ମଣିପୁରରେ ସେନା ଉପରେ ଆହୁରି ଆକ୍ରମଣ ପାଇଁ ଯୋଜନା କରୁଛି ପିଏଲଏ : ଗୁଇନ୍ଦା ରିପୋର୍ଟ
ନୂଆଦିଲ୍ଲୀ : ମଣିପୁରରେ ଆସାମ ରାଇଫଲ୍ସ ଉପରେ ଗତ ସପ୍ତାହରେ ହୋଇଥିବା ଆତଙ୍କବାଦୀ ଆକ୍ରମଣ ସଂପର୍କରେ ଆଉ କିଛି ଗୁଇନ୍ଦା ତଥ୍ୟ ହସ୍ତଗତ ହୋଇଛି । ଏହି ଘଟଣାରେ ଯବାନମାନଙ୍କ ଗୁଳିମାଡ଼ରେ ଆତଙ୍କବାଦୀ ସଂଗଠନ ପିଏଲଏର ଜଣେ ଆତଙ୍କବାଦୀ ଗୁରୁତର ଆହତ ହୋଇଛି ବୋଲି ଜଣାପଡ଼ିଛି । ଏହି ଆହତ ପିଏଲଏ କ୍ୟାଡର ଏବେ ମଣିପୁରର ଚୁରାଚାନ୍ଦପୁର ଜିଲ୍ଲାରେ କିମ୍ବା ସୀମା ସେପଟେ ମ୍ୟାମାରର ଚିନ୍ ରାଜ୍ୟରେ ଲୁଚିଥିବା ସଂଦେହ କରାଯାଉଛି ।
Sambad is now on WhatsApp
Join and get latest news updates delivered to you via WhatsApp
ଗୁଇନ୍ଦା ସୁତ୍ରରୁ ଆହୁରି ସୂଚନା ମିଳିଛି ଯେ ସୁରକ୍ଷା ବାହିନୀ ଉପରେ ଆହୁରି ଅଧିକ ଆକ୍ରମଣ କରିବାକୁ ପିଏଲଏ ଯୋଜନା କରୁଛି । ସୁରକ୍ଷା ବାହିନୀ ଯାଉଥିବା ରାସ୍ତାରେ ଆଇଇଡି ଖଞ୍ଜି ବିସ୍ଫୋରଣ କରିବାକୁ ଯୋଜନା କରାଯାଉଛି । କେବଳ ଏତିକି ନୁହେଁ, ମଣିପୁରର ଆଉ କେତେକ ଉଗ୍ରବାଦୀ ସଂଗଠନ ଏନଏମପିଏଫ ଓ ପିପୁଲ୍ସ ରିଭୋଲ୍ୟୁସନାରୀ ପାର୍ଟି ଅଫ କାଙ୍ଗଲେଇପାକ ମଧ୍ୟ ଆକ୍ରମଣ ପାଇଁ ଷଡ଼ଯନ୍ତ୍ର କରୁଛନ୍ତି ।
ମଣିପୁରରେ ଗତ ସପ୍ତାହରେ ହୋଇଥିବା ଏହି ଆତଙ୍କବାଦୀ ଆକ୍ରମଣ ପାଇଁ ମଣିପୁରର ପିପୁଲ୍ସ ଲିବରେସନ ଆର୍ମି (ପିଏଲଏ) ଓ ମଣିପୁର ନାଗା ପିପୁଲ୍ସ ଫ୍ରଣ୍ଟ ନିଜକୁ ଦାୟୀ କରିଥିଲା । ପିଏଲଏର ଏହି ଆତଙ୍କବାଦୀ ଆକ୍ରମଣରେ ଆସାମ ରାଇଫଲ୍ସର କମାଣ୍ଡିଂ ଅଫିସର ବିପ୍ଲବ ତ୍ରିପାଠୀ, ତାଙ୍କ ପତ୍ନୀ ଓ ୮ ବର୍ଷର ପୁଅ ସମେତ ମୋଟ ୭ ଜଣ ନିହତ ହୋଇଥିଲେ ।