ଜମ୍ମୁ-କଶ୍ମୀରର କଠୁଆରେ ବୋମା ସହିତ ପ୍ରବେଶ କରୁଥିବା ପାକିସ୍ତାନୀ ଡ୍ରୋନକୁ ଗୁଳି କରି ଖସାଇଲେ ଭାରତୀୟ ସେନା
ନୂଆଦିଲ୍ଲୀ: ପାକିସ୍ତାନର ଡ୍ରୋନ ଆକ୍ରମଣକୁ ପଣ୍ଡ କଲା ଭାରତୀୟ ସେନା। ଜମ୍ମୁ-କଶ୍ମୀରର କଠୁଆ ଜିଲ୍ଲାର ହିରାନଗର ସେକ୍ଟରରେ ଥିବା ଅନ୍ତର୍ଜାତୀୟ ସୀମା ନିକଟରେ ପାକିସ୍ତାନର ଏକ ଡ୍ରୋନକୁ ତଳକୁ ଖସାଇଛି ସେନା। ଡ୍ରୋନରେ ୭ଟି ୟୁଜିବିଏଲ ଗ୍ରେନେଡ ଓ ୭ଟି ବୋମା ଥିଲା ବୋଲି କୁହାଯାଇଛି। ଏହି ଡ୍ରୋନଟି ଭାରତୀୟ ସୀମା ଆଡକୁ ମାଡ଼ିଆସୁଥିବା ବେଳେ ତାକୁ ଭାରତୀୟ ସେନା ଗୁଳି କରି ଖସାଇଥିଲା।
Sambad is now on WhatsApp
Join and get latest news updates delivered to you via WhatsApp
ଆଗକୁ ଅମରନାଥ ଯାତ୍ରା ଆରମ୍ଭ ହେବାକୁ ଥିବା ବେଳେ ଆତଙ୍କବାଦୀମାନେ ଆକ୍ରମଣର ଏଭଳି ଯୋଜନା କରୁଛନ୍ତି। ପୂର୍ବରୁ ଗୁଇନ୍ଦା ବିଭାଗ ଭାରତୀୟ ସେନା ଓ ପୁଲିସକୁ ଏନେଇ ସୂଚାଇଥିବା ବେଳେ ଏବେ ସୀମାରେ ଏବଂ ଅମରନାଥ ଯାତ୍ରାର ପ୍ରସ୍ତୁତି ଉପରେ କଡ଼ା ନଜର ରଖାଯାଉଛି।
ଡ୍ରୋନକୁ ତଳକୁ ଖସାଯିବା ସହ ସେଥିରୁ ସାତୋଟି ୟୁଜିବିଏଲ ଗ୍ରେନେଡ ଏବଂ ସାତୋଟି ଚୁମ୍ବକୀୟ ବୋମା ଉଦ୍ଧାର କରାଯାଇଛି। ଅମରନାଥ ଯାତ୍ରୀଙ୍କୁ ଟାର୍ଗେଟ କରିବା ପାଇଁ ଏହି ସବୁ ବିସ୍ଫୋରକ ସାମଗ୍ରୀ ଭାରତ ସୀମାକୁ ଆସୁଥାଇପାରେ ବୋଲି କଠୁଆର ଏସଏସପି କହିଛନ୍ତି।
ଏହି ଅଞ୍ଚଳରେ ଡ୍ରୋନ ଚଳାଚଳ ଅଧିକ ହେବାରୁ ସର୍ଚ୍ଚ ଅପରେସନକୁ କଡ଼ାକଡ଼ି କରାଯାଇଛି। ପ୍ରତିଦିନ ପୁଲିସ ସେହି ଅଞ୍ଚଳକୁ ଯାଞ୍ଚ ପାଇଁ ଯାଉଥିବା ବେଳେ ଆଜି ଏକ ଡ୍ରୋନକୁ ଠାବ କରି ତଳକୁ ଖସାଇଥିବା କହିଛନ୍ତି କଠୁଆର ଏସଏସପି ।
୪୩ ଦିନିଆ ଅମରନାଥ ଯାତ୍ରା ଜୁନ୍ ୩୦ ରୁ ଦୁଇଟି ମାର୍ଗରେ ଆରମ୍ଭ ହେବାର କାର୍ଯ୍ୟକ୍ରମ ରହିଛି। ଏନେଇ ଏବେ ଏହି ଦୁଇଟି ମାର୍ଗର ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଉଛି।