ବାହାଘର ଭୋଜିରେ ଖାଇବାକୁ ନ ମିଳିବାରୁ ଉଠାଇଥିବା ସବୁ ଫଟୋ ଡିଲିଟ୍ କରିଦେଲେ ଫଟୋଗ୍ରାଫର
ନ୍ୟୁୟର୍କ: ଖାଇବାକୁ ନ ଦେବା ସହ ଖରାପ ବ୍ୟବହାର କରିଥିବାରୁ ରାଗିଗଲେ ଫଟୋଗ୍ରାଫର | ଆଉ ବରଙ୍କ ସାମ୍ନାରେ ଡିଲିଟ କରିଦେଲେ ଉଠାଇଥିବା ସବୁ ଫଟୋ | ଏହି ଘଟଣାଟି ସୋସିଆଲ ମିଡିଆରେ ଭାଇରାଲ ହେବା ପରେ ଫଟୋଗ୍ରାଫର ଜଣକ ନିଜେ ଏ ବିଷୟରେ ସମ୍ପୂର୍ଣ୍ଣ ସୂଚନା ଦେଇଛନ୍ତି। ପ୍ରକୃତରେ, ଆମେରିକାର ୱାସିଂଟନରେ ଏଭଳି ଘଟଣା ଘଟିଛି | ଫଟୋଗ୍ରାଫର ଜଣକ ସୋସିଆଲ ମିଡିଆ ସାଇଟ୍ ରେଡ୍ଡିଟ୍ ରେ ସେହି ଦିନର ସମ୍ପୂର୍ଣ୍ଣ ଘଟଣା ବିଷୟରେ କହିଛନ୍ତି |
Sambad is now on WhatsApp
Join and get latest news updates delivered to you via WhatsApp
ଫଟୋଗ୍ରାଫର ସୋସିଆଲ ମିଡିଆରେ କହିଛନ୍ତି ଯେ ସେ ବୃତ୍ତି ଅନୁଯାୟୀ ଫଟୋଗ୍ରାଫର ନୁହଁନ୍ତି। ସେ କୁକୁରମାନଙ୍କର ଯତ୍ନ ନିଅନ୍ତି ଏବଂ ସେମାନଙ୍କର ଫଟୋ ନିଜ ଇନଷ୍ଟାଗ୍ରାମ ଓ ଫେସବୁକ୍ ଆକାଉଣ୍ଟରେ ପୋଷ୍ଟ କରନ୍ତି | କିନ୍ତୁ ତାଙ୍କ ବନ୍ଧୁ ତାଙ୍କୁ ନିଜ ବିବାହର ଫଟୋ ଉଠାଇବାକୁ କହିଥିଲେ, କିନ୍ତୁ ସେ ମନା କରିଦେଇଥିଲେ। ତଥାପି, ତାଙ୍କ ସାଙ୍ଗ ତାଙ୍କୁ ଏହି କାମ କରିବାକୁ ମନାଇଥିଲେ | ଫଟୋଗ୍ରାଫର କହିଛନ୍ତି ଯେ ବିବାହରେ ଫଟୋ ଉଠାଇବାକୁ ଉଭୟଙ୍କ ମଧ୍ୟରେ ୧୮ ହଜାର ଟଙ୍କାରେ ଚୁକ୍ତି ହୋଇଥିଲା |
ଫଟୋଗ୍ରାଫର ଜଣକ କହିଛନ୍ତି ଯେ ବିବାହ ଦିନ ସେ ସକାଳ ପ୍ରାୟ ୧୧ଟାରୁ ରାତି ପ୍ରାୟ ୮ଟା ଯାଏଁ ଫଟୋ ଉଠାଇଥିଲେ | ସନ୍ଧ୍ୟା ୫ଟାରେ ଅତିଥିମାନଙ୍କୁ ଖାଦ୍ୟ ପରିବେଷଣ କରାଯାଇଥିଲା | କିନ୍ତୁ ଫଟୋଗ୍ରାଫରଙ୍କୁ ଖାଦ୍ୟ ଦେବାକୁ ମନା କରାଯାଇଥିଲା। ତାଙ୍କୁ ଲଗାତାର ଫଟୋ ଉଠାଇବାକୁ କୁହାଯାଇଥିଲା। ଫଟୋଗ୍ରାଫରଙ୍କ କହିବାନୁସାରେ, ଫଟୋ ଉଠାଇ ଥକିଯିବା ପରେ ସେ ତାଙ୍କ ସାଙ୍ଗଙ୍କୁ(ବର) ଖାଇବା ପାଇଁ ୨୦ ମିନିଟ୍ ବିରତି ମାଗିଥିଲେ | ଏହାପରେ ବର ଜଣକ ଫଟୋଗ୍ରାଫରଙ୍କୁ କହିଥିଲେ ଯେ ସେ ଲଗାତାର ଫଟୋ ନ ଉଠାଇଲେ ଟଙ୍କା ମିଳିବ ନାହିଁ | ଯେତେବେଳେ ବର ଜଣକ ଟଙ୍କା ଦେବେ ନାହିଁ ବୋଲି କହିଥିଲେ ସେ ତାଙ୍କ ସାମ୍ନାରେ ଥିବା ସମସ୍ତ ଫଟୋ ଡିଲିଟ କରିଦେଇଥିଲେ |