଥିବା ମୁଖ୍ୟ ରାସ୍ତା ମଧ୍ୟ ଗତ ତିନି ମାସ ଧରି ବନ୍ଦ ରହିଛି।
ପାକିସ୍ତାନର ଏହି କୁର୍ରମ ଅଞ୍ଚଳରେ ଗତ କିଛି ଦଶନ୍ଧି ଧରି ଶିଆ ଏବଂ ସୁନ୍ନି ମୁସଲମାନମାନଙ୍କ ମଧ୍ୟରେ ପ୍ରବଳ ହିଂସା ଘଟିଛି। ନିକଟରେ ସୁନ୍ନି ମୁସଲମାନମାନେ ୪୫ ଜଣ ଶିଆ ତୀର୍ଥଯାତ୍ରୀଙ୍କୁ ହତ୍ୟା କରିଥିଲେ। ଏହି ଘଟଣା ୨୧ ନଭେମ୍ବର ୨୦୨୪ରେ ବାଗାନ ସହରରେ ଘଟିଥିଲା। ଏହା ପରେ ଅନେକ ଦିନ ଧରି ଦୁଇପକ୍ଷଙ୍କ ମଧ୍ୟରେ ମୁହାଁମୁହିଁ ସ୍ଥିତି ଜାରି ରହିଥିଲା। ଯେଉଁଥିରେ ପ୍ରାୟ ୧୪୦ଜଣଙ୍କର ମୃତ୍ୟୁ ଘଟିଥିଲା।
ଏହା ପରେ ପାକିସ୍ତାନୀ ସେନା ଏବଂ ସରକାର ଅଞ୍ଚଳରେ ଦୁଇପକ୍ଷଙ୍କ ମଧ୍ୟରେ ସମନ୍ୱୟ ଆଣିବାକୁ ଚେଷ୍ଟା କରିଥିଲେ ମଧ୍ୟ ଏହା ବିଫଳ ହୋଇଥିଲା। ଉଭୟ ଗୋଷ୍ଠୀ ଏହି କ୍ଷେତ୍ରରେ ଅନେକ ବଙ୍କର ନିର୍ମାଣ କରିଛନ୍ତି। ସେମାନେ ମଧ୍ୟ ସେନା ଏବଂ ସରକାରୀ ଲୋକଙ୍କ ଉପରେ ଆକ୍ରମଣ କରୁଛନ୍ତି।
ବର୍ତ୍ତମାନ ପାକିସ୍ତାନୀ ସେନା ଏହି ଅଞ୍ଚଳ ଖାଲି କରିବାକୁ ଏକ ପ୍ରମୁଖ ସାମରିକ କାର୍ଯ୍ୟ ଆରମ୍ଭ କରିଛି। ଏହି ଅଞ୍ଚଳର ବହୁ ସଂଖ୍ୟକ ଲୋକଙ୍କୁ ସୁରକ୍ଷିତ ସ୍ଥାନକୁ ପଠାଯାଇଛି। ଏହି ସମଗ୍ର ଅଞ୍ଚଳରେ ପ୍ରଶାସନ କର୍ଫ୍ୟୁ ଲାଗୁ କରିଛି। ଏହାପୂର୍ବରୁ ସହାୟତା ସାମଗ୍ରୀ ବୋଝେଇ ଟ୍ରକ ଉପରେ ଏକ ବଡ଼ ଆକ୍ରମଣ ହୋଇଥିଲା। ଯେଉଁଥିରେ ୬ଜଣ ସହାୟତା କର୍ମଚାରୀଙ୍କ ମୃତ୍ୟୁ ଘଟିଥିଲା। ଅନେକ ଲୋକଙ୍କୁ ମଧ୍ୟ ଅପହରଣ କରାଯାଇଥିଲା। ପାକିସ୍ତାନୀ ସେନାର ସଶସ୍ତ୍ର ଯାନ ମଧ୍ୟ ଏହି ଅଞ୍ଚଳକୁ ପଠାଯାଇଛି ଏବଂ ସେନା ଧିରେଧିରେ ଆଗକୁ ବଢୁଛି। ଅନେକ ବଙ୍କରକୁ ପାକିସ୍ତାନୀ ସେନା ନିଜର ନିୟନ୍ତ୍ରଣକୁ ନେଇଛି।
ଅଧିକ ପଢ଼ନ୍ତୁ: ଜାତିସଂଘରେ ଚୀନ୍ ପାଇଁ ସଙ୍କଟ: ସୁରକ୍ଷା ପରିଷଦର ସଦସ୍ୟ ହୋଇପାରେ ଫିଲିପାଇନ୍ସ
କୁର୍ରମବାସୀଙ୍କୁ ସେମାନଙ୍କ ଘରେ ରହିବାକୁ ନିର୍ଦ୍ଦେଶ ଦିଆଯାଇଛି। ଅପରାଧୀଙ୍କୁ ଦେଖି ଗୁଳି ଚଳାଇବାକୁ ନିର୍ଦ୍ଦେଶ ଦିଆଯାଇଛି। ଅନେକ ଦଶନ୍ଧି ଧରି କୁର୍ରମ ଜିଲ୍ଲାରେ ଶିଆ ଏବଂ ସୁନ୍ନି ହିଂସା ଚାଲିଆସୁଛି। ୨୦୨୫ ଜାନୁଆରି ୧ ରେ ଉଭୟ ପକ୍ଷ ଏକ ଚୁକ୍ତିନାମା ସ୍ୱାକ୍ଷର କରିଥିଲେ ମଧ୍ୟ ଏହାକୁ ପାଳନ କରି ନଥିଲେ। ଉଭୟପକ୍ଷ କହିଥିଲେ ଯେ, ସେମାନେ ଅସ୍ତ୍ର ବିରତି କରିବେ। ଫେବ୍ରୁଆରୀ ୨୦୨୫ସୁଦ୍ଧା ସମସ୍ତ ବଙ୍କରକୁ ଧ୍ୱଂସ କରିବାକୁ ପାକିସ୍ତାନୀ ସେନା ଅଣ୍ଟା ଭିଡ଼ିଛି।
ଅଧିକ ପଢ଼ନ୍ତୁ: ମୁଖ୍ୟମନ୍ତ୍ରୀ ନୁହେଁ ସୁପର ମୁଖ୍ୟମନ୍ତ୍ରୀ ଚଳାଉଛନ୍ତି ସରକାର: ତେଜସ୍ୱୀ