ଜୟପୁର: ରାଜସ୍ଥାନରୁ ଗର୍ଜିଲେ ମୋଦୀ । ପାକିସ୍ତାନକୁ ପୁଣି ଟାର୍ଗେଟ୍ କଲେ ପ୍ରଧାନମନ୍ତ୍ରୀ ମୋଦୀ । ଆଜି ପହଲଗାମ୍ ଆତଙ୍କୀ ହମଲାକୁ ୧ ମାସ ପୂରିଥିବା ବେଳେ ଆତଙ୍କୀଙ୍କ ଉପରେ ନିଆଯାଇଥିବା ପ୍ରତିଶୋଧର କଥା କହି ପାକିସ୍ତାନ ଉପରେ ବର୍ଷିଛନ୍ତି ମୋଦୀ । କହିଲେ -

Advertisment

ଆତଙ୍କବାଦୀମାନେ ୨୨ ତାରିଖରେ ହମଲା କରିଥିଲେ ଆମେ ୨୨ର ପ୍ରତିଶୋଧ ୨୨ ମିନିଟିରେ ନେଲୁ । ପାକିସ୍ତାନରେ ପଶି ଆତଙ୍କୀଙ୍କ ୯ ଆଡ୍ଡାକୁ ଧ୍ବଂସ କରିଦେଲୁ । ସାରା ଦୁନିଆ ଦେଖିଲା ଯେବେ ସିନ୍ଦୂର ବାରୁଦ ପାଲଟେ କଣ ହୁଏ ପରିସ୍ଥିତି । ଶତ୍ରୁ ଦେଶମାନେ ବି ଦେଖିଲେ ଯେବେ କାହା ମଥାର ସିନ୍ଦୂର ପୋଛା ଯାଏ ତାର ପରିଣତି କେତେ ଭୟଙ୍କର ହୁଏ...

ଆମ ପାଇଁ ଦେଶ ଓ ଦେଶବାସୀଙ୍କ ଠାରୁ ବଡ଼ କିଛି ନାହିଁ । ୨୨ ତାରିଖରେ ଆତଙ୍କବାଦୀମାନେ ଧର୍ମ ପଚାରି ଆମ ମାଆ ଭଉଣୀଙ୍କର ସିନ୍ଦୂର ପୋଛିଥିଲେ । ସେଦିନ ଗୁଳି ସିନା ପହଲଗାମରେ ଫୁଟିଥିଲା ହେଲେ ୧୪୦ କୋଟି ଭାରତୀୟଙ୍କ ଛାତିରେ ଯନ୍ତ୍ରଣା ହୋଇଥିଲା । ଏହାପରେ ପୂରା ଭାରତ ଏକାଠି ହୋଇଥିଲା ଆତଙ୍କୀଙ୍କୁ ମାଟିରେ ମିଶାଇ ଦେବାକୁ । ଆଉ ତାପରେ ଆମ ବୀର ସେନା ଶତ୍ରୁ ମାଟିରେ ତାଣ୍ଡବ ରଚିଦେଲେ । ୩ ସେନା ଏମିତି ଚକ୍ରବ୍ୟୁହ ରଚିଲେ, ପାକିସ୍ତାନ ଆଣ୍ଠେଇପଡିଲା ବୋଲି ମୋଦୀ କହିଛନ୍ତି । 

ପାକିସ୍ତାନକୁ ନିଶାନା କରି ମୋଦୀ ଆହୁରି ମଧ୍ୟ କହିଛନ୍ତି, ପ୍ରଥମେ ଆମେ ଘରେ ପଶି ମାରିଥିଲୁ, ଏବେ ଛାତିକୁ ମାରିଲୁ । ଏହା ଆକ୍ରୋଶ ନୁହେଁ, ସମଗ୍ର ଭାରତର ରୌଦ୍ର ରୂପ । ପରମାଣୁ ଆକ୍ରମଣ ଧମକକୁ ଭାରତ ଖାତିର କରେନି । ପୂରା ବିଶ୍ୱରେ ପାକିସ୍ତାନର ପୋଲ୍ ଖୋଲୁଛି । ଆଉ ଯଦି ଆଗକୁ କେବେ ଆକ୍ରମଣ ହୁଏ ତାହାଲେ ଧୂଳିସାତ କରିଦେବୁ । ପାକିସ୍ତାନକୁ ଭାରତର ହକ୍ ର ପାଣି ମିଳିବନି । ଭାରତୀୟଙ୍କ ରକ୍ତରେ ଖେଳିବା ପାକିସ୍ତାନୀଙ୍କୁ ମହଙ୍ଗା ପଡ଼ିବ ।