ଆଜି ଗୁରୁତ୍ୱପୂର୍ଣ୍ଣ ବୈଠକ କରିବେ ପ୍ରଧାନମନ୍ତ୍ରୀ: ଅମ୍ଳଜାନ ଏବଂ ଔଷଧର ଉପଲବ୍ଧତା ନେଇ କରିବେ ସମୀକ୍ଷା
ନୂଆଦିଲ୍ଲୀ: ଦେଶରେ କରୋନାର ଦ୍ବିତୀୟ ଲହର କାୟା ବିସ୍ତାର କରିବାରେ ଲାଗିଛି । ଏହାରି ଭିତରେ ଅମ୍ଳଜାନ ଏବଂ ଅତ୍ୟାବଶ୍ୟକ ଔଷଧର ଅଭାବ ଦେଶରେ ଏକ ବଡ଼ ସଙ୍କଟ ସୃଷ୍ଟି କରିଛି । ଆଜି କରୋନା ସ୍ଥିତିକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବିଶେଷଜ୍ଞଙ୍କ ସହ ଆଲୋଚନା କରିବେ । ଏହି ଗୁରୁତ୍ୱପୂର୍ଣ୍ଣ ବୈଠକରେ ଅମ୍ଳଜାନ ଏବଂ ଔଷଧର ଉପଲବ୍ଧତା ବିଷୟରେ ସମୀକ୍ଷା କରାଯିବ ।
ଗତ କିଛି ମାସ ହେବ ଭାରତରେ କୋଭିଡ -୧୯ ମାମଲାରେ ବ୍ୟାପକ ବୃଦ୍ଧି ଘଟିଛି । ଦେଶରେ ଏପ୍ରିଲ ୨୨ ରେ ୩ ଲକ୍ଷ ମାର୍କ ଅତିକ୍ରମ କରିଥିଲା । ଗତକାଲି ଦେଶରେ ୪ ଲକ୍ଷରୁ ଅଧିକ କରୋନା ସଂକ୍ରମିତ ଚିହ୍ନଟ ହୋଇଥିବା ବେଳେ ଏହା ଭାରତରେ ଦୈନିକ ସଂକ୍ରମଣର ରେକର୍ଡ ସୃଷ୍ଟି କରିଥିଲା । ସେପଟେ, ଉଜବେକିସ୍ତାନରୁ ଏକ ବିମାନ, ଅମ୍ଳଜାନ କନସେନଟ୍ରେଟର ଏବଂ ଅନ୍ୟାନ୍ୟ ଚିକିତ୍ସା ସାମଗ୍ରୀ ନେଇ ରବିବାର ସକାଳେ ଦିଲ୍ଲୀ ବିମାନବନ୍ଦରରେ ପହଞ୍ଚିଥିବା ବେଳେ ଆମେରିକାର ଅନ୍ୟ ଏକ ବିମାନ ୧୦୦୦ରୁ ଅଧିକ ଅମ୍ଳଜାନ ସିଲିଣ୍ଡର, ନିୟାମକ ଏବଂ ଅନ୍ୟାନ୍ୟ ଚିକିତ୍ସା ଉପକରଣ ନେଇ ଆସିଥିଲା ।ଏହା ସହ ୨୮ ଟନ୍ ମେଡିକାଲ୍ ଉପକରଣ, ଅମ୍ଳଜାନ ଜେନେରେଟର ଏବଂ ଅନ୍ୟାନ୍ୟ ଚିକିତ୍ସା ସାମଗ୍ରୀ ଫ୍ରାନ୍ସରୁ ଆସିଥିଲା ବୋଲି ବୈଦେଶିକ ବ୍ୟାପାର ମନ୍ତ୍ରାଳୟ ପକ୍ଷରୁ କୁହାଯାଇଛି।
