ଫିଲିପାଇନ୍ସ କିଣିବ ଭାରତର ଶକ୍ତିଶାଳୀ ସୁପରସୋନିକ କ୍ରୁଜ ମିସାଇଲ ‘ବ୍ରହ୍ମୋସ’, ଖୁବ ଶୀଘ୍ର ଚୁକ୍ତି
ନୂଆଦିଲ୍ଲୀ : ଭାରତ ଓ ଋଷିଆ ପରେ ୩ୟ ଦେଶ ଭାବେ ଫିଲିପାଇନ୍ସ ସୁପରସୋନିକ କ୍ରୁଜ ମିସାଇଲ ବ୍ରହ୍ମୋସ ପାଇବାକୁ ଯାଉଛି । ଆସନ୍ତା କିଛି ସପ୍ତାହ ମଧ୍ୟରେ ଏ ନେଇ ଦୁଇ ଦେଶର ସରକାରଙ୍କ ମଧ୍ୟରେ ଚୁକ୍ତି ସ୍ୱାକ୍ଷରିତ ହେବାର ସମ୍ଭାବନା ରହିଛି । ଏ ସଂପର୍କରେ ବ୍ରହ୍ମସ ଏରୋସ୍ପେଶର ମୁଖ୍ୟ ମହାପ୍ରବନ୍ଧକ ପ୍ରବୀଣ ପାଠକ ସୂଚନା ଦେଇଛନ୍ତି ।
Sambad is now on WhatsApp
Join and get latest news updates delivered to you via WhatsApp
ଗତ ଡିସେମ୍ବର ମାସରେ ଫିଲିପାଇନ୍ସର ପ୍ରତିରକ୍ଷା ସଚିବ ଡେଲଫିନ ଲୋରେଞ୍ଜିନା କହିଥିଲେ ଯେ ତାଙ୍କ ଦେଶ ୨୦୨୦ ପ୍ରାରମ୍ଭରେ ଭାରତରୁ ୨ଟି ବ୍ୟାଟେରି ବ୍ରହ୍ମୋସ ମିସାଇଲ କିଣିବ । ଏହି ମିସାଇଲ ପାଇବାପରେ ନିଜ ଦେଶ ପ୍ରତି ଆସୁଥିବା ବିପଦର ସଫଳ ମୁକାବିଲା କରିବ ବୋଲି ଫିଲିପାଇନ୍ସ ସେନା ଆଶା କରୁଛି । ଚୀନ ସହ ଫିଲିପାଇନ୍ସର ସୀମା ବିବାଦ ଥିବାରୁ ଚୀନ ପଟୁ ବିପଦ ଆଶଙ୍କା କରୁଛି ଫିଲିପାଇନ୍ସ । ଏଥିପାଇଁ ଭାରତଠାରୁ ବ୍ରହ୍ମୋସ ମିସାଇଲ କିଣିବାକୁ ଚାହୁଁଛି । କିନ୍ତୁ ଋଷିଆ ଓ ଚୀନ ମଧ୍ୟରେ ସାମରିକ ରାଜନାମା ଥିବାରୁ ଚୀନର ଶତ୍ରୁଦେଶକୁ ବ୍ରହ୍ମୋସ ବିକ୍ରିକରିବା ପାଇଁ ଋଷିଆର ଅନୁମତି ଆବଶ୍ୟକ ଥିଲା । ତେବେ ଏଥିପାଇଁ ଋଷିଆ ଅନୁମତି ଦେଇସାରିଥିବାରୁ ଏହି ବିକ୍ରି ନେଇ କୌଣସି ପ୍ରତିବନ୍ଧକ ନାହିଁ ।
ଭାରତରୁ ବ୍ରହ୍ମୋସ ମିସାଇଲ କିଣିବା ପାଇଁ କେବଳ ଫିଲିପାଇନ୍ସ ନୁହେଁ ଦକ୍ଷିଣ-ପୂର୍ବ ଏସିଆର ଆଉ କେତେକ ଦେଶ ଯଥା ଇଣ୍ଡୋନେସିଆ, ଭିଏତନାମ ଆଦି ଆଗ୍ରହ ପ୍ରକାଶ କରିଥିବାବେଳେ, ପଶ୍ଚିମ ଏସିଆର କେତେକ ଦେଶ ମଧ୍ୟ ଆଗ୍ରହ ପ୍ରକାଶ କରିଛନ୍ତି ।