ସନ୍ଦେହ କରୁଥିବା ଇଣ୍ଟର୍ଣ୍ଣ ଓ ଡାକ୍ତରଙ୍କ ନାମ ସିବିଆଇକୁ ଦେଲେ କୋଲକାତା ପୀଡ଼ିତାଙ୍କ ଅଭିଭାବକ

କୋଲକାତା: କୋଲକାତାର ଆରଜି କର ମେଡିକାଲ କଲେଜ ଏବଂ ହସ୍ପିଟାଲ୍‌ରେ ଦୁଷ୍କର୍ମ ଓ ହତ୍ୟା କରାଯାଇଥିବା ଟ୍ରେନି ଡାକ୍ତରଙ୍କ ପିତାମାତା ସେଣ୍ଟ୍ରାଲ ବ୍ୟୁରୋ ଅଫ୍ ଇନଭେଷ୍ଟିଗେସନ୍ (ସିବିଆଇ) କୁ କହିଛନ୍ତି ଯେ ଡାକ୍ତରଖାନାର ଅନେକ ଇଣ୍ଟର୍ଣ୍ଣ ଏବଂ ଡାକ୍ତର ଏହି ଅପରାଧରେ ସମ୍ପୃକ୍ତ ହୋଇପାରନ୍ତି।।
ମୃତ ଟ୍ରେନି ଡାକ୍ତରଙ୍କ ଅଭିଭାବକମାନେ ସିବିଆଇକୁ ସନ୍ଦେହ କରୁଥିବା କିଛି ଜଣଙ୍କ ନାମର ଏକ ତାଲିକା ମଧ୍ୟ ଦେଇଛନ୍ତି। କଲିକତା ହାଇକୋର୍ଟଙ୍କ ନିର୍ଦ୍ଦେଶ ଅନୁଯାୟୀ ସିବିଆଇ ଏହି ମାମଲାର ତଦନ୍ତ କରୁଛି।

ସିବିଆଇ ଅଧିକାରୀ ନ୍ୟୁଜ୍ ଏଜେନ୍ସି ପିଟିଆଇକୁ କହିଛନ୍ତି, " ପୀଡ଼ିତାଙ୍କ ପିତାମାତା ଆମକୁ କହିଥିଲେ ଯେ ସେମାନେ ନିଜ ଝିଅ ଯୌନ ନିର୍ଯାତନା ତଥା ହତ୍ୟା ପଛରେ ଏକାଧିକ ଲୋକଙ୍କ ସମ୍ପୃକ୍ତି ଥିବା ସନ୍ଦେହ କରୁଛନ୍ତି। ସେମାନେ ଡାକ୍ତରଖାନାରେ ତାଙ୍କ ସହ କାମ କରୁଥିବା କିଛି ଇଣ୍ଟର୍ଣ୍ଣ ଏବଂ ଡାକ୍ତରଙ୍କ ନାମ ଦେଇଛନ୍ତି।"
ସିବିଆଇ ଏହି ବ୍ୟକ୍ତିବିଶେଷଙ୍କୁ ପଚରାଉଚରା କରିବା ସହିତ କୋଲକାତା ପୁଲିସର ଅଧିକାରୀମାନେ ମଧ୍ୟ ପ୍ରାଥମିକ ଅନୁସନ୍ଧାନର ଅଂଶବିଶେଷ ଥିଲେ। ସିବିଆଇ ଅଧିକାରୀ କହିଛନ୍ତି ଯେ ଆମେ ଅତି କମରେ ୩୦ ଜଣ ସନ୍ଦିଗ୍ଧଙ୍କୁ ଚିହ୍ନଟ କରିଛୁ ଏବଂ ସେମାନଙ୍କୁ ପଚରାଉଚରା ଆରମ୍ଭ କରିଛୁ।