ନୂଆଦିଲ୍ଲୀ: ପାକିସ୍ତାନରେ ଏବେ ଦେଖାଦେଇଥିବା ଜଳସଙ୍କଟ ଆଗକୁ ଅଧିକ ଗମ୍ଭୀର ରୂପ ନେବା ଆଶଙ୍କା କରାଯାଉଛି। ଏଭଳି ସ୍ଥିତିରେ ସିନ୍ଧୁ ଜଳ ଚୁକ୍ତିର ପୁନର୍ବିଚାର ପାଇଁ ପାକିସ୍ତାନ ପୁଣି ଥରେ ଭାରତକୁ ନିବେଦନ କରିଛି। ପାକିସ୍ତାନର ଜଳସମ୍ପଦ ମନ୍ତ୍ରଣାଳୟ ଭାରତର ଜଳଶକ୍ତି ମନ୍ତ୍ରଣାଳୟକୁ ଚିଠି ଲେଖି ସିନ୍ଧୁ ଚୁକ୍ତିକୁ ସ୍ଥଗିତ ରଖିବା ନିଷ୍ପତ୍ତିର ପୁନର୍ବିଚାର କରିବାକୁ ଅନୁରୋଧ କରିଛି। ଏହି ଚିଠିରେ ପାକିସ୍ତାନ କହିଛି ଯେ ଭାରତର ଏହି ପଦକ୍ଷେପ ପାକିସ୍ତାନରେ ଜଳ ସଙ୍କଟ ନେଇ ଜଟିଳ ସ୍ଥିତି ସୃଷ୍ଟି କରିବ। ସୂଚନାଯୋଗ୍ୟ, ଗତ ମାସ ୨୨ ତାରିଖରେ କାଶ୍ମୀରର ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣ ପରେ ଭାରତ ପଡ଼ୋଶୀ ଦେଶ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବା ସହ ୧୯୬୦ ମସିହାର ସିନ୍ଧୁ ଜଳ ଚୁକ୍ତିକୁ ସ୍ଥଗିତ ରଖିଥିଲା। ପାକିସ୍ତାନ ଆତଙ୍କବାଦକୁ ସମର୍ଥନ ବନ୍ଦ ନ କରିବା ପର୍ଯ୍ୟନ୍ତ ସରକାର ଏହି ଚୁକ୍ତିକୁ ସ୍ଥଗିତ ରଖିବାକୁ ନିଷ୍ପତ୍ତି ନେଇଛନ୍ତି। ଗତକାଲି ବୈଦେଶିକ ବ୍ୟାପାର ମନ୍ତ୍ରଣାଳୟ ସ୍ପଷ୍ଟ କରିଥିଲା ଯେ ପାକିସ୍ତାନ ଆତଙ୍କବାଦକୁ ସମର୍ଥନ ବନ୍ଦ ନ କରିବା ପର୍ଯ୍ୟନ୍ତ ଭାରତ ସିନ୍ଧୁ ଜଳ ଚୁକ୍ତିକୁ କାର୍ଯ୍ୟକାରୀ କରିବ ନାହିଁ।

Advertisment

ସିନ୍ଧୁ ଜଳଚୁକ୍ତି କାର୍ଯ୍ୟକାରୀ ନେଇ ଭାରତ ପାକିସ୍ତାନର କୌଣସି ଆବେଦନକୁ ବିଚାର କରିବା ଲାଗି ସ୍ପଷ୍ଟ ମନା କରିଦେଇଛି। ସୂଚନାଯୋଗ୍ୟ, ଦୁଇ ଦିନ ତଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଦେଶବାସୀଙ୍କୁ ଦେଇଥିବା ଉଦ୍‌ବୋଧନରେ କହିଥିଲେ ଯେ ରକ୍ତ ଓ ଜଳ ଏକାଠି ପ୍ରବାହିତ ହୋଇପାରିବ ନାହିଁ। ପ୍ରଧାନମନ୍ତ୍ରୀ କହିଥିଲେ, ଆତଙ୍କବାଦ ଓ କଥାବାର୍ତ୍ତା ଏକାଠି ହୋଇପାରିବ ନାହିଁ କି ଆତଙ୍କବାଦ ଏବଂ ବାଣିଜ୍ୟ ମଧ୍ୟ ଏକାଠି ହୋଇପାରିବ ନାହିଁ। ସାମ୍ପ୍ରତିକ ଉତ୍ତେଜନା ଓ ସଂଘର୍ଷ ଭିତରେ ଭାରତ ପାକିସ୍ତାନକୁ ବିଭିନ୍ନ ଉପାୟରେ ଏବଂ ଅନେକ କ୍ଷେତ୍ରରେ କଡ଼ା ଝଟକା ଦେଇଛି। ସିନ୍ଧୁ ଜଳ ଚୁକ୍ତିକୁ ବାତିଲ କରି ଭାରତ ପାକିସ୍ତାନର ଅର୍ଥନୈତିକ ମେରୁଦଣ୍ଡକୁ ଭାଙ୍ଗିଦେଇଛି। କାରଣ ସିନ୍ଧୁ ନଦୀକୁ ପଞ୍ଜାବ ଓ ପାକିସ୍ତାନର ଜୀବନରେଖା କୁହାଯାଏ। ଏହା କେବଳ ପାନୀୟଜଳ ଯୋଗାଣ କରେ ନାହିଁ, ବରଂ ପାକିସ୍ତାନର ଚାଷ ମଧ୍ୟ ଏହି ଜଳ ଉପରେ ନିର୍ଭରଶୀଳ।  ସିନ୍ଧୁ ଜଳ ଚୁକ୍ତି ଅନୁଯାୟୀ ଭାରତ ସିନ୍ଧୁ ଓ ଏହାର ଶାଖା ନଦୀରୁ ୧୯.୫ ପ୍ରତିଶତ ପାଣି ପାଉଥିବା ବେଳେ ପାକିସ୍ତାନ ପ୍ରାୟ ୮୦ ପ୍ରତିଶତ ଜଳ ପାଇଥାଏ। ସିନ୍ଧୁ ଜଳ ରୋକିବା ପାଇଁ ଆବଶ୍ୟକ ଭିତ୍ତିଭୂମି ବିକାଶ ଉପରେ ମଧ୍ୟ ଭାରତ ଏବେ ଗୁରୁତ୍ବ ଦେଉଛି।