ଦେଶରେ ଥିବା ବିଭିନ୍ନ ବନ୍ଦରର ବିକାଶ ପାଇଁ ସରକାର ଖର୍ଚ୍ଚ କରିବେ ୮୨୦ କୋଟି ଡଲାର, ସୂଚନା ଦେଲେ ପ୍ରଧାନମନ୍ତ୍ରୀ
ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଭାରତୀୟ ନୌବାଣିଜ୍ୟ ସମ୍ମିଳନୀ-୨୦୨୧କୁ ଭିଡିଓ କନଫରେନ୍ସିଂ ମାଧ୍ୟମରେ ଉଦଘାଟନ କରିଥିଲେ । ସମ୍ମିଳନୀକୁ ଉଦଘାଟନ କରି ପ୍ରଧାନମନ୍ତ୍ରୀ କହିଥିଲେ ଯେ, ସାମୁଦ୍ରିକ ଅର୍ଥବ୍ୟବସ୍ଥାର ବିକାଶ ହୋଇପାରିଲେ ଦେଶରେ ବିକାଶର ଗତି ଦ୍ରୁତ ହେବ । ଏହି କାର୍ଯ୍ୟକ୍ରମରେ ଭାରତ ସହ ଅନ୍ୟକିଛି ଦେଶର ସଦସ୍ୟମାନେ ଯୋଗ ଦେଇଥିଲେ । ଏହାସହ ୫୦ ଦେଶରୁ ୧ ଲକ୍ଷରୁ ଅଧିକ ପ୍ରତିନିଧି ଏହି କାର୍ଯ୍ୟକ୍ରମରେ ଅନଲାଇନ୍ ମାଧ୍ୟମରେ ଯୋଗ ଦେଇଥିଲେ । ଏହି କାର୍ଯ୍ୟକ୍ରମ ୪ ତାରିଖ ପର୍ଯ୍ୟନ୍ତ ଚାଲିବ ବୋଲି ଜଣାପଡ଼ିଛି ।
Sambad is now on WhatsApp
Join and get latest news updates delivered to you via WhatsApp
ସମ୍ମିଳନୀରେ ଉଦବୋଧନ ଦେଇ ପ୍ରଧାନମନ୍ତ୍ରୀ କହିଥିଲେ ଯେ, ସାମୁଦ୍ରିକ ନୌବାଣିଜ୍ୟ କ୍ଷେତ୍ରର ବିକାଶ ପାଇଁ ୨୦୩୫ ମସିହା ସୁଦ୍ଧା ୮୨ ଆରବ ବା ୮୨୦ କୋଟି ଟଙ୍କା ବିନିଯୋଗ କରାଯିବ । ସାଗରମାଳା ଯୋଜନାରେ ୫୭୪ରୁ ଅଧିକ ପ୍ରକଳ୍ପ ଉପରେ କାମ କରାଯିବ । ୨୦୩୫ ସୁଦ୍ଧା ସମସ୍ତ କାର୍ଯ୍ୟ ଶେଷ ହେବ ବୋଲି ସେ କହିଥିଲେ ।
କେବଳ ସେତିକି ନୁହେଁ ପ୍ରଧାନମନ୍ତ୍ରୀ କହିଥିଲେ ଯେ, ଆଗାମୀ ୧୦ ବର୍ଷ ମଧ୍ୟରେ ଜଳମାର୍ଗ ପରିଚାଳନା ଉପରେ କାମ କରାଯିବ । ଏହି ଯୋଜନାରେ ମୋଟ ୧୮୯ ଟି ବନ୍ଦରକୁ ବିକଶିତ କରାଯିବ । ପ୍ରଧାନମନ୍ତ୍ରୀଙ୍କ ସୂଚନା ମୁତାବକ ୨୦୧୪ ମସିହାରେ ପ୍ରମୁଖ ବନ୍ଦରର କ୍ଷମତା ୮୭୦ ମିଲିୟନ ଟନ୍ ଥିଲା ହେଲେ ଏହା ଏବେ ବୃଦ୍ଧି ପାଇ ୧୫୫୦ ମିଲିୟନ ଟନ୍ ରେ ପହଞ୍ଚିଛି । ଫଳରେ ଲାଭାଂଶର ବୃଦ୍ଧି ଘଟିଛି ଓ ତାହା ଦ୍ୱାରା ବ୍ୟବସାୟୀଙ୍କଠାରୁ ଆରମ୍ଭ କରି ଦେଶକୁ ବି ଲାଭ ମିଳୁଛି । ଏହା ସହ ବନ୍ଦର ଅଞ୍ଚଳରେ ସ୍ମାର୍ଟ ସିଟି ଓ ଔଦଗ୍ୟିକ ପାର୍କ ଆଦି ନିର୍ମାଣ କରାଯାଇ ପର୍ଯ୍ୟଟନ କ୍ଷେତ୍ରକୁ ବିକଶିତ କରାଯିବ ବୋଲି ପ୍ରଧାନମନ୍ତ୍ରୀ କହିଛନ୍ତି ।