ନୂଆଦିଲ୍ଲୀ: ଭୂପୃଷ୍ଠରୁ ନିକ୍ଷେପ କରାଯିବା ଭଳି ୭୫୦ କିଲୋମିଟର ଦୂର ଲକ୍ଷଭେଦୀ ପାକିସ୍ତାନୀ କ୍ଷେପଣାସ୍ତ୍ର ଦ୍ୱିତୀୟ ବାବର ପରୀକ୍ଷଣ ବେଳେ ଦୁର୍ଘଟଣାଗ୍ରସ୍ତ ହୋଇଥିବା ଜଣାପଡ଼ିଛି । ମାର୍ଚ ୧୯ ତାରିଖ ଦିନ ବାଲୋଚିସ୍ତାନ ଅନ୍ତର୍ଗତ ସୋନମିଆନି ପରୀକ୍ଷଣ ରେଞ୍ଜରୁ ଉତକ୍ଷେପିତ ହେବାର ଦୁଇ ମିନିଟ ପରେ ଏହାର ଡେଲିଭରି ପ୍ଲାଟଫର୍ମ ଭାଙ୍ଗିପଡ଼ିଥିଲା । ସେତେବେଳକୁ କ୍ଷେପଣାସ୍ତ୍ରଟି ମାତ୍ର ୧୪ କିଲୋମିଟର ଯାଇଥିଲା ।
Sambad is now on WhatsApp
Join and get latest news updates delivered to you via WhatsApp
ନିରାପତ୍ତା ଯୋଜନାକାରୀ ଏବଂ ପାକିସ୍ତାନର ପ୍ରତ୍ୟକ୍ଷଦର୍ଶୀଙ୍କ କହିବା ଅନୁସାରେ, ଏହା ହେଉଛି କ୍ଷେପଣାସ୍ତ୍ର ଦ୍ୱିତୀୟ ବାବରର କ୍ରମାଗତ ଦ୍ୱିତୀୟ ବିଫଳତା । ଏହି ସେମି-ସୋନିକ୍ କ୍ଷେପଣାସ୍ତ୍ରର ପୂର୍ବବର୍ତ୍ତୀ ପରୀକ୍ଷଣ ୨୦୧୮ ମସିହା ଏପ୍ରିଲ୍ ୧୦ ତାରିଖରେ କରାଯାଇଥିଲା । ତାହା ମଧ୍ୟ ବିଫଳ ହୋଇଥିଲା ।
ବିଶେଷସୂତ୍ରରୁ ପ୍ରକାଶ ଯେ ଭାରତର “ଡିଆରଡିଓ’ ଦ୍ୱାରା ବିକଶିତ ୧୦୦୦ କି. ମି. ଦୂରଭେଦୀ “ନିର୍ଭୟ’ କ୍ରୁଜ୍ କ୍ଷେପଣାସ୍ତ୍ର ସହ ମୁକାବିଲା କରିବାକୁ ପାକିସ୍ତାନ ପ୍ରଥମ ମୋଗଲ ସମ୍ରାଟ ବାବରଙ୍କ ନାମାନୁସାରେ ଏହି କ୍ଷେପଣାସ୍ତ୍ର ନିର୍ମାଣ କରୁଛି । ଏହାକୁ ନିର୍ମାଣ କରାଇବାରେ ପାକିସ୍ତାନକୁ ସହଯୋଗ କରୁଛି ଚୀନ୍ । ଏଥିପାଇଁ ଦ୍ୱିତୀୟ ବାବର କ୍ଷେପଣାସ୍ତ୍ର ପରୀକ୍ଷା ପୂର୍ବରୁ ପାକିସ୍ତାନର ଦଳେ କ୍ଷେପଣାସ୍ତ୍ର ବିଶେଷଜ୍ଞ ଚୀନ୍ ଗସ୍ତରେ ଯାଇଥିଲେ ।
ଭାରତର “ନିର୍ଭୟ’ କ୍ଷେପଣାସ୍ତ୍ର କ୍ରମାଗତ ୬ଥର ସଫଳତାର ପରୀକ୍ଷା ହୋଇସାରିଲାଣି । ଶେଷ ପରୀକ୍ଷଣ ବେଳେ ଏହା ନିର୍ଦ୍ଧାରିତ ଲକ୍ଷ୍ୟ ଭେଦ କରିଥିଲା ।