ନୂଆଦିଲ୍ଲୀ: ସଂସଦରେ ଜାରି ରହିଛି ମୌସୁମୀ ଅଧିବେଶନ । ଅପରେସନ ସିନ୍ଦୂର ପରେ ଏହା ପ୍ରଥମ ଅଧିବେଶନ ଥିବା ବେଳେ ଗୃହ ପହଲଗାମ ଘଟଣାକୁ ନେଇ ସରଗରମ ରହିଛି । ତେବେ ସଂସଦର ଉଭୟ ଗୃହରେ ପ୍ରାଥମିକ ପର୍ଯ୍ୟାୟରେ ପହଲଗାମରେ ଆତଙ୍କୀ ହମଲାରେ ପ୍ରାଣ ହରାଇଥିବା ବ୍ୟକ୍ତିଙ୍କ ଉଦ୍ଦେଶ୍ୟରେ ଶୋକ ପ୍ରକାଶ କରାଯାଇଥିଲା । ପରେ ପ୍ରଶ୍ନକାଳ ଆରମ୍ଭରୁ ବିରୋଧୀ ହଙ୍ଗାମା କରିଥିଲେ । ଗୃହରେ ହୋହଲ୍ଲା ପରିସ୍ଥିତି ଦେଖା ଦେଇଥିଲା । ପରେ ଲୋକସଭାକୁ ୧୨ଟା ଯାଏଁ ମୁଲତବୀ ରଖାଯାଇଥିବା ବେଳେ ରାଜ୍ୟସଭା ମଧ୍ଯ ୧୨ ଯାଏଁ ମୁଲତବୀ ଥିଲା । ପରେ ପୁଣି ଥରେ ଜାରି ରହିଛି ଗୃହକାର୍ଯ୍ଯ ।

Advertisment

ସେପଟେ କଂଗ୍ରେସ ସଭାପତି ମଲ୍ଲିକାର୍ଜୁନ ଖଡ଼ଗେ ଅପରେସନ ସିନ୍ଦୂର ନେଇ ପ୍ରଶ୍ନ ଉଠାଇଛନ୍ତି । ଏଯାଏଁ କାହିଁକି ପହଲଗାମ ହମଲାର ପ୍ରକୃତ ଆତଙ୍କୀଙ୍କୁ ଧରାଯାଇନି କି ହତ୍ୟା କରାଯାଇନି ବୋଲି ପ୍ରଶ୍ନ କରିବା ସହ ଭାରତ-ପାକିସ୍ତାନ ଯୁଦ୍ଧରେ ଟ୍ରମ୍ପ ବାରମ୍ବାର ମଧ୍ୟସ୍ଥତା କହିବା ଭାରତ ପାଇଁ ଅପମାନଜନକ ବୋଲି କହିଛନ୍ତି ଖଡଗେ । 

ତେବେ ଖଡଗେଙ୍କୁ ଜବାବ ଦେବାକୁ ଯାଇ ନଡ୍ଡା କହିଛନ୍ତି ପହଲଗାମ୍ ହମଲାର ୮ ଦିନ ଭିତରେ ଏଭଳି ଏକ କାର୍ଯ୍ଯାନୁଷ୍ଠାନ ହେଲା ଯାହା ଆଜି ଯାଏଁ କୌଣସି ବି ଅପରେସନରେ ହୋଇନି । ସରକାର ସବୁ ପ୍ରସଙ୍ଗରେ ଆଲୋଚନା କରିବାକୁ ପ୍ରସ୍ତୁତ ଥିବା ନଡ୍ଡା କହିଥିବା ବେଳେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ମଧ୍ଯ ସମାନ କଥା ଦୋହରାଇଛନ୍ତି ।

ଅନ୍ୟପଟେ ସଂସଦର ଅଧିବେଶନ ପୂର୍ବରୁ ସମ୍ବୋଧନ କରିଥିଲେ ପ୍ରଧାନମନ୍ତ୍ରୀ । କହିଥିଲେ, ମୌସୁମୀ ଅଧିବେଶନ ରାଷ୍ଟ୍ର ପାଇଁ ଗୌରବପୂର୍ଣ୍ଣ ଅଧିବେଶନ । ଏ ଅଧିବେଶନ ବିଜୟ ଉତ୍ସବର ଅଧିବେଶନ । ପହଲଗାମ ହମଲା କଥା ମନେପକାଇଲେ ମୋଦୀ । କହିଲେ, ପହଲଗାମ୍ ନରସଂହାର ପୂରା ବିଶ୍ବ ଦେଖିଲା । ଅପରେସନ ସିନ୍ଦୂର ସଫଳ ହୋଇଥିଲା । ଆମେ ୨୨ ମିନିଟରେ ଆତଙ୍କୀ ଶିବିର ଧ୍ବଂସ କରିଥିଲୁ । ଅପରେସନ ସିନ୍ଦୂରରେ ସେନାର ଲକ୍ଷ୍ୟ ସଫଳ ହୋଇଛି । ସାରା ଦୁନିଆ ଏହି ପରିପ୍ରେକ୍ଷୀରେ ଭାରତର ସାମର୍ଥ୍ୟ ଦେଖିଲା । ବୋମା-ବନ୍ଧୁକ ଆଗରେ ସମ୍ବିଧାନର ବିଜୟ ହେଉଛି । ଦେଶରୁ ମାଓବାଦର ମୂଳତ୍ପାଟନ ହେଉଛି । ଏବେ ଦେଶର ଅନେକ ଅଞ୍ଚଳ ମାଓମୁକ୍ତ । 

ତେବେ ଶୁଭାଂଶୁ ଶୁକ୍ଳାଙ୍କ କଥା କହି ମହାକାଶରେ ତ୍ରିରଙ୍ଗା ଉଡାଇବା ଗର୍ବର ବିଷୟ ବୋଲି କହିଛନ୍ତି ମୋଦୀ । ଦେଶର ଭବିଷ୍ୟତ ଉଜ୍ବଳ ଦେଖା ଯାଉଛି । ୨୦୧୪ ପୂର୍ବରୁ ଆକାଶଛୁଆଁ ଥିଲା ମହଙ୍ଗା ଦର, ମାତ୍ର ମେଡ୍ ଇନ୍ ଇଣ୍ଡିଆ ପାଇଁ ବିଶ୍ବରେ ଆକର୍ଷଣ ବଢୁଛି । ତେବେ ଏହି ଅବସରରେ ମୌସୁମୀର ମାନେ ବୁଝାଇଛନ୍ତି ପ୍ରଧାନମନ୍ତ୍ରୀ ମୋଦୀ । କହିଛନ୍ତି- ମୌସୁମୀ ନୂତନତା ଏବଂ ନବସୃଜନର ପ୍ରତୀକ ଅଟେ । ଏପର୍ଯ୍ଯନ୍ତ ମିଳିଥିବା ଖବର ଅନୁସାରେ ଦେଶରେ ମୋସୁମୀ ସଠିକ ଭାବେ ଆଗକୁ ବଢୁଛି । ଏହି ମୌସୁମୀ କୃଷି ପାଇଁ ବେଶ ଅନୁକୂଳ । କୃଷକର ଅର୍ଥବ୍ୟବସ୍ଥା, ଦେଶର ଅର୍ଥବ୍ୟବସ୍ଥା, ଗ୍ରାମୀଣ ଜୀବନର ଅର୍ଥବ୍ୟବସ୍ଥା ଏବଂ ସବୁ ପରିବାରର ଅର୍ଥବ୍ୟବସ୍ଥା ଗୁରୁତ୍ବପୂର୍ଣ୍ଣ ଅଟେ ।