ପୁଅ କିନ୍ନର ପ୍ରେମରେ ପଡ଼ିବାରୁ ବାପାମାଆଙ୍କ ଆତ୍ମହତ୍ୟା

ତିରୁପତି: ଜଣେ କିନ୍ନରଙ୍କୁ ପୁଅ ଭଲ ପାଇବାରୁ ଆନ୍ଧ୍ରପ୍ରଦେଶର ଏକ ମଧ୍ୟବୟସ୍କ ଦମ୍ପତି କୀଟନାଶକ ପିଇ ଆତ୍ମହତ୍ୟା କରିଛନ୍ତି। ଏଭଳି ଅଭାବନୀୟ ଘଟଣା ଘଟିଛି ନନ୍ଦିଆଲ ଜିଲ୍ଲା ସଦର ମହକୁମାସ୍ଥିତ ଏସ୍‌ବିଆଇ କଲୋନୀରେ। ମୃତକମାନେ ସୁବା ରାୟୁଡୁ ଓ ସରସ୍ୱତୀ ବୋଲି ନନ୍ଦିଆଲ ପୁଲିସ ସୂଚନା ଦେଇଛି। ସେମାନଙ୍କର ଏକମାତ୍ର ପୁଅ ସୁନୀଲ ବିଟେକ୍ ଶେଷ କରି ଅଟୋରିକ୍ସା ଡ୍ରାଇଭର ପାଲଟିଥିଲେ। ପ୍ରାୟ ତିନି ବର୍ଷ ତଳେ ସେ ସ୍ମିତା ନାମକ ଜଣେ କିନ୍ନରଙ୍କୁ ଭଲ ପାଉଥିଲେ। ଜଣେ କିନ୍ନରଙ୍କ ସହ ପୁଅର ସମ୍ପର୍କ ବିଷୟରେ ଜାଣିବା ପରେ ପିତାମାତା ତାଙ୍କୁ ବାରମ୍ବାର ଚେତାବନୀ ଦେଇଥିଲେ ଏବଂ ନିକଟରେ ସେମାନେ ତାଙ୍କୁ ନିଜ ପସନ୍ଦର ଝିଅ ସହିତ ବିବାହ କରିବାକୁ ରାଜି କରାଇବାକୁ ଚେଷ୍ଟା କରିଥିଲେ। ଯେତେବେଳେ ସୁନୀଲ ପିତାମାତାଙ୍କୁ ସ୍ପଷ୍ଟ କରିଥିଲେ ଯେ ସେ ସ୍ମିତା (ଟିଜି)ଙ୍କୁ ଭଲ ପାଆନ୍ତି ଏବଂ ସେ କେବଳ ତାଙ୍କୁ ହିଁ ବିବାହ କରିବେ, ସେତେବେଳେ ପିତାମାତା କାଉନସେଲିଂ ପାଇଁ ତାଙ୍କୁ ସ୍ଥାନୀୟ ଥାନାକୁ ମଧ୍ୟ ନେଇଥିଲେ। କିନ୍ତୁ ସୁନୀଲ ଟ୍ରାନ୍ସଜେଣ୍ଡର ସ୍ମିତାଙ୍କ ସହ ରହିବାକୁ ଜିଦ୍ ଧରିଥିଲେ।

 ଥାନାରେ ଅପମାନିତ ଅନୁଭବ କରୁଥିବା ନିରାଶ ପିତାମାତା ପ୍ରାୟ ଦୁଇ ଦିନ ତଳେ ନନ୍ଦିଆଲ ଉପକଣ୍ଠରେ ଆତ୍ମହତ୍ୟା କରିବାକୁ ନିଷ୍ପତ୍ତି ନେଇ କୀଟନାଶକ ପିଇଥିଲେ। ସେମାନଙ୍କୁ ତୁରନ୍ତ ସ୍ଥାନୀୟ ସରକାରୀ ହସ୍ପିଟାଲରେ ଭର୍ତ୍ତି କରାଯାଇଥିଲେ ହେଁ ବୁଧବାର ଉଭୟଙ୍କର ମୃତ୍ୟୁ ଘଟିଛି। ସ୍ଥାନୀୟ ପୋଲିସ କହିଛି ଯେ କୌଣସି ଅଭିଯୋଗ ନ ମିଳିବାରୁ କାହା ବିରୋଧରେ କୌଣସି ମାମଲା ରୁଜୁ ହୋଇନାହିଁ। କିନ୍ତୁ ସମ୍ପର୍କୀୟ ଓ ପଡ଼ୋଶୀମାନେ ପୁଲିସକୁ କହିଛନ୍ତି ଯେ ସ୍ମିତାଙ୍କ ନିକଟତର କିନ୍ନରମାନଙ୍କର ଏକ ଗୋଷ୍ଠୀ ସେମାନଙ୍କ ପୁଅ ସୁନୀଲଙ୍କ ଦ୍ୱାରା ନିଆଯାଇଥିବା ଋଣ ବାହାନାରେ ସୁବା ରାୟୁଡୁ ଓ ସରସ୍ୱତୀଙ୍କୁ ହଇରାଣ କରୁଥିଲେ। କିନ୍ନରଙ୍କ ନିର୍ଯାତନା ଓ ଅପମାନ ଯୋଗୁଁ ଦମ୍ପତି ଆତ୍ମହତ୍ୟା କରିଥିଲେ।