ଆତଙ୍କବାଦୀଙ୍କ ସହ ସଂପର୍କ ରଖିବା ଅଭିଯୋଗରେ ପିଡିପି ନେତା ଗିରଫ
ନୂଆଦିଲ୍ଲୀ: ରାଷ୍ଟ୍ରୀୟ ଅନୁସନ୍ଧାନକାରୀ ସଂସ୍ଥା ଏନ୍ ଆଇ ଏ ଦ୍ୱାରା ଆଜି (ବୁଧବାର) ଜଣେ ପିଡିପି ନେତା ଗିରଫ୍ ହୋଇଛନ୍ତି । ପିଡିପିର ଯୁବନେତା ୱାହିଦ ଓରଫ୍ ରେହେମାନ ପାରାଙ୍କୁ ଗିରଫ୍ କରାଯାଇଛି । ଦୁଇଦିନର ପଚରା ଉଚରା ପରେ ତାଙ୍କୁ ଗିରଫ୍ କରିଛି ଏନଆଇଏ । ପାରାଙ୍କୁ ସୋମବାର ଦିନ ଏନଆଇ ଦିଲ୍ଲୀ ମୁଖ୍ୟ କାର୍ଯ୍ୟାଳୟକୁ ଆଣି ଜେରା କରିଥିଲା । କେନ୍ଦ୍ରଶାସିତ ଅଞ୍ଚଳ ଜମ୍ମୁ-କାଶ୍ମୀରରେ ହେବାକୁ ଥିବା ଜିଲ୍ଲା ପରିଷଦ ନିର୍ବାଚନ ପାଇଁ ପାରା ନାମାଙ୍କନପତ୍ର ଦାଖଲ କରିଥିଲେ । ସେ ଏବେ ଗଠନ ହୋଇଥିବା ଗୁପକାର ସଂଗଠନର ସଦସ୍ୟ ବି ଥିଲେ ।
Sambad is now on WhatsApp
Join and get latest news updates delivered to you via WhatsApp
ଦକ୍ଷିଣ କାଶ୍ମୀର ମୁଖ୍ୟତଃ ଆତଙ୍କବାଦରେ ପ୍ରଭାବିତ ପୁଲୱାମାରେ ପୁର୍ନଉଦ୍ଧାରରେ ମହତ୍ତ୍ୱପୂର୍ଣ୍ଣ ଭୂମିକା ନେଇଥିବା ପାରା ସରକାରୀ ଗଣମାଧ୍ୟମ ପିଟିଆଇକୁ କହିଛନ୍ତି କି ଏନଆଇଏ ତାଙ୍କୁ ତାଙ୍କର ରାଜନୈତିକ କ୍ୟାରିଅର ଓ ପିଡିପିର ରାଜନୀତି ବାବଦରେ ପଚାରି ଥିଲେ । ପାରାଙ୍କୁ ପ୍ରଥମଦିନ ଏନଆଇଏ ପାଖାପାଖି ୭ ଘଂଟା ଜେରା କରିଛି । ଜମ୍ମୁ-କାଶ୍ମୀରର ନିଲମ୍ବିତ ଡିଏସପି ଦେବୀନ୍ଦର ସିଂ ମାମଲା ସହ ସଂପୃକ୍ତି ଥିବା ଅଭିଯୋଗ ହୋଇଥିଲା । ଏହାସହିତ ଗିରଫ୍ ହୋଇଥିବା ହିଜ୍ଜବୁଲ ଆତଙ୍କବାଦୀ କମାଣ୍ଡର ନିବିଡ ବାବୁର ସହଯୋଗୀ ଇରଫାନ୍ ମୀର ସହିତ ସଂପର୍କ ଥିବା ନେଇ ବି ଅଭିଯୋଗ ହୋଇଥିଲା । ଏନଆଇଏ ଦ୍ୱିତୀୟ ଦିନ ଜେରା ବେଳେ ପାରାକୁ ଦେବୀନ୍ଦର ସିଂଙ୍କ ଆର୍ଥିକ କାରବାର ଉପରେ ପଚରାଉଚରା କରିଥିଲା । ଏ ନେଇ କିଛି ସୁରାଗ ପାଇବା ପରେ ପାରାଙ୍କୁ ଗିରଫ୍ କରାଯାଇଥିବା ସୂଚନା ମିଳିଛି ।
ସୂଚନାଯୋଗ୍ୟ, ଚଳିତବର୍ଷ ଆରମ୍ଭରେ ଜମ୍ମୁ-କଶ୍ମୀର ଡିଏସପି ଦେବୀନ୍ଦର ସିଂ ୨ ଜଣ ହଜ୍ଜିବୁଲ ଆତଙ୍କବାଦୀଙ୍କ ସହ ଏକ ଗାଡିରେ ଶ୍ରୀନଗର ରାସ୍ତାରେ ବୁଲୁଥିବାର ଦେଖିବାକୁ ମିଳିଥିଲା । ଏହାପରେ ତାଙ୍କୁ ଗିରଫ୍ କରାଯାଇଥିଲା । ଏହାପରେ ଦେବୀନ୍ଦରଙ୍କ ସହ ସଂପର୍କରେ ଥିବା ବିଜେପି ନେତା ତାରିକ୍ ମୀରକୁ ଆତଙ୍କୀ ନାବେଦକୁ ଅସ୍ତ୍ରଶସ୍ତ୍ର ଯୋଗାଉଥିବା ଅଭିଯୋଗରେ ଗିରଫ୍ କରାଯାଇ ପଚରାଉଚରା ବେଳେ ସେ ପାରାଙ୍କ ନାମ କହିଥିଲା ।