ଅହମଦାବାଦ: ରବିବାର ଦିନ ଅହମଦାବାଦର ନରେନ୍ଦ୍ର ମୋଦୀ ଷ୍ଟାଡିୟମରେ ଗୁଜୁରାଟ ଟାଇଟାନ୍ସ ଏବଂ ରାଜସ୍ଥାନ ରୟାଲ୍ସ ମଧ୍ୟରେ ଆଇପିଏଲ୍ ୨୦୨୨ର ଶେଷ ମ୍ୟାଚ୍ ଖେଳାଯିବ। ଏହି ମ୍ୟାଚ୍ ଦେଖିବାକୁ ଏକ ଲକ୍ଷରୁ ଅଧିକ ଦର୍ଶକ ଏକତ୍ରିତ ହେବାକୁ ଯାଉଥିବାବେଳେ ସେଠାରେ ଶହ ଶହ ଅତିଥି ଉପସ୍ଥିତ ରହିବେ। କ୍ରୀଡା ଜଗତ, ରାଜନୀତି ଏବଂ ବଲିଉଡ ଇଣ୍ଡଷ୍ଟ୍ରି ସହିତ ଜଡିତ ଅନେକ ଅତିଥି ଆଇପିଏଲ୍ ୨୦୨୨ ର ଶେଷ ମ୍ୟାଚ୍ ଦେଖିବା ପାଇଁ ଏକତ୍ରିତ ହେବେ। ଏହି ତାଲିକାରେ ଦେଶର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଗୃହମନ୍ତ୍ରୀ ଅମିତ ଶାହାଙ୍କ ନାଁ ମଧ୍ୟ ରହିଛି, ଯେଉଁମାନେ ଆଇପିଏଲର ଶେଷ ମ୍ୟାଚ୍ ଦେଖିବା ପାଇଁ ଷ୍ଟାଡିୟମରେ ପହଞ୍ଚିବେ।
Sambad is now on WhatsApp
Join and get latest news updates delivered to you via WhatsApp
ଆଇପିଏଲର ୧୫ ତମ ସିଜିନର ଅନ୍ତିମ ମ୍ୟାଚ୍ ପୂର୍ବରୁ ଏକ ୫୦ ମିନିଟର ଉଦଯାପନୀ ସମାରୋହ ଅନୁଷ୍ଠିତ ହେବ, ଯେଉଁଥିରେ ବଲିଉଡ ତାରକା ରଣବୀର ସିଂ, କଣ୍ଠଶିଳ୍ପୀ ଏ.ଆର୍ ରେହମାନ, ନୀତି ମୋହନ ଏବଂ ଅଭିନେତ୍ରୀ ଉର୍ବଶୀ ରାଉତେଲାଙ୍କଠାରୁ ଆରମ୍ଭ କରି ଅନେକ ବଡ ବ୍ୟକ୍ତିତ୍ୱ ଅଂଶଗ୍ରହଣ କରିବେ। ଜାତୀୟ ଗଣମାଧ୍ୟମ ରିପୋର୍ଟରେ ଦାବି କରାଯାଇଛି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଗୃହମନ୍ତ୍ରୀ ଅମିତ ଶାହା ମଧ୍ୟ ଏହି ଉଦଯାପନୀ ସମାରୋହରେ ଯୋଗଦେବେ। ଏଭଳି ପରିସ୍ଥିତିରେ ଷ୍ଟାଡିୟମ ପରିସରରେ ସୁରକ୍ଷା ବୃଦ୍ଧି କରାଯାଇଛି।
ପ୍ରଧାନମନ୍ତ୍ରୀ ମୋଦୀ ଗୁଜୁରାଟ ଗସ୍ତରେ ଥିବା ବେଳେ ସେ ଆଇପିଏଲର ୧୫ ତମ ସିଜିନର ଉଦଯାପନୀ ସମାରୋହରେ ଯୋଗ ଦେଇପାରନ୍ତି ବୋଲି କୁହାଯାଉଛି। ଯଦି ପ୍ରଧାନମନ୍ତ୍ରୀ ମୋଦୀ ଷ୍ଟାଡିୟମରେ ପହଞ୍ଚନ୍ତି ତେବେ ସେଠାରେ ୬ହଜାରରୁ ଅଧିକ ପୁଲିସ କର୍ମଚାରୀ ନିୟୋଜିତ ହେବେ। ସୁରକ୍ଷା ବ୍ୟବସ୍ଥା ପାଇଁ ରାଜ୍ୟ ରିଜର୍ଭ ପୁଲିସ୍ (ଏସଆରପି), ରାପିଡ୍ ଆକ୍ସନ୍ ଫୋର୍ସ (ଆରଏଏଫ୍) ଏବଂ ଅନ୍ୟାନ୍ୟ ଏଜେନ୍ସିକୁ ସାମିଲ କରାଯାଇଛି।