ମୌସୁମୀ ଅଧିବେଶନ ଆରମ୍ଭରୁ ପ୍ରଶ୍ନକାଳ ହଟାଯିବା ନେଇ ବିରୋଧୀଙ୍କ ହଙ୍ଗାମା
ନୂଆଦିଲ୍ଲୀ: ଆଜି ଆରମ୍ଭ ହୋଇଛି ସଂସଦର ମୌସୁମୀ ଅଧିବେଶନ। କରୋନା କାଳରେ ସମସ୍ତ ପ୍ରୋଟକଲ ଅନୁସରଣ କରାଯାଇ ଏହି ଅଧିବେଶନ ଆରମ୍ଭ ହୋଇଛି। କରୋନା ପାଇଁ ଅଧିବେଶନର ଗୁରୁତ୍ବପୂର୍ଣ୍ଣ ଅଙ୍ଗ ପ୍ରଶ୍ନକାଳ ହଟାଯିବାକୁ ନେଇ ପୂର୍ବରୁ ଅନେକ ବିବାଦ ଦେଖା ଦେଇଥିବା ବେଳେ ଆଜି ଅଧିବେଶନ ଆରମ୍ଭ ହେବା ପରେ ଏହାକୁ ନେଇ ହଙ୍ଗାମା କରିଥିଲେ ବିରୋଧୀ।
Sambad is now on WhatsApp
Join and get latest news updates delivered to you via WhatsApp
କଂଗ୍ରେସ ସାଂସଦ ଆଧୀର ରଂଜନ ଚୌଧୁରୀ କହିଥିଲେ ଯେ, ପ୍ରଶ୍ନକାଳ ସଂସଦ ପ୍ରଣାଳୀରେ ରହିବା ଅତ୍ୟନ୍ତ ଜରୁରୀ। ଏହା ଗୃହର ଆତ୍ମା | ପ୍ରଶ୍ନକାଳ ହଟାଇ ଗଣତନ୍ତ୍ରର ହତ୍ୟା କରିବାକୁ ଚେଷ୍ଟା କରାଯାଉଛି। ବିରୋଧୀ ଦଳର ଅନ୍ୟ ସଦସ୍ୟମାନେ ମଧ୍ୟ କହିଛନ୍ତି ଯେ, ପ୍ରଶ୍ନକାଳ ଏବଂ ଏକ ଘରୋଇ ସଦସ୍ୟ ବ୍ୟବସାୟ ରହିବା ଆବଶ୍ୟକ।
ତେବେ ବିରୋଧୀଙ୍କ ହଙ୍ଗାମା ପରେ ସରକାରଙ୍କୁ ସମର୍ଥନ କରି ନିଜର ପକ୍ଷ ରଖିଥିଲେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ। ସେ କହିଥିଲେ ଯେ, ମୁଁ ଅନେକ ନେତାଙ୍କ ସହ କଥା ହୋଇଛି। ଆମକୁ ବ୍ୟତିକ୍ରମ ପରିସ୍ଥିତିରେ ସଂସଦର ପ୍ରକ୍ରିୟା ଆରମ୍ଭ କରିବାକୁ ପଡ଼ୁଛି | ଏଥିରେ ସମସ୍ତଙ୍କର ସହଯୋଗ ଆବଶ୍ୟକ | ଅଧିବେଶନ ଆରମ୍ଭ ପୂର୍ବରୁ, ଗୃହ ୪ଘଣ୍ଟା ଚାଲିବ ଏବଂ ସେଥିରେ ପ୍ରଶ୍ନକାଳ ନରହୁ ବୋଲି ମୁଁ ଅନୁରୋଧ କରିିଥିଲି | ଏହା ସହ ଅଧ ଘଣ୍ଟା ପାଇଁ ଏକ ଶୂନ୍ୟକାଳ ରହିବ ଏବଂ ଯଦି ଆପଣ କେହି କୌଣସି ପ୍ରଶ୍ନ ପଚାରିବାକୁ ଚାହାଁନ୍ତି, ତେବେ ସେ ଅଧ ଘଣ୍ଟା ମଧ୍ୟରେ ତାହା କରିପାରିବେ। ଅଧିକାଂଶ ରାଜନୈତିକ ଦଳର ନେତାମାନେ ଏଥିରେ ସହମତ ହୋଇଥିଲେ। ଏହା ପରେ ସଂସଦର ମୌସୁମୀ ଅଧିବେଶନ ପ୍ରଶ୍ନକାଳ ବିନା ଆରମ୍ଭ ହେବ ବୋଲି ନିଷ୍ପତ୍ତି ନିଆଯାଇଥିଲା। ମୁଁ ସମସ୍ତ ସମ୍ମାନିତ ସଦସ୍ୟଙ୍କୁ ଅନୁରୋଧ କରିବାକୁ ଚାହୁଁଛି ଯେ ସଂସଦର ଅଧିବେଶନ ଏକ ଅସାଧାରଣ ସମୟରେ ଅନୁଷ୍ଠିତ ହେଉଛି। ଆପଣ ସମସ୍ତଙ୍କ ସାହାଯ୍ୟ ଓ ସହଯୋଗର ଆବଶ୍ୟକତା ରହିଛି |