ଚନ୍ଦ୍ରପୃଷ୍ଠରେ ‘ଚନ୍ଦ୍ରଯାନ-୨’ର ଅବତରଣ ଦେଖିବାକୁ ବେଙ୍ଗାଲୁରୁ ପହଂଚିଲେ ପ୍ରଧାନମନ୍ତ୍ରୀ ମୋଦୀ
ବେଙ୍ଗାଲୁରୁ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶୁକ୍ରବାର ବେଙ୍ଗାଲୁରୁ ପହଞ୍ଚିଛନ୍ତି। ଚନ୍ଦ୍ର ପୃଷ୍ଠରେ ଚନ୍ଦ୍ରଯାନ-୨ର ଅବତରଣ ଦେଖିବାକୁ ମୋଦି ବେଙ୍ଗାଲୁରୁସ୍ଥିତ ଇସ୍ରୋ ସେଣ୍ଟରରେ ପହଞ୍ଚିଛନ୍ତି। ଚନ୍ଦ୍ରଯାନର ଅବତରଣ ଶୁକ୍ରବାର-ଶନିବାର ମଧ୍ୟ ରାତି (ସେପ୍ଟେମ୍ବର ୭)ରେ ହେବ। ଏଥି ପାଇଁ ମୋଦୀଙ୍କ ସାଙ୍ଗରେ ମନୋନୀତ ହୋଇଥିବା ୬୦ ଜଣ ଛାତ୍ରଛାତ୍ରୀ ମଧ୍ୟ ଉପସ୍ଥିତ ରହିବେ।
Sambad is now on WhatsApp
Join and get latest news updates delivered to you via WhatsApp
ଚନ୍ଦ୍ରଯାନ-୨ର ଅବତରଣ ସମସ୍ତେ ଦେଖିବାକୁ ମୋଦୀ ଦେଶବାସୀଙ୍କୁ ଆହ୍ଵାନ କରିଛନ୍ତି। ଏହା ଏକ ବିରଳ ଦୃଶ୍ୟ ଓ ସ୍ମରଣୀୟ ମୂହୁର୍ତ୍ତ ହେବ। ସୋସିଆଲ ମିଡିଆରେ ଫଟୋ ସେୟାର କରିବାକୁ ମୋଦୀ ପରାମର୍ଶ ଦେଇଛନ୍ତି। ଏଥି ସହିତ ସେ କହିଛନ୍ତି, ମୁଁ ମଧ୍ୟ ସୋସିଆଲ ମିଡିଆରେ ଫଟୋ ସେୟାର କରିବି।
ଆଉ ମାତ୍ର କିଛି ଘଣ୍ଟା ମଧ୍ୟରେ ଭାରତର ଚନ୍ଦ୍ରଯାନ-୨ ର ଲାଣ୍ଡର ବିକ୍ରମ ଚନ୍ଦ୍ରର ଦକ୍ଷିଣ ମେରୁରେ ଓହ୍ଲାଇ ଇତିହାସ ସୃଷ୍ଟି କରିବ । ଭାରତର ୧୩୦ କୋଟି ଜନତାଙ୍କ ସମେତ ସାରା ବିଶ୍ୱର ଆଖି ଏହା ଉପରେ ରହିଛି । ଏହି ଓହ୍ଲାଇବାର କିଛି ଘଣ୍ଟା ଚନ୍ଦ୍ରଯାନ-୨ ପାଇଁ ବେଶ ଗୁରୁତ୍ୱପୂର୍ଣ୍ଣ ବୋଲି ଇସ୍ରୋ ପକ୍ଷରୁ କୁହାଯାଇଛି । ତେବେ ଆଶ୍ୱସ୍ତିର କଥା ହେଉଛି ଏପର୍ଯ୍ୟନ୍ତ ସବୁକିଛି ଯୋଜନା ଅନୁସାରେ ଠିକଠାକ ଚାଲିଛି । ଏହାକୁ ଉତ୍କଣ୍ଠାର ସହିତ ଅପେକ୍ଷା କରାଯାଇଛି ବୋଲି କହିଛନ୍ତି ଇସ୍ରୋ ଅଧ୍ୟକ୍ଷ କେ.ଶିବନ ।
ଲାଣ୍ଡର ବିକ୍ରମ ଆଜି ରାତି ୧:୩୦ ରୁ ୨:୩୦ ମଧ୍ୟରେ ଚନ୍ଦ୍ରପୃଷ୍ଠର ଦକ୍ଷିଣ ମେରୁରେ ଓହ୍ଲାଇବ । ଚନ୍ଦ୍ରପୃଷ୍ଠଠାରୁ ୧୦୦ ମିଟର ଉଚ୍ଚତାରେ ଥିବାବେଳେ ନିର୍ଦ୍ଦିଷ୍ଟଭାବେ କେଉଁ ସ୍ଥାନରେ ଓହ୍ଲାଇବ ତାହା ସ୍ଥିର କରିବ । ଏହାପରେ ୫.୩୦ରୁ ୬.୩୦ ମଧ୍ୟରେ ରୋଭର ପ୍ରଜ୍ଞାନ ଏଥିରୁ ଓହ୍ଲାଇବ ବୋଲି ଇସ୍ରୋ ପକ୍ଷରୁ କୁହାଯାଇଛି ।