ସର୍ବଦଳୀୟ ବୈଠକରେ ପ୍ରଧାନମନ୍ତ୍ରୀଙ୍କ ସୂଚନା : ବୈଜ୍ଞାନିକଙ୍କ ସ୍ୱୀକୃତି ପରେ ଟିକାକରଣ
୧ କୋଟି ସ୍ବାସ୍ଥ୍ୟ କର୍ମୀଙ୍କୁ ପ୍ରଥମେ କୋଭିଡ୍ ଟିକା ମିଳିବ
ନୂଆଦିଲ୍ଲୀ : ଶେରେ କରୋନା ମହାମାରୀ ସ୍ଥିତି ଏବଂ ଟିକାକରଣ କାର୍ଯ୍ୟକ୍ରମ ନେଇ ଆଜି ସର୍ବଦଳୀୟ ବୈଠକ ଅନୁଷ୍ଠିତ ହୋଇଛି। ଭିଡିଓ କନ୍ଫରେନ୍ସିଂ ମାଧ୍ୟମରେ ଅନୁଷ୍ଠିତ ଏହି ବୈଠକରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଅଧ୍ୟକ୍ଷତା କରିଥିଲେ । ବୈଠକରେ ପ୍ରଧାନମନ୍ତ୍ରୀ କହିଛନ୍ତି, ଟିକା ପାଇଁ ଆଉ ବେଶୀଦିନ ଅପେକ୍ଷା କରିବାକୁ ପଡ଼ିବ ନାହିଁ। ଆଗାମୀ କିଛି ସପ୍ତାହ ମଧ୍ୟରେ କୋଭିଡ୍ ଟିକା ପ୍ରସ୍ତୁତ ହୋଇଯିବ ବୋଲି ଆମ ବୈଜ୍ଞାନିକମାନେ ଆଶା ପ୍ରକଟ କରିଛନ୍ତି। ବୈଜ୍ଞାନିକଙ୍କ ସ୍ବୀକୃତି ପରେ ଦେଶରେ ଖୁବ୍ ଶୀଘ୍ର ଟିକାକରଣ ଆରମ୍ଭ ହୋଇଯିବ ବୋଲି ମୋଦୀ କହିଛନ୍ତି।
Sambad is now on WhatsApp
Join and get latest news updates delivered to you via WhatsApp
କୋଭିଡ୍ ଟିକାର ମୂଲ୍ୟ କେତେ ରହିବ ସେନେଇ ବିଭିନ୍ନ ମହଲରେ ପ୍ରଶ୍ନ ଉଠିଛି। ପ୍ରଧାନମନ୍ତ୍ରୀ ଏହି ପ୍ରସଙ୍ଗରେ କହିଛନ୍ତି, ଟିକାର ମୂଲ୍ୟକୁ ନେଇ ପ୍ରଶ୍ନ ଉଠିବା ସ୍ବାଭାବିକ। କିନ୍ତୁ ଜନସାଧାରଣଙ୍କ ସ୍ବାସ୍ଥ୍ୟକୁ ପ୍ରଥମେ ଗୁରୁତ୍ବ ଦିଆଯିବ ଏବଂ ରାଜ୍ୟମାନେ ଏଥିରେ ସମ୍ପୂର୍ଣ୍ଣ ସହଯୋଗ କରିବେ । ବିଶ୍ବରେ ଏବେ ୮ ଟିକା ନିର୍ମାତା ପରୀକ୍ଷଣର ବିଭିନ୍ନ ପର୍ଯ୍ୟାୟରେ ରହିଥିବା ବେଳେ ଭାରତରେ ମଧ୍ୟ ୩ ପ୍ରମୁଖ ଟିକା ନିର୍ମାତା ଚୂଡ଼ାନ୍ତ ପର୍ଯ୍ୟାୟରେ ପହଞ୍ଚିଛନ୍ତି। ଟିକା ସଂକ୍ରାନ୍ତରେ ସମୀକ୍ଷା ପାଇଁ ପ୍ରଧାନମନ୍ତ୍ରୀ ନିକଟରେ ପୁନେ, ଅହମଦାବାଦ୍ ଏବଂ ହାଇଦ୍ରାବାଦ୍ ଗସ୍ତ କରିଥିଲେ। ବୈଠକରେ ପ୍ରଧାନମନ୍ତ୍ରୀ କହିଛନ୍ତି, ବୈଜ୍ଞାନିକମାନେ ଟିକାକୁ ନେଇ ସଫଳ ହେବେ ବୋଲି ଦୃଢ଼ ଭରସା ରଖିଛନ୍ତି। ସମଗ୍ର ବିଶ୍ବ ଏକ ଶସ୍ତା ଏବଂ ସୁରକ୍ଷିତ ଟିକା ଉପରେ ନଜର ରଖିଛି। କେବଳ ଏହି କାରଣ ପାଇଁ ବିଶ୍ବ ଭାରତକୁ ଚାହିଁ ରହିଛି। ସ୍ବାସ୍ଥ୍ୟକର୍ମୀ, ଆଗଧାଡ଼ିର ଯୋଦ୍ଧା ଏବଂ ବିଭିନ୍ନ ଗୁରୁତର ସ୍ବାସ୍ଥ୍ୟ ସମସ୍ୟାରେ ପୀଡ଼ିତ ବୟସ୍କ ବ୍ୟକ୍ତିଙ୍କୁ ପ୍ରଥମେ ଟିକା ଦିଆଯିବ ବୋଲି ପ୍ରଧାନମନ୍ତ୍ରୀ କହିଛନ୍ତି। ଟିକା ବଣ୍ଟନ ପାଇଁ ଉଭୟ କେନ୍ଦ୍ର ଏବଂ ରାଜ୍ୟ ସରକାରଙ୍କ ଟିମ୍ କାମ କରୁଛନ୍ତି। ଅନ୍ୟ ଦେଶ ତୁଳନାରେ ଭାରତର ବିଶେଷଜ୍ଞଙ୍କର ଟିକା ବଣ୍ଟନ କ୍ଷେତ୍ରରେ ଯଥେଷ୍ଟ ଅଭିଜ୍ଞତା ରହିଛି। ଟିକା ବଣ୍ଟନ କ୍ଷେତ୍ରରେ ପ୍ରଧାନମନ୍ତ୍ରୀ ସମସ୍ତ ରାଜନୈତିକ ଦଳର ନେତାମାନଙ୍କଠାରୁ ଲିଖିତ ପ୍ରସ୍ତାବ ଚାହିଛନ୍ତି ଏବଂ ସରକାର ଏହି ପ୍ରସ୍ତାବଗୁଡ଼ିକୁ ଅଗ୍ରାଧିକାର ଭିତ୍ତିରେ ଲାଗୁ କରିବେ ବୋଲି ପ୍ରଧାନମନ୍ତ୍ରୀ ଆଶ୍ବାସନା ଦେଇଛନ୍ତି।
ପ୍ରଧାନମନ୍ତ୍ରୀ କହିଛନ୍ତି, ଟିକାକରଣ ସମୟରେ ଯେଭଳି କୌଣସି ଗୁଜବ ନହୁଏ ସେଥିପ୍ରତି ଧ୍ୟାନ ଦେବାକୁ ପଡ଼ିବ। ଗୁଜବ ହେଉଛି ଦେଶ ବିରୋଧୀ ଏବଂ ମାନବବିରୋଧୀ। ଟିକା ଗଚ୍ଛିତ ରଖିବାପାଇଁ ରାଜ୍ୟମାନେ ପ୍ରସ୍ତୁତ ହୋଇଗଲେଣି ଏବଂ ଏଥିପାଇଁ ସ୍ବତନ୍ତ୍ର ସଫ୍ଟୱେୟାର ମଧ୍ୟ ବିକଶିତ ହୋଇଛି ବୋଲି ପ୍ରଧାନମନ୍ତ୍ରୀ କହିଛନ୍ତି।
୧ କୋଟି ସ୍ବାସ୍ଥ୍ୟ କର୍ମୀଙ୍କୁ ପ୍ରଥମେ କୋଭିଡ୍ ଟିକା ମିଳିବ
ନୂଆଦିଲ୍ଲୀ ଦେଶରେ କୋଭିଡ୍ ମୁକାବିଲାରେ ନିୟୋଜିତ ୧ କୋଟି ଆଗଧାଡ଼ିର ସ୍ବାସ୍ଥ୍ୟ କର୍ମୀଙ୍କୁ ପ୍ରଥମେ କୋଭିଡ୍ ଟିକା ମିଳିବ। ଏହାପରେ କରୋନା ବିରୋଧରେ ଲଢ଼େଇ ଜାରି ରଖିଥିବା ପ୍ରାୟ ୨ କୋଟି ଆଗ ଧାଡ଼ିର ଯୋଦ୍ଧା ଟିକା ପାଇବେ। କେନ୍ଦ୍ର ସ୍ବାସ୍ଥ୍ୟ ମନ୍ତ୍ରାଳୟ ପକ୍ଷରୁ ଆଜି ସର୍ବଦଳୀୟ ବୈଠକରେ ଏହି ଉପସ୍ଥାପନା କରାଯାଇଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ହୋଇଥିବା ଉକ୍ତ ବୈଠକରେ କେନ୍ଦ୍ର ସ୍ବାସ୍ଥ୍ୟ ସଚିବ ରାଜେଶ ଭୂଷଣ ଟିକାକରଣ ପ୍ରସ୍ତୁତି ସଂପର୍କିତ ତଥ୍ୟ ରଖିବା ଅବସରରେ ଏହା କହିଛନ୍ତି। ଡାକ୍ତର ଏବଂ ନର୍ସ୍ଙ୍କ ସମେତ ପ୍ରଥମେ ୧ କୋଟି ସ୍ବାସ୍ଥ୍ୟ କର୍ମୀ ଟିକା ପାଇବେ ବୋଲି ଭୂଷଣ ସର୍ବଦଳୀୟ ବୈଠକରେ କହିଥିଲେ। ସମସ୍ତ ଦଳର ନେତାଙ୍କୁ ଆଜି ହୋଇଥିବା ଭର୍ଚୁଆଲ ସର୍ବଦଳୀୟ ବୈଠକରେ ଯୋଗ ଦେବାପାଇଁ ଆମନ୍ତ୍ରିତ କରାଯାଇଥିଲା। ୫ କିମ୍ବା ୫ରୁ ଅଧିକ ସାଂସଦ ଥିବା ବିଭିନ୍ନ ରାଜନୈତିକ ଦଳର ମୋଟ୍ ୧୩ ଜଣ ନେତା ଏହି ବୈଠକରେ ଅଂଶଗ୍ରହଣ କରିଥିଲେ।