ସିମୁଳିଆ: ପଶ୍ଚିମବଙ୍ଗ ବିଧାୟକଙ୍କ କାର୍‌ ଧକ୍କାରେ ଜଣେ ବିଦ୍ୟାଳୟ ପିଅନଙ୍କ ଜୀବନ ଯାଇଛି। ଏହି ଦୁର୍ଘଟଣା ଘଟିଛି ବାଲେଶ୍ବର ଜିଲ୍ଲା ସିମୁଳିଆ ଥାନା ଅଞ୍ଚଳରେ। ସୂଚନା ଅନୁସାରେ; ସାନଭାଇ ଅପୂର୍ବ ସିହ୍ନାଙ୍କ କାର୍‌ (ଡବ୍ଲ୍ୟୁବି-୧୨-ବିକେ-୮୯୮୮) ନେଇ ପଶ୍ଚିମବଙ୍ଗ ଉତ୍ତର ହାଓଡ଼ା ବିଧାୟକ ଗୌତମ ଚୌଧୁରୀ ପତ୍ନୀ, ପୁଅ ଓ ଝିଅ ସହ ପୁରୀ ଶ୍ରୀଜଗନ୍ନାଥଙ୍କ ଦର୍ଶନ ପାଇଁ ଯାଇଥିଲେ। ସେମାନେ ଆଜି ଫେରୁଥିବା ବେଳେ ସିମୁଳିଆ ଥାନା ଅଧୀନ ୧୬ ନମ୍ବର ଜାତୀୟ ରାଜପଥର ଜାମୁଝାଡ଼ି ନିକଟରେ କାର୍‌ଟି ଏକ ସ୍କୁଟିକୁ ଧକ୍କା ଦେଇଥିଲା।

Advertisment

ଫଳରେ ସ୍କୁଟି ଚାଳକ ବାସୁଦେବପୁର ବ୍ଲକ୍‌ ବିନାୟକପୁର ଉଚ୍ଚବିଦ୍ୟାଳୟର ପିଅନ ତଥା ସୋର ବ୍ଲକ୍‌ ସାଜନପୁରର ରାଧାକାନ୍ତ ଲେଙ୍କା ଗୁରୁତର ଆହତ ହୋଇଥିଲେ। ବିଧାୟକ ଶ୍ରୀ ଚୌଧୁରୀ ଓ ସ୍ଥାନୀୟ ଲୋକ ଗୁରୁତର ରାଧାକାନ୍ତଙ୍କୁ ସିମୁଳିଆ ଡାକ୍ତରଖାନା ନେଇଥିଲେ। ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ସିମୁଳିଆ ଥାନାଧିକାରୀ ଶ୍ରବଣ କୁମାର ମହାରଣା ଦୁର୍ଘଟଣା ଘଟାଇଥିବା କାର୍‌କୁ ଜବତ କରିବା ସହ ଡ୍ରାଇଭର୍‌ ଅମିୟ ସିଂ ରାୟଙ୍କୁ ଅଟକ ରଖିଥିବା ଜଣାପଡ଼ିଛି।