ବ୍ରାସିଲିଆରେ ପ୍ରବାସୀ ଭାରତୀୟଙ୍କ ପକ୍ଷରୁ ମୋଦୀଙ୍କୁ ଭବ୍ୟ ସ୍ବାଗତ

ନୂଆଦିଲ୍ଳୀ:  ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ସୋମବାର ଦିନ ବ୍ରାଜିଲ୍‌ର ରାଜଧାନୀ ବ୍ରାସିଲିଆରେ ପ୍ରବାସୀ ଭାରତୀୟଙ୍କ ପକ୍ଷରୁ ଭବ୍ୟ ସ୍ବାଗତ କରାଯାଇଛି। ସେମାନଙ୍କ ଆତିଥ୍ୟରେ ଖୁସି  ହୋଇ ପ୍ରଧାନମନ୍ତ୍ରୀ ମୋଦୀ ଏହାକୁ ଏକ "ସ୍ମରଣୀୟ ସ୍ୱାଗତ" ବୋଲି ପ୍ରକାଶ କରିଛନ୍ତି। ଏହା ସହିତ ମୂଳ ସହିତ ଯୋଡ଼ି ହୋଇ ରହିଥିବା ପାଇଁ ପ୍ରବାସୀ ଭାରତୀୟଙ୍କୁ ପ୍ରଶଂସା ମଧ୍ୟ କରିଛନ୍ତି।

ମୋଦୀ ଏକ ଏକ୍ସ ପୋଷ୍ଟ୍‌ କରି ଲେଖିଛନ୍ତି,  "କିଛି ସମୟ ପୂର୍ବରୁ ବ୍ରାସିଲିଆରେ ପହଞ୍ଚିଲି। ଭାରତୀୟ ସମ୍ପ୍ରଦାୟ ଏକ ସ୍ମରଣୀୟ ସ୍ୱାଗତ ପ୍ରଦାନ କରିଛନ୍ତି। ପୁଣି ଥରେ ଏହା ପ୍ରମାଣିତ ହୋଇଛି ଯେ ଆମର ପ୍ରବାସୀ କେତେ ଉତ୍ସାହୀ ଏବଂ ସେମାନେ ନିଜ ମୂଳ ସହିତ କେତେ ଜଡିତ।’’

 ବ୍ରିକ୍ସ ସମ୍ମିଳନୀରେ ପ୍ରତିନିଧିତ୍ବ ସାରି ବ୍ରାଜିଲ ରାଜଧାନୀ ବ୍ରାସିଲିଆରେ ପହଞ୍ଚିଛନ୍ତି ମୋଦୀ। ବ୍ରାସିଲିଆରେ ପହଞ୍ଚିବା ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ବିମାନବନ୍ଦରରେ ବାଟାଲା ମୁଣ୍ଡୋ ବ୍ୟାଣ୍ଡର ପାରମ୍ପରିକ ଆଫ୍ରୋ-ବ୍ରାଜିଲୀୟ ସାମ୍ବା ରେଗେ ପରଫରମାନ୍ସ ସ୍ୱାଗତ କରାଯାଇଥିଲା। 

ହୋଟେଲରେ ସେ ବ୍ରାସିଲିଆର ସାଂସ୍କୃତିକ ଓ ଆଧ୍ୟାତ୍ମିକ ପରମ୍ପରା ଦେଖି କଳାକାରମାନଙ୍କୁ ପ୍ରଶଂସା କରିଥିଲେ । ଆଜି ବ୍ରାଜିଲ ରାଷ୍ଟ୍ରପତିଙ୍କ ସହ ପ୍ରଧାନମନ୍ତ୍ରୀ ଦ୍ବିପାକ୍ଷିକ ଆଲୋଚନା କରିବେ । ବାଣିଜ୍ୟ, ଶିଳ୍ପ ଓ ପ୍ରତିରକ୍ଷା କ୍ଷେତ୍ରରେ ହେବ ଗୁରୁତ୍ବପୂର୍ଣ୍ଣ କଥାବାର୍ତ୍ତା।