ମହାକାଶଚାରୀ ସୁନିତା ୱିଲିୟମ୍ସଙ୍କୁ ଚିଠି ଲେଖିଲେ ପ୍ରଧାନମନ୍ତ୍ରୀ ମୋଦୀ

ନୂଆଦିଲ୍ଲୀ: ନାସା ମହାକାଶଚାରୀ ସୁନିତା ୱିଲିୟମ୍ସଙ୍କୁ ଚିଠି ଲେଖିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ଦୀର୍ଘ ୯ ମାସର ପ୍ରତୀକ୍ଷା ପରେ ଶେଷରେ ସୁନିତା ପୃଥିବୀ ପୃଷ୍ଠକୁ ଆସୁଥିବା ବେଳେ ମୋଦୀ ତାଙ୍କ ନିକଟକୁ ପତ୍ର ଲେଖିଛନ୍ତି। 

ମଙ୍ଗଳବାର ଦିନ ଅନ୍ତର୍ଜାତୀୟ ମହାକାଶ ଷ୍ଟେସନ (ଆଇଏସ୍‌ଏସ୍‌) ରୁ ପୃଥିବୀକୁ ଫେରିବା ଯାତ୍ରା ଆରମ୍ଭ କରିଛନ୍ତି ସୁନିତା ୱିଲିୟମ୍ସ। ତେବେ ପୃଥିବୀକୁ ଫେରିବା ପରେ ତାଙ୍କୁ ଭାରତକୁ ଗସ୍ତ କରିବାକୁ ନିମନ୍ତ୍ରଣ କରିଛନ୍ତି ମୋଦୀ।

ମାର୍ଚ ୧ ତାରିଖରେ ଶ୍ରୀମତୀ ୱିଲିୟମ୍ସଙ୍କୁ ଲେଖିଥିବା ଏକ ଚିଠିରେ ପ୍ରଧାନମନ୍ତ୍ରୀ କହିଥିଲେ ଯେ ସେ ତାଙ୍କର ଆମେରିକା ଗସ୍ତ ସମୟରେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏବଂ ତାଙ୍କ ପୂର୍ବତନ ରାଷ୍ଟ୍ରପତି ଜୋ ବାଇଡେନ୍‌ଙ୍କୁ ଭେଟିଥିଲେ। ସେ ସେମାନଙ୍କୁ ମହାକାଶଚାରୀଙ୍କ ସ୍ୱାସ୍ଥ୍ୟାବସ୍ଥା ବିଷୟରେ ପଚାରି ବୁଝିଥିଲେ। ତାହାକୁ କେନ୍ଦ୍ର ମନ୍ତ୍ରୀ ଜିତେନ୍ଦ୍ର ସିଂହ ମଙ୍ଗଳବାର ଦିନ ସେୟାର କରିଥିଲେ।

ଶ୍ରୀମତୀ ୱିଲିୟମ୍ସ ଏବଂ ତାଙ୍କ ସହଯୋଗୀ ବୁଚ୍ ୱିଲମୋର ନଅ ମାସରୁ ଅଧିକ ସମୟ ପାଇଁ ଆଇଏସ୍‌ଏସରେ ଫସି ରହିବା ପରେ ପୃଥିବୀ ଅଭିମୁଖେ ଯାତ୍ରା କରିବାର କିଛି ଘଣ୍ଟା ପରେ ଏହି ଚିଠିଟି ସାର୍ବଜନୀନ ହୋଇଛି।