ବିଲ୍ ଗେଟ୍ସଙ୍କୁ କହିଲେ ପ୍ରଧାନମନ୍ତ୍ରୀ ମୋଦୀ: ‘ଏଆଇର ଅପବ୍ୟବହାର ହୋଇପାରେ’

ନୂଆଦିଲ୍ଲୀ: ଆର୍ଟିଫିସିଆଲ ଇଣ୍ଟେଲିଜେନ୍ସ (ଏଆଇ) ସହିତ ଜଡ଼ିତ ବିପଦ ବିଷୟରେ ମାଇକ୍ରୋସଫ୍ଟର ସହପ୍ରତିଷ୍ଠାତା ବିଲ୍ ଗେଟ୍ସଙ୍କୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଛନ୍ତି ଯେ ଯଦି ଲୋକଙ୍କୁ ଉପଯୁକ୍ତ ପ୍ରଶିକ୍ଷଣ ଦିଆ ନ ଯାଏ ତେବେ ସେମାନେ ଏହି ଟେକ୍ନୋଲୋଜିର ଅପବ୍ୟବହାର କରିପାରନ୍ତି। ସେ ଆହୁରି ମଧ୍ୟ କହିଛନ୍ତି ଯେ ଯଦି ଲୋକମାନେ ଏଆଇକୁ ଏକ ଯାଦୁ ଉପକରଣ ଭାବରେ ବ୍ୟବହାର କରନ୍ତି, ତେବେ ଏହା ‘ଗୁରୁତର ଅନ୍ୟାୟ’ ସୃଷ୍ଟି କରିବ। ଏକ ଖୋଲା କଥାବାର୍ତ୍ତାରେ ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ ଡିପ୍ ଫେକ୍ ସମସ୍ୟାର ମୁକାବିଲା ପାଇଁ ଏଆଇ ଦ୍ୱାରା ଉତ୍ପାଦିତ ବିଷୟବସ୍ତୁରେ ଏକ ନିୟନ୍ତ୍ରଣ ରହିବା ଆବଶ୍ୟକ। ଯଦି ଉପଯୁକ୍ତ ପ୍ରଶିକ୍ଷଣ ବିନା କାହାକୁ ଏଭଳି ଭଲ ଜିନିଷ (ଏଆଇ) ଦିଆଯାଏ, ତେବେ ଏହାର ଅପବ୍ୟବହାର ହେବାର ସମ୍ଭାବନା ରହିଛି। ମୁଁ ପରାମର୍ଶ ଦେଉଛି ଯେ ଆମେ ଏଆଇ-ଉତ୍ପାଦିତ ବିଷୟବସ୍ତୁ ଉପରେ ସ୍ପଷ୍ଟ ବ୍ୟବହାରିକ ସୀମା ରଖିବାର ବ୍ୟବସ୍ଥା କରିବା ଉଚିତ ଯାହାଦ୍ୱାରା କେହି ବିଭ୍ରାନ୍ତ ହେବେ ନାହିଁ। ଭାରତ ଭଳି ଗଣତାନ୍ତ୍ରିକ ଦେଶରେ ଯେ କେହି ବି ଡିପ୍ ଫେକ୍ ବ୍ୟବହାର କରିପାରିବେ ବୋଲି ସେ ବିଲ୍ ଗେଟ୍ସଙ୍କୁ କହିଛନ୍ତି।

ବାର୍ତ୍ତାଳାପ ସମୟରେ ପ୍ରଧାନମନ୍ତ୍ରୀ ମୋଦୀ ମାନବୀୟ ଉତ୍ପାଦକତାରେ ଉନ୍ନତି ଆଣିବା ପାଇଁ ଚାଟଜିପିଟି ଭଳି ଏଆଇ ଉପକରଣର ବ୍ୟବହାର ପାଇଁ ଆହ୍ୱାନ ଦେଇଥିଲେ କିନ୍ତୁ ଚେତାବନୀ ଦେଇଥିଲେ ଯେ ଯେଉଁମାନେ ଏହି ଟେକ୍ନୋଲୋଜିକୁ ‘ଅଳସୁଆ’ ଭାବରେ ବ୍ୟବହାର କରୁଛନ୍ତି ସେମାନେ ଭୁଲ ମାର୍ଗ ବାଛିଛନ୍ତି। ଯଦି ଆମେ ଏଆଇକୁ ଏକ ଯାଦୁ ଉପକରଣ ଭାବରେ ବ୍ୟବହାର କରୁ, ତେବେ ଏହା ବୋଧହୁଏ ଏକ ଗମ୍ଭୀର ଅନ୍ୟାୟର କାରଣ ହେବ। ଯଦି ଆଳସ୍ୟ ପାଇଁ ଏଆଇ ଉପରେ ନିର୍ଭର କରାଯାଏ, ତେବେ ଏହା ଭୁଲ ମାର୍ଗ ଅଟେ। ଆମେ ଚାଟଜିପିଟି ସହିତ ପ୍ରତିଯୋଗିତା କରିବା ଉଚିତ ଏବଂ ଏଆଇଠାରୁ ଆଗକୁ ଯାଇ ଏହାକୁ ଚ୍ୟାଲେଞ୍ଜ କରିବାକୁ ଚେଷ୍ଟା କରିବା ଉଚିତ ବୋଲି ମୋଦୀ କହିଥିଲେ। ଅନ୍ୟପକ୍ଷରେ ବିଲ୍ ଗେଟ୍ସ ଏଆଇର ଉପଯୋଗିତାକୁ ସ୍ୱୀକାର କରିବା ସହ ଏହା ଏକ ବଡ଼ ସୁଯୋଗ ହୋଇଥିବା ବେଳେ ଏହା କିଛି ଚ୍ୟାଲେଞ୍ଜ ମଧ୍ୟ ଆଣିଛି ଯାହାର ସମାଧାନ ହେବା ଆବଶ୍ୟକ ବୋଲି କହିଛନ୍ତି। ଗତବର୍ଷ ବାରଣାସୀରେ କାଶୀ ତାମିଲ ସଙ୍ଗମମ୍ କାର୍ଯ୍ୟକ୍ରମରେ ତାଙ୍କ ହିନ୍ଦୀ ଭାଷଣକୁ କିପରି ତାମିଲରେ ଅନୁବାଦ କରାଯାଇଥିଲା ସେ ବିଷୟରେ ମୋଦୀ ବିଲ୍ ଗେଟ୍ସଙ୍କୁ କହିଥିଲେ ଏବଂ ଚତୁର୍ଥ ଶିଳ୍ପ ବିପ୍ଳବ ବା ‘ଶିଳ୍ପ ୪.୦’ ସମୟରେ ଭାରତ ‘ବହୁତ ଲାଭ’ ପାଇବ ବୋଲି ଗୁରୁତ୍ୱାରୋପ କରିଥିଲେ।