ମଧ୍ୟପ୍ରଦେଶ କଂଗ୍ରେସକୁ ଚେତାବନୀ ଦେଲା ଫୋନପେ!

ଭୋପାଳ: ମଧ୍ୟପ୍ରଦେଶ କଂଗ୍ରେସର ପୋଷ୍ଟର ଯୁଦ୍ଧ ଆଗାମୀ ଦିନରେ ଦଳ ପାଇଁ ମହଙ୍ଗା ସାବ୍ୟସ୍ତ ହୋଇପାରେ। ଡିଜିଟାଲ ପେମେଣ୍ଟ କମ୍ପାନୀ ଫୋନପେ ଏହାର ଲୋଗୋ ବ୍ୟବହାରକୁ ନେଇ କଂଗ୍ରେସକୁ କଡ଼ା ଚେତାବନୀ ଦେଇଛି। ଆଗାମୀ ଦିନରେ ମଧ୍ୟ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କୁହାଯାଇଛି। ସୂଚନାଯୋଗ୍ୟ ଯେ ଏହି ବିଧାନସଭା ନିର୍ବାଚନ ପୂର୍ବରୁ ମଧ୍ୟପ୍ରଦେଶର ଭାରତୀୟ ଜନତା ପାର୍ଟି ଏବଂ କଂଗ୍ରେସ ମଧ୍ୟରେ ପୋଷ୍ଟର ଯୁଦ୍ଧ ଚାଲିଛି। ମଧ୍ୟପ୍ରଦେଶରେ ସର୍ବପ୍ରଥମେ କମଲ ନାଥଙ୍କ ଫଟୋ ସହିତ 'ଦୁର୍ନୀତି ନାଥ' ନାମରେ ଏକ ପୋଷ୍ଟର ସବୁଆଡେ ଲଗାଯାଇଥିଲା | ପୋଷ୍ଟରରେ ଏହା ଲେଖାଯାଇଥିଲା ଯେ ଏହାକୁ ସ୍କାନ କରି ସୂଚନା ପାଆନ୍ତୁ |

ଏହା ପରେ କଂଗ୍ରେସ ପକ୍ଷରୁ ପୋଷ୍ଟର ଲଗାଯାଇଥିଲା | ଏହି ପୋଷ୍ଟର ଯୁଦ୍ଧରେ କଂଗ୍ରେସ ବିଜେପି ନେତାଙ୍କ ବିରୋଧରେ ଅଭିଯୋଗ ଆଣିଥିଲା । କଂଗ୍ରେସ ମୁଖ୍ୟମନ୍ତ୍ରୀ ଶିବରାଜ ସିଂ ଚୌହାନଙ୍କ ଫଟୋ ପୋଷ୍ଟରରେ ଲାଗିଥିବାବେଳେ ଯେଉଁଥିରେ ୫୦% କମିଶନ ଏବଂ ଫୋନ୍ ପେର ଲୋଗୋ ବ୍ୟବହାର କରିଥିଲା | ଫୋନ ପେ ସ୍କାନର ମଧ୍ୟରେ ଶିବରାଜଙ୍କ ଫଟୋ ଲଗାଯାଇ ପୋଷ୍ଟର ପ୍ରସ୍ତୁତ କରାଯାଇଥିଲା | ପୋଷ୍ଟରରେ ଲେଖାଯାଇଥିଲା ଯେ କମିଶନ ଦିଅ ଓ କାମ କରାଅ |

ଯଦିଓ ଏହି ପୋଷ୍ଟର ଯୁଦ୍ଧକୁ ନେଇ କୌଣସି ନେତା ଦୋଷ ନିଜ ମୁଣ୍ଡ ଉପରକୁ ନେଇନାହାନ୍ତି, କିନ୍ତୁ ମୁଖ୍ୟମନ୍ତ୍ରୀ ଶିବରାଜ ସିଂ ଚୌହାନଙ୍କ ପୋଷ୍ଟରକୁ ନେଇ ଫୋନପେ କଂଗ୍ରେସକୁ ଟାର୍ଗେଟ କରିଛି | ଯେହେତୁ ଏହି ପୋଷ୍ଟ କଂଗ୍ରେସର ସୋସିଆଲ ମିଡିଆ ଆକାଉଣ୍ଟରୁ ମଧ୍ୟ ଜାରି କରାଯାଇଛି, ତେଣୁ ଏହି ପରିପ୍ରେକ୍ଷୀରେ ଫୋନ୍ ପେ ସୋସିଆଲ୍ ମିଡିଆ ମାଧ୍ୟମରେ ଏହାର ଲୋଗୋ ହଟାଇବାକୁ ଚେତାବନୀ ଦେଇଛି। ଏହାସହ ଏଥିରେ ଦର୍ଶାଯାଇଛି ଯେ ଯଦି ସେମାନଙ୍କର ନୀତିକୁ ଉଲ୍ଲଂଘନ କରାଯାଏ ତେବେ ଆସନ୍ତା ସମୟରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।