ନୂଆଦିଲ୍ଲୀ:  ସୁପ୍ରିମକୋର୍ଟ ସୋମବାର ଏକ ଗୁରୁତ୍ବପୂର୍ଣ୍ଣ ଟିପ୍ପଣୀ ଦେଇ କହିଛନ୍ତି ଯେ ନାଗରିକମାନେ ବାକ୍‌ ସ୍ବାଧୀନତାର ମୂଲ୍ୟକୁ ଜାଣିବା ଉଚିତ। ବାକ୍‌ ସ୍ବାଧୀନତା ଗୁରୁତ୍ବପୂର୍ଣ୍ଣ କିନ୍ତୁ ଲୋକମାନେ ନିଜ କଥାରେ ସଂଯମତା ରକ୍ଷା କରିବା ଉଚିତ। ଜଷ୍ଟିସ ବିଭି ନାଗରତ୍ନା ଏବଂ ଜଷ୍ଟିସ କେଭି ବିଶ୍ବନାଥନଙ୍କ ଖଣ୍ଡପୀଠରେ ଆଜି ୱାଜାହତ ଖାନ୍‌ଙ୍କ ଆବେଦନର ଶୁଣାଣି ଚାଲିଥିଲା। ସୋସିଆଲ ମିଡିଆ ଇନଫ୍ଲୁଏନ୍ସର ଶର୍ମିଷ୍ଠା ପାନୋଲି ସୋସିଆଲ ମିଡିଆରେ ଅପରେସନ୍‌ ସିନ୍ଦୂରକୁ ନେଇ କିଛି ବିବାଦୀୟ ଭିଡିଓ ପୋଷ୍ଟ୍‌ କରିଥିବାରୁ ଏହାକୁ ବିରୋଧ କରି ୱାଜାହତ ତାଙ୍କ ବିରୋଧରେ ଅଭିଯୋଗ କରିଥିଲେ ଏବଂ ଶର୍ମିଷ୍ଠା ଗିରଫ ହୋଇଥିଲେ। କିନ୍ତୁ ପରେ ୱାଜାହତଙ୍କର କିଛି ବିବାଦୀୟ ଟ୍ବିଟ୍‌ ପାଇଁ ତାଙ୍କ ବିରୋଧରେ ଦେଶବ୍ୟାପୀ ବିଭିନ୍ନ ସ୍ଥାନରେ ପୁଲିସରେ ମାମଲା ମଧ୍ୟ ରୁଜୁ ହେଲା। ଆସାମ, ପଶ୍ଚିମବଙ୍ଗ, ମହାରାଷ୍ଟ୍ର, ହରିୟାଣା ଏବଂ ଦିଲ୍ଲୀ ସମେତ ୬ଟି ରାଜ୍ୟରେ ତାଙ୍କ ବିରୋଧରେ ମାମଲା ରୁଜୁ ହୋଇଥିବାରୁ ସେ ସମସ୍ତ ମାମଲାକୁ ଏକାଠି କରିବାପାଇଁ ସୁପ୍ରିମକୋର୍ଟଙ୍କ ଦ୍ବାରସ୍ଥ ହୋଇଥିଲେ। ଜଷ୍ଟିସ ନାଗରତ୍ନା ଶୁଣାଣି ସମୟରେ କହିଛନ୍ତି, ଆମେ ନାଗରିକଙ୍କ ସଂକ୍ରାନ୍ତରେ କହୁଛୁ। ଯଦି ସେମାନେ ବାକ୍‌ ସ୍ବାଧୀନତାକୁ ଉପଭୋଗ କରିବାକୁ ଚାହାନ୍ତି ତେବେ ସେମାନଙ୍କୁ ସଂଯମତା ରକ୍ଷା କରିବାକୁ ପଡ଼ିବ। ସେମାନେ ସ୍ବାଧୀନତାକୁ ଏଭଳି ଭାବେ ଦୁରୁପଯୋଗ ବା ଅପବ୍ୟବହାର କରିପାରିବେନି। ଅନ୍ୟପକ୍ଷେ ସୁପ୍ରିମକୋର୍ଟ ଆଜି ଘୃଣା ଭାଷଣ ନିୟନ୍ତ୍ରଣ କରିବାପାଇଁ କେନ୍ଦ୍ର ସରକାର ଏବଂ ରାଜ୍ୟମାନଙ୍କୁ କହିଛନ୍ତି। 
କାର୍ଟୁନିଷ୍ଟ ହେମନ୍ତ ମାଲବ୍ୟ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଆରଏସ୍‌ଏସ୍‌ କର୍ମୀମାନଙ୍କୁ ନେଇ କରିଥିବା ଏକ ବିବାଦୀୟ ସୋସିଆଲ ମିଡିଆ ପୋଷ୍ଟ ପାଇଁ କୋର୍ଟ ତାଙ୍କ ଉପରେ ପ୍ରବଳ ବର୍ଷିଛନ୍ତି। ଜଷ୍ଟିସ ସୁଧାଂଶୁ ଧୁଲିଆ ଏବଂ ଅରବିନ୍ଦ କୁମାରଙ୍କ ଖଣ୍ଡପୀଠ ହେମନ୍ତ ମାଲବ୍ୟ ତାଙ୍କ ପୋଷ୍ଟ୍‌ ହଟାଇ ପାରିବେ କି ବୋଲି ପ୍ରଶ୍ନ କରିଥିଲେ। ଏଥିପାଇଁ ସେ ତାଙ୍କ ପ୍ରସ୍ତୁତ ଥିବା ହେମନ୍ତ କହିଥିଲେ। ହେମନ୍ତଙ୍କ ପୋଷ୍ଟ୍‌ ଉତ୍ତେଜନା ବୃଦ୍ଧି କରିବାପାଇଁ ଏକ ଉଦ୍ୟମ ବୋଲି ଅଭିଯୋଗ ହୋଇଛି।