ପଦ୍ମ ପୁରସ୍କାର: ତୃଣମୂଳ ସ୍ତରରେ କାର୍ଯ୍ୟ କରୁଥିବା ଲୋକଙ୍କୁ ମନୋନିତ କରିବାକୁ ପ୍ରଧାନମନ୍ତ୍ରୀ ମୋଦୀଙ୍କ ଆହ୍ୱାନ

ନୂଆଦିଲ୍ଲୀ: ରବିବାର ଦିନ ପଦ୍ମ ପୁରସ୍କାର ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଟ୍ୱିଟ କରି ଲୋକଙ୍କଠାରୁ ସାହାଯ୍ୟ ମାଗିଛନ୍ତି । ସେ କହିଛନ୍ତି କି ତୃଣମୂଳ ସ୍ତରରେ ଲୋକଙ୍କ ପାଇଁ ଅସାଧାରଣ କାମ କରିଥିବା ଲୋକଙ୍କ ନାମ ମନୋନିତ କରାଯାଉ । ସେ ତାଙ୍କ ଟ୍ୱିଟରେ ଲେଖିଛନ୍ତି କି, “ଭାରତରେ ବହୁ ପ୍ରତିଭାଶାଳୀ ଲୋକ ରହିଛନ୍ତି, ଯେଉଁମାନେ କି ତୃଣମୂଳ ସ୍ତରରେ ବହୁ ଅସାଧାରଣ କାର୍ଯ୍ୟ କରୁଛନ୍ତି । ଯଦି ଆପଣ ସେଭଳି ଲୋକଙ୍କୁ ଜାଣିଛନ୍ତି ତେବେ ତାଙ୍କ ନାମ ପଦ୍ମ ପୁରସ୍କାର ପାଇଁ ମନୋନିତ କରିପାରିବେ” । ସେପ୍ଟେମ୍ବର ୧୫ ତାରିଖ ପର୍ଯ୍ୟନ୍ତ ପଞ୍ଜିକରଣ ଖୋଲା ରହିବ ବୋଲି ଜଣାପଡ଼ିଛି।

India has many talented people, who are doing exceptional work at the grassroots. Often, we don’t see or hear much of them. Do you know such inspiring people? You can nominate them for the #PeoplesPadma. Nominations are open till 15th September. https://t.co/BpZG3xRsrZ

— Narendra Modi (@narendramodi) July 11, 2021

ଉଲ୍ଲେଖଯୋଗ୍ୟ, ଜୁନ ମାସରେ କେନ୍ଦ୍ର ସରକାରଙ୍କ ପକ୍ଷରୁ କୁହାଯାଇଥିଲା କି ପଦ୍ମ ପୁରସ୍କାରକୁ “ଜନତାର ପଦ୍ମ”ରେ ବଦଳାଇବାକୁ ଚାହୁଁଛନ୍ତି । ଏହାସହ ସବୁ ନାଗରିକଙ୍କୁ ପ୍ରତିଷ୍ଠିତ ସମ୍ମାନ ପାଇଁ ନୋମିନେସନ ଓ ସେଲ୍ଫ ନୋମିନେସନ କରିବାକୁ କୁହାଯାଇଥିଲା । ଗୃହ ମନ୍ତ୍ରାଳୟ ପକ୍ଷରୁ କୁହାଯାଇଛି କି, ୨୦୨୨ ଗଣତନ୍ତ୍ର ଦିବସର ପୂର୍ବ ସନ୍ଧ୍ୟାରେ ପଦ୍ମ ପୁରସ୍କାର ପାଇବାକୁ ଥିବା ନାଗରିକଙ୍କ ନାମ ଘୋଷଣା କରାଯିବ । ଏନେଇ ନୋମିନେସନ ଓ ସୁପାରିଶ କରିବାକୁ ଅନଲାଇନ ୱେବ୍ ସାଇଟ ଖୋଲା ରହିଛି, ଯାହାର ଅନ୍ତିମ ତାରିଖ ଭାବେ ୧୫ ସେପ୍ଟେମ୍ବର ୨୦୨୧ ରଖା ଯାଇଛି ।

୨୦୧୪ ମସିହାରୁ କେନ୍ଦ୍ର ସରକାର ଦେଶର ଅନେକ ନାଗରିକଙ୍କୁ ପଦ୍ମ ପୁରସ୍କାରରେ ସମ୍ମାନିତ କରିଆସୁଛନ୍ତି। ଅନ୍ୟପଟେ କେନ୍ଦ୍ର ଗୃହ ମନ୍ତ୍ରାଳୟ ସବୁ ମନ୍ତ୍ରାଳୟ, ବିଭାଗ, ରାଜ୍ୟ ଓ କେନ୍ଦ୍ର ଶାସିତ ରାଜ୍ୟର ସରକାରମାନଙ୍କୁ ଅନୁରୋଧ କରିଛନ୍ତି କି ମହିଳା, ସମାଜର ତଳ ଶ୍ରେଣୀର ଲୋକ, ଏସସି ଓ ଏସଟିଙ୍କ ମଧ୍ୟରୁ ପ୍ରତିଭାଶାଳୀ ବ୍ୟକ୍ତିଙ୍କୁ ଚିହ୍ନଟ କରି ସେମାନଙ୍କ ନାମକୁ ପୁରସ୍କାର ପାଇଁ ଚୟନ କରାଯାଉ ।